1. فكره الرحله


2. وتم الحجز من موقع بوكينق اربع ليالي ب 4600 ريال شامل الافطار


3. التنقلات كانت بالمواصلات العامه اخوكم ما فيه حيل للسواقه


4. وسنذكر كل شي بالتفصيل باذن الله في التقرير


5. (اليوم الاول)


6. وطبعا التكاسي عندهم نار مولعه 16 فرنك بس عشان دقيقه بالسياره


7. وصلنا للفندق


8. المهم جينا بس للاسف طلع اخر رحله مشت قبل ربع ساعه

بسم الله الرحمن الرحيم
اهلا بكم اخواني واخواتي في منتدى العرب المسافرون هذا الصرح الشامخ الذي سبقا باذن الله منارة للمسافرين العرب في كل مكان
حبيت انقل تجربتي في سفرتي لسويسرا وانترلاكن بالتحديد
لمن يخطر ببالي ولا للحظه اني ممكن انزل تقرير ولكن لما فكرت فيها شفت ان لولا الله ثم التقارير الي هنا ما قدرت اسافر سويسرا فقررت اني انزل تقرير واعرض فيه الي صار معي
اول مره طبعا انزل تقرير وباجتهد لكي يكون مفيد ولكن ان حصل اخطاء او شي اخر فمنكم نستفيد
ذهبت لروما وانترلاكن وباريس وهنا ساستعرض رحلتي لانترلاكن باذن الله
انترلاكن
مدينه ريفيه معروفه بجمالها وموقعها الاجمل تتوسط سويسرا وتقع بين جبال خضراء وثلجيه وهذي خريطه سويسرا ونلاحظ توسط انترلاكن لها

فكره الرحله

طبعا الرحله هي شهر عسل وجت ع بالي اوروبا لاني كان صديقي رايح شهر عسل في سويسرا وباريس ووراني صور له هناك وانسحرت خاصه في سويسرا فبدات الفكره تنمو وتنمو في راسي الين تمت ولله الحمد ولم اندم ابدا اني رحت
مخطط السير
الدمام - الدوحه - روما
والعوده
باريس- الدوحه-الدمام
الخطوط الناقله :

التذكره كانت غاليه شوي لاني سويت حجوزاتي متاخر شوي
شخصين ب 8100 ريال
بعد قراءه لتقارير الاخوان والاخوات كنت اريد اختيار فندق مناسب ووقع الاخيار على فندق مترو بول
ولكن للاسف طلع الفندق مليان لاخر حاولت ولكن ما فيه فايده
قلت باشوف بديل وفي الاخير اخترت فندق بليفيو انترلاكن الواقع على النهر مباشره

االصوره هذي من النت للامانه

وتم الحجز من موقع بوكينق اربع ليالي ب 4600 ريال شامل الافطار

التنقلات كانت بالمواصلات العامه اخوكم ما فيه حيل للسواقه

تم اخذ بعض الاغراض طبعا من فيش كهرباء ونصيحه للاخوه خذو معاكم المحول الكبير لان غرفهم ما فيه الا مكانين تقدر تحط فيها فيش فشيل المحول اللي يجيه فيه اربع مداخل واشبكه في واحد وريح نفسك حط عليه بطاريه الكاميرا والجوالات
شنطه صغيره تعلق ع الكتف لحمل الاغراض الشخصيه من فلوس و غيرها
هذي نقريبا تحركاتي لما قبل الرحله

وسنذكر كل شي بالتفصيل باذن الله في التقرير

(اليوم الاول)

وصلنا انترلاكن قادمين من روما على القطار واستغرق 5 ساعات ولكن خمس ساعات لم نتعب او نمل لما راينا من جمال طبيعه وانهار وبحيرات على الطريق لدرجه ان قلت يا ناس يا عالم انا في حلم والا علم < متعود ع رمال الربع الخالي ما شاف خير
اول ما قربنا من قريه spiez و شفت البحيه انخبلت طبيعه وخضار وبحيره وشي يرد الروح
وهذي صوره البحيره

صوره ثانيه

مناظر يجيب العافيه
المهم وصلنا محطه spiez وغيرنا قطار الى انترلاكن
المسافه قصيره 18 دقيقه
واول ما وصلنا الى محطه انترلاكن الغربيه
واخذنا تاكسي للفندق (بيليفو)بالرغم من انه قريب جدا خمس دقاييق مشي بس ومعنا شناط وحوسه قلنا ناخذ تاكسي افضل

وطبعا التكاسي عندهم نار مولعه 16 فرنك بس عشان دقيقه بالسياره

وصلنا للفندق

واول ما وصلنا استقبلنا الموظف بابتسامه بغت تشق وجهه مو حب فينا بس يبغا الي في جيوبنا الفلوس يا حبيبي الفلوس سلمنا الغرفه وعطانا بطاقه تخفيض للباصات وبعض الاماكن السياحيه واستلمنا الغرفه وحطينا اغراضنا وهذي اطلاله الغرفه

وهذي صوره للاطلاله من على اليسار سويت زوم للقمه الثلجيه عجبني شكلها

للاسف ما صورت الغرفه لان ما كان في بالي صراحه اني بانزل تقرير اتمنى تعذروني
الفندق الله يسلمكم اعطيه 6 ونص من عشره وذالك للاسباب التاليه
1- الفندق ارضيته من الخشب ومزعجه عند المشي
2- الانترنت في الغرف بطيئ جدا وكلمتهم اكثر من مره ويقوولون بنصلحه وجيت ورحت ولا صلحوه
3- من بعد 12 بالليل ما تلقا احد يخدمك ولو تبكي
4- المصعد قدييم جدا لدرجه اني حسيت انه بيوقف باي لحظه ولا يوسع الا لثلاث او اربعه بالكثير بدون اغراض بعد ههه
5-لا يوجد خدمه حمل الشنط
6-السرير كلمتهم من توني بالدمام قلت لهم انا ابغا سرير نفرين وقالو ابشر وجيت وحصلتهم ملصقين سريرين ببعض بحديده وع انه سرير نفرين ولا كان فيه اي رراحه ابد وكلمتهم وقالو ما كان فيه متوفر زحمه فسوينا كذا
ابرز في ما في الفندق اطلالته صراحه حلووه نهر وجبال خضراء وقمم ثلجيه تشوفها مرره روعه
وايضا النظافه ممتاز في الغرف ودورات المياه تكرمون
فطور الفندق جميل جدا ومتنوع
هذا الفندق ولو ارجع مره ثانيه ما راح اسكن فيه
بعد نص ساعه نزلنا قلنا ناكل لنا شي وطلعنا من الفندق خذينا يمين واول شارع يمين الا ونطيح ع مطعم شغالين فيه هنود حق بيتزا وما بيتزا
هذا المطعم من الداخل

وطلبنا بيتزا كان طعمها حلوو الصراحه

خلصنا اكل وحاسبنا اثنين بيتزا وسط واثنين كولا ب 16 فرنك
طلعنا بعدها قلنا بناخذ فره في القريه ونستكشفها شوي
وهذي صور من فرفرتنا ههه

يا حبهم للسياكل في كل مكان تشوفها ههه

صراحه قريه حلوه و تحس فعلا بانك في ريف وجوها عليل وكان فيه مطر خفيف الله يرزقنا بما رزقهم
قلنا بعدها بنروح نركب السفينه الي تاخذ جوله في بحيره تون
موقع السفينه بجانب محطه انترلاكن الغربيه مباششره بتشوف لوحاتها موجوده
هذي صور من المكان

اعجبتنا هالبطه وعرضنا عليها تروح معنا للدمام ورفضت حظها رفضت اجل تخلي الخضار والثلوج والبراد وتروح ل 50 درجه مئويه

وع طول او ما توصل بتشوف جدول الرحلات متى تبدا ومتى توصل شوف الي يناسبك وتقدر تشتري التذكره من مكانين
اما من مكتب للتذاكر موجود ع يمين اللوحه الموجود فيها جدول الرحلات والمكتب ما يفتح الا قبل الرحله بنص ساعه حصلت ورقه مكتوبه
او تقدر تشتري من السفينه نفسها

المهم جينا بس للاسف طلع اخر رحله مشت قبل ربع ساعه

رجعنا للفندق وصلينا المغرب ويوم دخل وقت العشا صلينا العشا ونمنا لان كان يوم متعب سفر خمس ساعات من روما وفرفره بشوارع انترلاكن اخذت طاقتنا
طبعا عرفت وقت الصلاه والقبله بالاي فون فيه برنامج اسمه صلاه يعلمك بالاوقات وايضا اتجاه القبله اهم شي اخواني انتبهو لا يكون فيه حديده والا جوال قريب من الاي فون وهو يحد القبله لان يشوش عليه حسب ما فهمت ويطلع القبله غلط
بس حطوه ع طاوله لحاله وتحركونه بحركه زي رقم ثمانيه وبعدها يحدد القبله
هذا يومنا الاول وان شاء الله انزل اليوم الثاني وفيه
قمه جونقفراو الرئعه (Jungfrau )
وجوله بحيره برنز brienz
وقمة هاردر كالام (Harder Kulm