السلام عليكم
هاذا اول تقرير لي في المنتدى واعذروني بدون صور ابدا مالي في التحميل
بس مستقبلا ان شاء اله في تقارير اخرى
حيكون تقرير سريع بس وبالمختصر المفيد
الرحلة كانت شخصين انا وزوجي وبنتي عمرها 5 سنوات يوم 14نوفمبر
اتجهنا من مطار شارل ديغول الى ديزني عن طريق باصاتهم في
المطار باص ابيض يوصلك
للبوابة الاخرى في المطاراللي تلاقي عندها الباص الاحمر والتوصيل كان مجاني
بعد مانزلنا عند البوابة دخلنا نشتري التذاكر للباص الاحمر الكبار 18يورو ولاطفال 15
انتظرنا نص ساعه حتى جا الباص.......كنا حاجزين في فندق Park & Suites Prestige Val d'Europe
سعره ممتاز والحلو فيه التوصيل لديزني والاوتلت مجاني بس تعبنا لمن وصلنا محطة الباصات
لانو الباص الاحمر مايوصل الا للفنادق التابعه لديزني نفسها وانتظرنا في مواقف الباصات ساعتين ولا جانا باص الفندق
اخدنا تاكسي ب 12 يورو ولمن وصلنا قالولنا سيارتنا ماتوقف داخل محطة الباصات توقف عند السينما تبع ديزني
مع اني سالتهم في الايميل وقالولي محطة الباصات بس ولا وضحولي المكان بالضبط وبنتي تعبت
من البرد المهم وصلنا وقالولنا خلو شنطكم لسا بدري على الشيك ان وصلنا 11 والشك ان 3
المهم قلنا اوك وخليناهم يودونا المول اللي عند الاوتلت واتغدينا ولفينا ورجعنا على 2 ودخلونا الغرفة
هيه عبارة عن اجنحة والغرفة فيها مكرويف وثلاجة وتوستر وغلاية وبوتجاز واهم الشي السرير مريح بعد العناء اللي كنا فيه
جلسنا في ديزني يومين بس والبرد كان قارس حتى بنتي اللي جايين عشانها زهقت وكل شوية تقوللي نرجع الفندق خلاص
درجة الحرارة كانت 2 ولابسين طبقات بس فعلا برد
وكانت لعبة SMALL WORLD مغلقة خسارة بس انبسطنا والله والحلو اول ماتدخل مسويين ثلج صناعي يتساقط
واغاني كريسماس..............
كولمار
خلصنا اليومين واتجهنا لمحطة المترو بسيارة الفندق وبعد تبديل كذا محطة وصلنا ل جارد دو ايست محطة القطارات
كلفت تذاكر كولمار تقريبا 1000 ريال لشخصين وطفلة
بصراحة تعبنا في القطار والمشوار تقريبا 5 ساعات نزلنا اولا في ستراسبورغ ثم اخدنا قطار تاني لكولمار مدته نصف ساعه
ولمن وصلنا اخدنا تاكسي ب 9 يورو للفندق و اسمه LE RAPP سعره حلو وموقعه حلو وسط القرية
جلسنا يومين في كولمار وبصراحة كثير عليها قلت ياريتني رحت بروكسل ولا بروج
يعني في يوم لفيناها كلها هيه حلوة حق يوم مو اكثر
باريس
طريق الرجعه لباريس كان اقصر بس 3 ساعات ووصلنا فندقنا في باريس عن طريق المترو 3 محطات مترو حتى وصلنا
كنا بشنطنا بس مو كثير الشنط انا شنطة وزوجي شنطة احجامها وسط وشنطتين ظهر
الدرج كان متعب شوية بصراحه لانو كان زوجي مسكين في كل درج يقابلنا يشيل الشنطتين في يده حقي وحقته
بس المهم وفرنا حق التكسي واشترينا باريس فيزيت ل 5 ايام واستفدنا منها من يوم وصولنا
نزلنا في Splendid Hôtel Tour Eiffel كان موقعه حلو قريب من برج ايفل يعني نشوفه من الشباك
وكلفنا اسبوع 1035 يورو تقريبا 3 نجوم ونظيف وقدامه مطعم هندي بس ماعجبنا مرة
باريس طبعا كل تنقلاتنا كانت بالمترو واخر يومين اخدنا برضو باريس فيزيت ليومين
حسيت باريس اسبوع كفاية جدا عليها يعني لو طولنا اكثر بنمل
وكمان كان الشانزليزيه فيه سوق الكريسماس مرة حلو بس رايحين جايين عليه رحت اللافاييت مرة ومول سيزونز
مرة بس لانو اصلا ماكان هدفنا تسوق ولا شراء
حصلنا موقف اخر يوم قبل السفر زوجي ضيع بطاقة المترو تبعه وقلنا حرام نشتري خلاص ماشيين الصباح
ودخلت انا وفتحتله باب الخروج الا يدق صوت زي الانذار بس خفيف طنشنا ومشينا
فجأأأأأأأأة بعد مانزلنا من المترو وجينا رايحين على مترو محطة فندقنا الا تفتيش على التذاكر
وسوينا نفسنا مضيعينها ودفعنا 40 يورو
وتاني يوم مشينا على المطار بسيارة حجزناها من الفندق بقيمة 70 يورو فان مرسيدس
كانت الرحلة على الخطوط السعودية ب 1800 للشخص بس الطيارة صغيرة لكن الخدمة والتعامل بصراحة ممتاز
من كاونتر المطار الى طاقم الرحلة وانا طول الوقت شايلة هم التاخير والتعامل اللي اسمع عنه
بس الحمدلله
ميزانيتنا للسفرة كلها تقريبا 30 الف ريال لمدة 13 يوم
وشكرا لكل الاعضاء بصراحة استفدت جدا من المواضيع اللي في المنتدى وباذن الله سفرتي القادمة
حانزل تقرير عنها كمان بس لسا باجهزلها برضو من مواضيعكم وتقاريركم
وسلامتكم