https://artravelers.com/p/re/166776
الصرف بالباوند الجنية الاسترليني
افضل لك الصرف من هنا افضل بالقيمة وسعر الصرف امس في العمودي بالخبر 5.82 ريال لكل باوند
البطاقات افضل في الاستخدام وتجنبك عدم حمل مبالغ كبيره معك
برامج الزيارة
https://artravelers.com/p/re/645656
اسمتع بالقراءة

تسلم مشرفنا الغالي على تفاعلك ربي يسعدك ويوفقك
استاذي الكريم فارس ماذا تقترح علي بالسكن في فندق او شقق فندقية وإذا تعرف شيء جيد مجرب قريب من الهايدبارك واكسفورد ياليت تكتب لي اسمه وموقعه وسعره
وكم سعر التاكسي من المطار للفندق الذي قريب للهايدبارك واكسفورد التعامل بالعداد هناك ولا قطوعه
وانتظر اقتراحات وإفادات الكرام الخبراء بلندن الله لايحرمنا من الطيبين
ودمتم بخير

Booking.com : شقق بريزيدنشيال ماريليبون &

بسم الله الرحمن الرحيم
الاخ بيور لايف:
بالنسبة للسكن لمدة 10 ايام ما انصحك بالشقق لان نظامهم الدفع اسبوعي اما الفندق الدفع يومي وبالنسبة للفنادق في اكسفورد عندك فندقين انا جربتهم
1- ذا سيتل ( مناسب جدا للعوائل ) احجز غرفتين بينهم باب وهو مناسب واقتصادي وبتلقى اهل الخليج كلهم فيه ودايم تلقى عليه عروض - للأمانه انا ما احبه - وبوفيه الفطور عنده زين لكنه زحمه
2- الكمبرلاند حلو ومجددينه وبوفيه الفطور زين عنده واسعاره مناسبه
نصيحه : احجز عن طريق النت وخذ معاك صورة الحجز افضل من المكاتب
بالنسبة للتنقل: بصراحه على كثر ما رحت عمرنا ما حجزنا من الدوحه دايما ناخذ تكسي من المطار وايد احب التكسي الخنفسانه
بالنسبة للصرف : اصرف مبلغ بسيط بالباوند_ هم مايعترفون الا فيه - والباقي اعتمد على البطاقة احسن واامن
بالنسبه لبرنامج الزياره ،الاخ فارس الجبيل ماقصر بس فيه مكان حلو للاطفال في البيكادلي اسمه جنغل كافي ( محل لأطفال وداخلة مطعم ) يهبل العيال استانسوا فيه تدخل المطعم كأنه غابة استوائيه والجرسونات لابسين لبس الصياد ويشرحون حق اليهال وفجأه تسمع البرق والرعد والمطر عقبه زئير الاسد
بصراحه وناسه دور عليه في غوغل بتلقى العنوان بالضبط وروحله بتكسي اظمن عشان ما تظيعون

تسلم مشرفنا الكريم فارس ماقصرت يالغالي ربي يحفظكتسلم اخي الكريم هلو لندن على تفاعلك ربي يحفظك
وبالنسبة للفندقين الذين ذكرتهم وين موقعهم يالغالي وياليت إذا ماعليك كلافة تكتب لي الاسبلنق حقهم لأدخل عليهم بالنت
والجنقل كافي قريب من الفندفين نروح لمه مشي على الاقدام ولا بالباص ولا تاكسي
والتاكسي الخنفسانه كم اخذ منكم بمشواره من المطار إلى السكن بالعداد ولا قطوعه
وإذا فيه اماكن قريبة من الفندق مناسبة للعائلة اذكرها لي
شاكر ومقدر تفاعلك وآمل ان لا أكون تعبتك باسئلتي ربي يسعدك ويسهل دربك

1. الاخ الفاضل : بيور لايف اشكرك على الدعوه ولك بالمثل ان شاء الله


2. وبيطلع لك الموقع ان شاء الله

الاخ الفاضل : بيور لايف اشكرك على الدعوه ولك بالمثل ان شاء الله

1- thistle marbel arch هذا الفندق الاول وهو موجود في الاكسفورد وبتلقى اسمه فوق محل نكست وتدخل له انك تلف يسار بعد نكست ويكون نكست على يسارك تمشي شوي تلقى لفه يسار عندها كوفي شوب وباب الفندق جنبه على طول وعيب هالفندق ان الاستقبال فوق يعني تدخل تلقى جدامك سلم طويل وجنبه سلم كهربائي خربان دائما يعني يبيله لياقه
2- cumberland hotel london , وهذا موجود جنب كافيه بريت يعني تلطع من الفندق وتاخذ يسار تلقى جدامك الماربل ارتش ويسارك بريت وتلف عقب الكافي يسار وتتلقى نفسك في اكسفورد
( نصيحه : بالنسبه لبوفيه الافطار انصح بعدم تناول النقانق او المرتديلا حتى لو كان مكتوب عليها دجاج او خروف )
3- المطعم اللي ذكرته بعيد عنهم هو في البيكاديلي سيركس وحاولت احط الرابط لكن مشاركاتي قليله فانت اكتب
the rainforest cafe london

وبيطلع لك الموقع ان شاء الله

4- بالنسبة للتكسي كان عداد يحسب وخذ علينا مابين 90 الى 120 باوند مب ذاكرة بالضبط
5-الاماكن القريبه للأطفال في اكسفورد هي عبارة عن محلات مش اماكن لعب يعني عندك disney store في اكسفورد وفي البيكاديلي سيركس عندك متحف صدق او لا تصدق حلو ومحل ام اند امز وفيه مجمع قديم اسمه التروكاديرو ولدي يحبه عشان الحبال اللي يربطونهم فيها ويقلبونهم بالهوا والثور الهايج وفي داخله محل تصوير يلبسون اليهال ملابس قديمه ويصورونهم
6- عندك مدام توسو حلو وعند لندن اي فيه محل العاب لليهال فيها السيارات اللي تتصادم والعاب الكترونيه وتدخله من باب المكدونالدز
7- اذا كنت ناوي تطلع ملاهي خارج لندن انصحك بألتون تاور احلى من ديزني فرنسا وفيها العاب لجميع الاعمار وتقدر تأجر سياره خاصه توديك او تروح عن طريق قروب من المكاتب في الادجوار رود
فيه مكان بعد حلو لكنه للأكل وهو دزني كافيه داخل هارودز الصغار بيستانسون فيه لانهم يقدمون الاكل بصوره حلوه .مره ولدي طلب بيتزا مارغريتا جابوها على شكل ميكي ماوس انا استانست عليها اكثر من ولدي
واذا ذكرت شي ثاني راح اذكره بعون الله

مقهى الاطفال في البيكاديلي تخلي متحف صدق ولاتصدق على يمينك وقاب على يسارك تمشي شوي تحصل المقهى على يمينك
http://www.therainforestcafe.co.uk/

تسلمون ياكرام على تفاعلكم الله يوفقكم
ولظروف طارئة ستكون بمشيئة الله سفرتنا للندن العام القادم
وأشكركم على المعلومات المهمة المفيدة التي لاشك ساستفيد منها مستقبلاً
ماقصرتوا ربي يسعدكم
تحياتي لكم