1. اليوم الأول


2. وصلنا الى جزيرة بوكت تمام الساعة التاسعة مساءً قادمين من كوالالمبور


3. كان قيمة التذكرة للبالغين 1200 بات وللأطفال 800 بات


4. دفعنا 3800 بات أي مايعادل 100 دولار ركبنا على ظهر الفيل


5. وهاذي الصوره اشرايكم فيها


6. نصيحه مهمه

السلام عليكم
اشلونكم
اخيرا قدرت اصغر حجم الصور
بحط لكم تفاصيل رحلتي بس سامحوني بكتب الموضوع بأسلوبي ان شاء الله يكون مفهوم وواضح للكل .. تراني ماعندي خبره بالكتابة وهاذي اول تجربة لي
بسم الله نبدأ

اليوم الأول

وصلنا الى جزيرة بوكت تمام الساعة التاسعة مساءً قادمين من كوالالمبور

مدة الرحلة كانت ساعة وربع ، سكنا في فندق هورايزون ريسورت الفندق مدخله حلو وياحليلهم التايلنديات بشوشات كله مبتسمين ، سكنا في غرفه عائلية كبيرة فيها مطبخ مفتوح مثل النظام الانجليزي ، ياحليلهم أهل هورايزون ما قصروا حتى المايكورويف والصحون والاكواب والكوفي والشاي حطوه مو مثل امباسدور
المهم نزلنا اغراضنا في الغرفة وطلعنا نتفقد المنطقة المحيطة بالفندق وبعدين خلصت بطاريتنا ورجعنا الفندق ونمنا من التعب
صور للغرفه اللي سكنا فيها في فندق هورايزون
اليوم الثاني
صحينا من النوم و نزلنا تحت للفطور بوفيهم زوين بس ديروا بالكم ترى فطورهم في اكل خنزير المهم فطرنا انا وزوجي واليهال
وطلعنا نتمشى قلت خاطري اشوف هالبتونج بيش اللي يقولون عنه مشينا دقيقه وطفنا الشارع والا الشاطيء في ويهنا
واحنا واقفين شان جانا سواق تاكسي ، قال تبون تاكسي يوديكم جوله للجزيرة قلنا له اوكي بكم بعد المكاسر وصلنا 300 بات اتفقنا معاه وطلعنا
كانت اول وقفه في منطقة مرتفعه تقدرتشوف شواطيء بوكت من فوق المنظر وايد حلو
بعدها تحركنا لعرض الثعابين قيمة التذكرة 300 بات للشخص >>> انصبوا علينا الملاعين خذوا منا 900 بات لعرض مدته ربع ساعة في مكان كلش متواضع . المهم دفعنا وشفنا العرض
بعدها ودانا سواق التاكسي لمنطقة يركبون فيها على الفيل
المهم دخلنا شان نشوف الاسعار خيالية وانا كان خاطري اركب الفيل

كان قيمة التذكرة للبالغين 1200 بات وللأطفال 800 بات

دفعنا 3800 بات أي مايعادل 100 دولار ركبنا على ظهر الفيل

وكانت الرحلة اتينن مشينا بين غابات المطاط وصعدنا الجبل ونزلنا يعني الرحلة ما تنوصف صج كانت مغامرة بس وناسه انصحكم انكم ما تطفونها . بس على فكرة السعر اللي دفعناه ضعف المبلغ اللي المفروض يندفع اكتشفنا ان صاحب التاكسي ياخذ عموله من الأماكن اللي يودينا لها واكتشفت ان السعر لما تاخذه من مكتب السياحه ما يتعدى 1500 بات لعدد اربعة اشخاص هذا من غير المكاسر مع المنكاسر يطلع اقل ******** هاذي النصبه الثانية من سواق التاكسي
شوفوا الصور واحكموا
الفيل اللي ركبت عليه نحيس ما يبي يمشي كل شوي يوقف وياكل وزوجي وولدي اسبوقنا
بعدين خدذنا التاكسي وودنا حق اكبر المعابد الموجوده عندهم نزلنا صورنا من الخارج بس ما دخلت لأني اتواحش منهم ولا احب ريحه بخورهم يلوع الجبد .
بعدين رحنا مصنع الكازو
وتسوقنا
بعدين رحنا لمصنع الالماس
الله تصاميمهم فضيعه شغل مزبوط واسعار مزبوطه
طلعنا من مصنع الالماس ورحنا Big C عشان نتغدى
متنا من الجوع واكلهم يلوع الجبد استغفر الله له ريحه مميزه
درنا المطاعم الموجوده بالمجمع ما عجبنى الا كنتاكي
تغدينا وطلعنا وقلت حق سواق التاكسي ودنا حق السن ست
حق منظر الغروب
ورحنا واشوا لحقنا عليه قبل ما تغيب الشمس

وهاذي الصوره اشرايكم فيها

نصيحه مهمه

خذوا كل رحلاتكم من المكاتب السياحية ولا تسوون مثلنا لما اخذنا سواق التاكسي ودنا اماكن ودفعنا مبالغ ولما شفناها بمكاتب السياحة اقل من النصف والمكاتب السياحية اضمن. ولأن سواق التاكسي يوديكم حق الاماكن اللي يتعامل معاهم ويعطونهم عموله ويتضربون عليكم بالاسعار حتى مصنع الكازو ومصنع الالماس عرفت انهم يعطون سواق التاكسي كوبونات للبانزين
واذا تبون مكتب زين واسعاره حلوه وانا شخصيا تعاملت معاهم طول فترة رحلتنا في بوكت وارتحت لهم
هو مكتب نسيت اسمه ... لما تطلع من باب فندق هورايزون بتلاقيه على يدك اليمين اللي فيه حريم ثنتين ومحلهم بتاع كلو ( انترنت + مغسله + رحلات وسياحة + بقالة يبيعون ماي وبيبسي ) محل متعدد المهام خ
بعدها رجعنا الفندق ارتحنا شوي
ورجعنا طلعنا مره ثانية نتمشى في السوق المحيط بالفندق
اكمل وياكم تفاصيل اليوم الثالث بأقرب فرصه
واتمنى ان أكون قد أفدتكم بشي