1. السلام عليكم ..

السلام عليكم ..

انا بحاجه ماسه لمساعدتكم .. خصوصا انه موعد السفر 30-6 يعني مابقى عليه شي وهذي اول زياره لي لايطاليا من اوروبا رحت من قبل جينيف او باريس وبريطانيا .. واكثر وحده عجبتني جينيف .. فزرتها اكثر من مره .. المهم ايطاليا جديده علي وماعندي اي خلفيه عنها ياريت تساعدوني ..
أولاً - حاولت ابحث فالتقارير المصوره عن تقرير يشمل رحلة الكروز الى الخط اللي بنروح عليه .. ولضيق الوقت مامداني ابحث في كل مكان و مالقيت فياليت اللي يتذكر تقرير فيه هالخط يعطيني الرابط ولا عليكم امر ..
الخط يطلع من .. روما ويمر نيس في فرنسا ويمر فلورنس وجنوا ويصل الى برشلونه ويرجع الى ايطاليا
وللي ماعنده تقرير بس راح فهالرحله .. شالنصايح؟ شنو افضل الرحلات اللي نروح لها في كل محطه؟
ثانياُ - الفنادق في اول شي احنا حجزنا في روما - فندق ماريوت بارك هوتيل.
شلونه؟ انا شفت انه شوي بعيد عن السنتر لكن في باص مجاني كل ربع ساعه يودي!
بس احد جربه؟
انا سمعت انه في اسواق فالضواحي رخيصه وفيها اشياء .. يعني مب خرابيط اشيا تسوى
المطاعم القريبه .. المده في روما 4 ليالي .. اول يوم بنقضيه فال110 open وبنشوف فيه الاماكن السياحيه والاثار .. او مانبي نرجع لهم فالايام الباقي ..
الايام الباقي شنسوي؟ وين نروح؟
ثالثاً - ميلان - الماريوت ايضاً احد جربه؟ وشلون موقعه ومستواه؟ واذا في اكثر من واحد او لا؟
بنقضي فيها ليلتين شنو اهمهم؟
رابعاً - فينيسيا (ستار هوتيل) شلون الفندق؟ ومستواه وشجنبه؟ ووين نروح وشنشوف الجو في شهر يوليو شلون؟
اخيراً - طريقه الانتقال من روما الى ميلان ومن ميلان الى فينيسيا ومنهم الى النمسا نفضل القطار طبعا .. او اذا الطياره الداخليه احسن ليش؟ وكم الاسعار و من وين نحجز؟
الباقي فالنمسا بسأل فالبوابه هناك .
ومشكورين