السلام عليكم ورحمة الله وبركاته...
كيفكم يا احلى اعضاء
بعد ما استفدت كثير من هالمنتدى بسفرتي قلت لازم افيد الاعضاء الثانيين انا بعد
بكتبلكم عن رحلتنا لتايلاند اللي رجعنا منها يوم الاربعاء 23/07/2008
بس لاني على طول السبت بدأت الدراسه فانشغلت كثير
وبما ان بكره اجازه قلت انزل التقرير اللي اتمنى انه راح يعجبكم..
قسمنا الايام كالتالي:
4 ايام: بانكوك (للعلاج)
3 ايام: شنغماي
7 ايام: بانكوك
ما راح اكتب كثير عن الاربعة الايام الاولى لان اغلبها كان بالمستشفى
واحنا كنا نجلس بالفندق ونروح للسوق اللي بنانا
بس بكتب عن ثاني يوم اللي رحنا فيه لبتايا
بسم الله نبدأ
رحلتنا كانت عن طريق الخطوط القطريه بتاريخ 09/07/2008 وطائرتنا كانت الساعه 6:30 الصبح
وكانت الرحله مسقط_قطر_بانكوك
طبعا بيوم السفره انا واخواني الافاضل ما نمنا لان الوالد قال بنروح المطار عالساعه 3 عاد احنا متحمسين لانها اول سفره لنا
هذي صورة الطياره من الداخل
وهنا صورتين لقطر لما وصلناها من الطياره
كان الترانزيت ساعه بدلنا فيها الطائره
و وصلنا بانكوك عالساعه 7 ونص بعد المغرب و اخذنا ميني باص من المطار ب 1200 بات
اليوم الثاني انقضى بالمستشفى وبالليل رحنا لاحد المكاتب السياحيه عشان نحجز رحله لبتايا
احنا ما شاء الله 9 اشخاص فدايما ناخذ ميني باص واذا تاكسي ناخذ 2
ما اذكر بالضبط على كم اتفقنا معاه ليوم كامل اعتقد 4000 او 5000 بات
كنا جاهزين الصبح من ساعه 9 وهو الوقت المتفق عليه لوصول الباص
بس تاخر الباص تقريبا نص ساعه
المهم واحنا بالطريق وقفنا ع حديقه للنمور والتماسيح واسمها SRIRACHA TIGER ZOO
وهذي صورتها
بحطكم مع بعض الصور للحديقه
اللي استغربنا منه في هالحديقه ان الخنازير والنمور حاطينهم مع بعض
هذيلا الخنازير الصغيره محطوطين مع النمر الكبير اللي صورته تحت
تقدر تصور مع النمر الصغير وانت تعطيه زجاجة حليب
اخواني واختي صوروا معاه بس انا قلت مستحيل
والحين ننتقل للتماسيح
وهذي بيوض التماسيح قبل لا تفقس
وهذا منظر لبحيره بالحديقه
وهنا مكان مخصص للعقارب
وهذي نفس الصوره بس صورناها بالفلاش
هذي صوره للبنت اللي حاطه العقارب ع نفسها
وطبعا تقدر تصور معاها
المكان هناك مظلم شوي فكنت اوسوس واشوف عالارض لا تكون في عقرب طالعه ولا شي
وهذي صوره للفيله
طبعا اخواني الصغار ركبوا بالفيله
وبعدها طلعنا من الحديقه اللي استانسنا فيها وكملنا طريقنا لبتايا
وصلنا بتايا تقريبا ساعه 1 الظهر
فدورنا على مطعم عشان نتغدى فيه
حصلنا مطعم هندي مقابل الشاطي بس بصراحه اكله روعه
يعني هو احلى مطعم اكلنا منه بتايلند وصرنا كلما ناكل من اي مطعم نقول اللي ببتايا احلى بكثير
بس للاسف ما اذكر اسمه
وهذي بعض الصور لبتايا
وهذي صوره لاخواني
طبعا احنا البنات جلسنا عالكراسي وبعدها رحنا نلف شوي عالسوق
وبعدها ركبنا الباص عشان نرجع وكان الوقت قريب المغرب
وهالصوره صورناها من الباص
باليوم اللي بعده ما طلعنا الصبح لان الوالده الله يطول بعمرها كان عندها مراجعه بالمستشفى
وبالليل رحنا للبيغ سي
رحنا متأخرين شوي فما لحقنا نلفه كامل وقلنا لازم نرجع له مره ثانيه
حبيت هالمجمع كثير بالبدايه بس بعدين كرهته
راح اقولكم ليش بعدين
اليوم اللي بعده كان موعد رحلتنا لشنغماي
راح اكمل الموضوع بكره باذن الله
اتمنى انكم استمتعوا بالجزء الاول من رحلتنا