يالله حيهم مرة ثانيه
هذا يوم الثلاثاء الصبح وحنا نجهز العفش بالسياره عشان نمشي
طبعا قلنا بنسبق أهلي للمطار عشان نشحن العفش ونخلص
يوم حملناه وخلصنا
وهنا بالطريق للمطار ويظهر بالصورة أمير الرحله محمد ومساعده أبو سعود
كل شي يبونه يسوونه
وحنا لا قلنا شي يرفضونه
بس القهر إن ابوي داعمهم بقوة
ما شاء الله
أميرتنا لنو
طبعا رحلتنا كانت على خطوط الإتحاد وكانت تكلفة التذكره الوحده 2800 ريال
طبعا حنا كنا مجهزين كل شي قبل يعني كان تخطيط السفره كذا
أول ما نوصل نطلع لبونشاك 10 أيام
ثم 5 أيام جاكرتا
الأيام الي جلسناها ببونشاك كنا حاجزين فله ومخلصين أمورها بدري ونفس الفكره جاكرتا حجزنا بفندق أستون مارينا .
حجز الفله كان عن طريق سمسار يشتغل بأندونيسيا وضبطني صراحتن
يوم ركبنا بالطياره وعلى وشك الإقلاع
أهم شي مدخل الشواحن
وداعاً
إستغلال
هنا يوم وصلنا لأبوظبي
عاد كانت رحلتنا ترانزيت وكان الإنتظار بمطار أبوظبي 7 ساعات
مافيه شي ما سويناه ملينا قسم
نمنا قمنا لعبنا بلوت حبشه طش كل شي عيا لا يمشي الوقت
هنا يوم وصلنا وجلسنا متحمسات هالصغيرات
بس ما يدرن وراهن 7 ساعات
هذي الظاهر عجله بتروح رحلتها
وافضيحتاه
هنا قالوا أهلي نبي شاهي خل نروق
قلت انا لها
وأطلع للكوفي وأتذكر إن الدنيا هنا إنجليزي
ومير اتوهق وانا أخبر الشاهي اسمه سهل وادوره بالمنيو ما حصلته
واجي اقوله بليز سبعه ايت
هو وت
انا ايت ايت
هو يبغى شاهي
قلت ايه زين تكلم عربي عطنا سبعه شاهي الله لا يهينك ههه
بدا الطفش يدب والصاله تزدحم
يوم بقى ساعتين ومير تبرد الصاله ونلبس هالبصوه
ما شاء الله
اتوقع الصوره أبلغ من التعليق
تبين لكم مدى الطفش والزهق وكل شي ههه
بقى على الرحله ساعه ولا نزلو لها شي
وخلاص نبي ننام دايخين مره
يوم ركبنا الطياره أبو سعود ممداه يشغل الفلم إلا بسابع نومه
بالعافيه يالحبيب
برب

الحين يوم ركبنا الطياره وأقلعنا وأشرقت الشمس فرصه للتصوير
وآضح الفلم في أوج عطاءه وحماسه
والله الفرق بينها وبين أول ما أقلعنا من الرياض
جالسين ندخل البيانات عشان ما نطول بالمطار
بمطار جاكرتا كان الجو رطوبه شوي
كنا متفقين مع سواقين وكانو ينتظرونا والله يافيهم واحد اسمه يونو بططل
المهم ركبنا العفش ومشينا لبونشاك
طبعا مقدر اوصف لكم مدى الحشره الي كنا محشورين فيها بالسياره لأن نص العفش معنا والفان مافيها شنطه كبيره
يوم وصلنا بونشاك بدت تمطر
هذا العشيب حقهم
جو كآن أليم الصراحه
طبعا حنا مستأجرين فله من قبل لا نسافر حاجزينها ودافعين المبلغ وكلش طبعا هالفله حجزناها بطلعة الروح
أول شي كنا نبي فله اسمها بونشاك 1 وصارت محجوزه من السفاره السعودية وقلنا بنغير وندور بهالتقارير طبعا بذيك الفتره كانت بداية شهر 11 كنت أكلم أختي حنان واخوي محمد باليوم 4 مرات
وكل شوي ( هاه حجزت لا شف هالتقرير وش صار على ذا رد عليك ) لين طحنا بفله ثانيه ويوم قررنا نحجزها وكلمنا وكل شي وجينا بنحول المبلغ ويقولنا مير راحت عليكم
لا أخفيكم إننا قررنا نكنسل السفر
المهم ونطيح بذي الفله ونتوكل على الله ونحجزها طبعا مالقينا إلا تقرير واحد عنها ولا كانت الصور واضحه فكنا بالطريق وحنا متجهين للفله أنواع الوسوسه والتحلطم
لأننا مانعرف وضع الفله ونحسها انواع التحطيم
يوم وصلنا للفله إنهبلنا
كانت عكس التوقعات مره
بطله لأخر شي
هذي الصاله اول ما تدخل تصير بوجهك .
طبعا الفله مكونه من 4 غرف نوم وأربع حمامات وانتم بكرامه
وصالتين كبار وبلكونتين ومطبخ ومسبح وساحه خارجيه كبييره
هذا المطبخ له مدخلين
وهذي صورة الفله من برا
طبعا كانت تمطر
هذي صورة المدخل الخلفي
وهذي الساحه الخارجيه طبعا كان الوقت مسيان فموب واضح شي
وتظهر راعية الفله
الحين يجي وقت غرف النوم
وحنا ننزل العفش طبعا المطبخ تشوفونه قدامنا ومدخلين له
هذا المطبخ من جوا
وأزين مافيه انه موفر فيه كل شي
لو إننا دارين كان طاحت ثلاث أرباع العزبه
طبعا سعر الفله هذي مدة عشر أيام ( 12 ألف ريال ) وإسمها فلة بنتانق
برب

نستكمل من حيث توقفنا

الحين نروح للدور الي فوق

هذي الصاله الثانيه

وهذي الغرفه فيها سريرين هذا السرير للصغيرات

وهذا السرير الثاني

طبعا كأي شاب سعودي ما ننام بالغرف انا ومحمد
لازم بالصاله
هنا مكان نوم محمد

وهنا انا
والله ياهو أليم الصراحه
برب

ماشاء الله تبارك الله
الصور معبره جدا وترتيب التقرير باين جميل من بدايته والطرح فكاهي لاتغير خلك علي نفس المنوال
اما ماخذ فيلا بنتانق وخايف لا تكون مو قد المقام خير مااخترت وهي من افضل فلل الجبل الان
واصل وسجل معك متابع

اليوم الثاني لنا هناك
قمنا من 5 ونص الصبح لأننا حاطين لنا جدول كل يوم بيومه
القهوة الساعه 6 ونص والفطور 7 ونص
ونطلع الساعه 8 ونص
بس انتم لا تحسبونا بالتوقيت دام معنا حريم

ياويليه يالجو

طبعا كنتاكي قريب من عندنا

الجو جو سباحه

الجو خالع

الجلسه ذيك قسم ياهي حقت روقان ع الأخر

التكيه الروقانيه

يوم طلعت الشمس هالصغار نقزو ع المسبح على طول

نبدا نوريكم الفله بالنهار

هذي الساحه

طبعا فيها ملاهي
بس بعيده موب واضحه من هنا
قدام المسبح هي

ونفسه الي تحت تبع الفله ملعب طائره

ومهنا إلا قوة سباحه

هذي الملاهي الي اقولكم

هذا السيب الي ورا

هنا المدخل الرئيسي

هذي واجهة الفله
طبعا نسيت اقول إسمها إسمها فلة بنتانق

هذي الفان وش حليله تطل من بعيد

الفلل الي جنبنا

السباح سعودي

الجو هناك يخليك تحمس للتصوير

بررد

والقهوة على النار تطبخ
برب

طبعا مقررين اليوم نطلع لسفاري
أهم مكان ببونشاك
ولا يكفيه يوم بعد

منظر من البلكونه

بالطريق لسفاري

هنا مره وحنا طالعين نمشي مسيان حنا والعيال شفنا واحد فاقد

مدخل سفاري

قرنقش يا حبيبي
طبعا هذي مليون ربيه يعني حدود 400 ريال

الجو بديع

هذي مدري وش فهد ولا قطو جبلي

هلا هلا بأخويا أخوي محمد

ياخي مدري ليه حيواناتهم تفرق عن حيواناتنا

فهاوه ياحبيبي

وقفنا عشان نشوف الفعاليات فيه عدة عروض عروض الفيله ثم عروض الدلافين ثم عرض الكابوي ( أطلق عرض ) ثم عرض النمور

جلسنا نتمشى فيها شوي قبل عرض الفيله

نمر بزر مالنا خلقه

يستعرضوون عندك ويصورون ويبلشونك ثم يقولك هديه هديه
يعني يبي قروش

عرض الفيله عرض عادي

ثم رحنا للملاهي الي موجوده فيها لأنك إذا دخلت سفاري من حقك تلعب فيها
وهالبقطه تصيح ماتبي

مبسوط

هذا النمر صورنا معه ياهو رعب اعوذ بالله

كبير يا سعود طالع على خالك بالشجاعه

يعنني موب خايفه
برب

هنا رحنا لعرض الدلافين كان عرض حلو صراحتن

هنا جالس يرقص ورا ورا

عاش واقف

ثم رحنا لم جهة عرض الكوبوي

هنا يوم دخلنا وننتظرهم

الصراحه عرض بطل

ابو أحمر ذا أطلز واحد

صوره مع احد أبطال العرض

يعنني ما ادري

برب

طبعا بنفس سفاري فيها مكان شلال
رحنا نشوفه ونصور عنده

كان الماء بارد

ياحليلهم مبسوطين

ثم رجعنا نشوف عرض النمور

فيه سبه على أحد مين ما أدري

ثم بدت تمطر قبل يبدا العرض وطلعت أصور

شي شي يرد الروح

إنشقت السماء بذاك الوقت

بدا العرض

ثم خلصنا من سفاري وطلعنا على أخر العصر وحنا جايينها من 8 ونص الصبح او 9 وماخلصناها كلها

ثم طلعنا حنا والعيال نجيب تويس

عائله سعوديه تشاركنا في شراء التيس

وكانت تمطر بالفله

القهوة وقت المطر كلام كبير

لو تلاحظون المسبح بتدرون ان المطر قوي

إِحبك التيس يا ولد
برب