السلام عليكم ورحمة الله وبركاته
طبعاً انا اسف عن عدم وضع صور لان اكثرها خاصة لكن احاول افرزها
وارفع الباقي للمنتدى...
طبعا التقرير مش بالتفصيل لكن تعمدت انه يحتوي على الوقفات المهمه كي يستفيد
منها الاعضاء وابرز المواقف التي حصلت
مأدري من وين ابدأ بس خلونا نبدأ من أول ماطلعت الطائرة
الBmi وياشين الصدمة اول ماطلعت طبعاً يوم جلست
على المقعد ومالقيت شاشة التلفزيون وأفكر قلت معقول
ست ساعات على ذا الكرسي بدون ترفيه تذكرت خطوطنا السعودية
وقلت في نفسي لو دفعت الفرق كان عنديTV الحين
المهم كانت الخدمة طيبة مش بطالة والأكل المقدم كله حلال
وواحد من المضيفين كان يتكلم اللغة العربية(سياسة الشركة).
عشان لااظلمهم كان في شاشات في السقف يمكن
عددها أربعة يشوفوها جميع الركاب وطبعاً شغلوا فيلم أظن انه
من القرن الماضي!!!وجهة نظر.....
المهم بعد ست ساعات وصلنا هيثرو الساعة ستة
ونص الصباح بتوقيت لندن، نزلت ورحت لموظفين الهجرة
وهات ياتدقيق(ليه جاي....جاوبت سياحة،،،،تعرف احد
هنا.....جاوبت لا،،،،،لاصديق لاعائلة جاوبت برضه لا
قالوا عندك تذكرة رجوع لبلدك قلت نعم شافوها ارتاحوا!!!
قاموا يمرروا الجواز في الماسح الضوئي مو راضي يمسك
شكوا الانجليز انه مزور!!!وربك سلم مرت بنت سعودية
شافوا جوازاها رجعوا لجوازي المهم قلت جربوا الكمبيوتر
الثاني والحمد لله مشى الحال طلع الكمبيوتر خربان!!!!!
عاد لو ارتبكت كان رحت في غلطة لانه ياجماعة موظفين الهجرة في بريطانيا
دارسين اقوى برامج علم النفس ومش اي واحد يتوظف فيها يعرفوا الواحد من عينه......
بس الحمدلله كانت تساهيل
نزلت أخذت عفشي وعلى الاندرجرواند و على الشقة
طبعاً كان الاندرجرواند مليان بشر رايحين الدوام
بس والله كأنه مافي احد ولاصوت ولانفس اللي يقرأ في كتاب
واللي يقرأ صحيفة المترو…المهم وصلت الشقة ونوم
حتى العصر صحيت وعلى فين قولوا على فين
يبغالها كلام على Oxford Street.
طبعاً ياجماعه انا رحت بفيزا سياحية للأهداف التالية
إنهاء أوراق الماجستير والحصول على قبول..والحمدلله حصلت في أربعة جامعات.
اخذ دورة على الطاير ووضع شهادتها في ملفي في العمل
عشان تتزين الأمور ويمشي الحال....
لكن اللي لفت انتباهي إنه دامك مقيم في بريطانيا نظامياً
يمكنك الدراسة والعلاج الخ... ( ماهو شرط تحمل فيزا للطلاب عشان تدرس اهم شي الفلوس)
وصراحة لما كنت أشوف الأسعار من السعودية كانت نوعاً
ما غالية ايش نوعاً ما مرة غالية..
وتعالوا شوفوا والله رحت يمكن عشر كليات ومعاهد عشان أسجل
والكثير منها في ارقي المناطق في لندن وشوفوا الأسعار
كلية احتفظ بإسمها شهر ب 100 باوند واخرى
ب150 باوند.... خلاصة الكلام إنها رخيصة
وفوق كذا اتصالات أزعجوني يبوني أداوم
صراحة قررت بعدين ورحت Oxford House College في لندن في شارع
Oxford كلية محترمة ومشهورة وفرعها الثاني في مدينة اكسفورد
واخذت دورة 15 يوم ب 150باوند...
(غلطة العمر)
المهم
انه السنة ذي غلطت غلطة عمري في ذهابي للندن لأنه صراحة ياجماعة المدينة
ذي كثيرة عليها خمسة أيام...لأنه الحياة فيها مزعجة وزحام وقلق والشرطة في حالة
استنفار عل طول.....ندمت انه مارحت الأرياف حيث الهدوء والمراكز التجارية القريبة
منك والطبيعة الخ.....
طبعاً سكنت في حي جنوب شرق لندن ويوم من الأيام رايح البيت واحصل البوليس قي
مدخل العمارة....ايش عندك قلت رايح البيت بكل أدب قالوا ادخل وقفل الباب كويس
المهم طلعت واطالع من الشباك الا وهما ماسكين واحد بريطاني ساكن في الشقة اللي جنبنا
جوني الشباب قلت كذا وكذا حصل سأل واحد من الشباب الجيران قالوا متهم في قضية قتل
(أنا شعر رأسي وقف) وايش كمان قاتل اثنين من 10 ايام الظاهر انه تاجر مخدارت
أنا على طول قمت أفكر في بلدي والأمن والاستقرار.....
وفي يوم اخر ياجماعة وانا رايح الكلية
شايف التلفزيون والشرطة في حي قريب من الحي اللي ساكن فيه نسيت الموضوع رجعت البيت
شغلت التلفزيون إلا اشوف نفس الموقع تخيلوا ايش الموضوع برضه قتل والمقتول عمره
5سنة قتلوه اصحابه في الBus Stop انا عاد توترت لانه صراحة الوضع كان سئ واصوات
الدوريات على طول.... اليوم الثاني في الجرائد المقتول طلع عضو في عصابة سطو والخ....
خوفتكم وايش دخل ذا في منتدانا والساحة لا عشان يكون الواحد حذر يااحباب
قررت اروح خارج لندن ورحت صراحة وبأمانة والله حسيت اني في بريطانيا ترى لندن
ياجماعة لو تدققوا فيها مافيها شي بعض الأعضاء انا عارف ح يقولوا إني متناقض كيف
كنت تمدح فيها والان كارهها وراح ارد واقول مايلي:
1- حياة لندن صخب وزحام ومشاكل ومافي محل حلو للباحثين عن جمال الطبيعة والسياحة والخ.
2- لندن لو تبي تشتري شي لك يروح ثلاث ارباع الوقت وانت في المواصلات عكس الريف.
3- اسعارها جداً خيالية والله ياجماعة لدرجة انه بعض الاحيان احصل فرق في السعر من حي
الى آخر.
الذهاب إلى MARGATE وزيارة AIMAR
طبعاً اتجهت للاخ العزيز AIMAR وكان في Margate ساعة وخمسة واربعين دقيقة بالقطار
من لندن...
تقابلنا واللهم لاحسد ياملبورن كانت المدينة نوعاً ما!!!! طيبة صغيرة والمباني والنهضة العمرانية
مش اللي كنت متصورها بس عموماً كانت اهدى وافضل من لندن مدينة بحرية طبعاً
كان AIMAR الدليل السياحي ماقصر اخذنا لفة على Margate ومن محاسن الصدف كان
في استعراض للطيران البريطاني بمناسبة عيد ميلاد الملكة طبعاً حضرنا
وبعدها مشينا على مدينة ثانية هنا اتوقف عن الكتابة عشان لا احرق تقرير AIMAR ويزعل
علينا!!!!
المهم في الزيارة ذي انه تجددت النفسية من قلق لندن وضغط الحياة هناك
المدن الصغيرة ذات المناظر الطبيعية افضل مليون مرة من لندن سواء كانت
MARGATE او غيرها...........
التسوق في لندن( الحراج)
ومن محاسن الصدف رحت سوق شابردس بوش طبعاً هو حراج مثل بن قاسم في الرياض
والصواريخ في جدة....وشوفوا الأسعار ارخص من الرخيص
لا ومن اشوف هناك الباعة هناك أكثرهم مسلمين وعرب.....
والمتسوقين خليجيين( أنا خليجي وافتخر)....
طبعا انواع الاشياء ملابس ،،شنط،،عطورات،، تحف وكل شي لحد اني اخذت من بعض المحلات
ثلاث قمصان بعشرة باوند يابلاش.....عروض والملابس تستاهل لاتفتكروا انها مش طيبة
انصحكم فيه وحصلت واحد من الشباب من الكويت تعرفت عليه في السوق وتكلمنا
في موضوع الأسعار ورخصها ويقولي ترى الدعوى هدية من لندن خذ من هنا
وخل عنك الباقي ترى الخليجين اكثر هداياهم من السوق ذا وبعضهم يأخذ ويتاجر
في بلده يبيع على اصحابه وإن سألوه قال شاريها من لندن !!!!!مادروا انها من الحراج
ملاحظة((باص رقم 94 من Oxford Street يوصلك للحراج)) عشر دقائق الى 15
دقيقة على الباص ذا.... وترجع معاه.
(شارع العرب)
ألان بأكلمكم عن شارع العرب وأسعاره ترى والله العظيم الأسعار هناك مبالغ فيها جداً
أنصحكم ياجماعة أي شي تبونه اشتروه من خارج الشارع إلا وقت انك مضطر
أي شي تبيه لاتفكر لو حتى هدية انا عندي معارف هناك وعندهم تجارة ومشاريع في الشارع
وبعضهم عايش هناك من سنين جميعهم يحزنوا على السياح العرب ترى ياجماعة
وصلت الامور الى حد الاستغفال وان الخليجي ثري وعادي عنده يأكل طبق تكلفته 50 بنس
ب 10 باوند.!!!!!
وعلى فكرة الخليجيين مايدخلوا بلد الى يرفعوا الاسعار فوق والتاريخ يشهد..
زيارةHastings
والان نتجه للجنوب الغربي من بريطانيا واكلمكم عن Hastings
طبعاً تعتبر من المدن الساحلية مدينة صغيرة تجمع بين البحر بعد برايتون
والجبل اقمت فيها العام الماضي لمدة شهر ونصف
والسنة ذي زرتها لوجود بعض الأصدقاء القدامى فيها وزيارة العائلة التي أقمت
معها العام الماضي
لاحظت بعض التجديدات واخص بالكلام أبو صقر ترى تطورت شوي يأبو صقر
ماهي على خبرك واحد الاخوان السعوديين افتتح مقهى جيد يقدم الشاي والمعسلات الخ
صراحة يوم رحتها زاد كرهي للندن المدينة مرة جميلة وأهلها طيبين وتشتهر بالسياح خاصة
من أوروبا لصغرها وجمالها وأسعار الخدمات المعقولة والمنطقية سواء من فنادق وتسوق والخ.
المدينة تبعد عن لندن بالقطار ساعتين من محطة Victoria بلندن....
طبعاً سبحان الله ماكان اودي ارجع لندن بعد ماوصلت صراحة تغيرت حالتي 360درجة لازحام لامشاكل
ومناظر الطبيعة والمسطحات الخضراء الخ... بس ماباليد حيلة وقع الفاس بالراس
(انصح السياح العرب بزيارتها).....
مدينة جميلة وصغيرة وكل شي متوفر فيها مسجد واكل حلال انصحكم زوروها.
(للطلاب العرب)
كلام موجه للاخوة الراغبين في دراسة اللغة
الكثير من الاخوة يبحث عن معهد او كلية لايوجد بها طلاب عرب
وانا اقول ياجماعة من تجربة مستحيل ان تذهب للدراسة في بريطانيا
من غير ان تواجه او تقابل طالب عربي في نفس الكلية او المعهد
واكاد اتحدى (إن شاء الله مانتوهق) يستحيل ان تذهب الى أي مدينة للدراسة
بدون وجود طلاب عرب بها....
ياجماعة هل نعتبرها شي إيجابي او سلبي......
من وجهة نظري الخاصة اشوفها إيجابية إذا كانت علاقة ترتكز
على الاحترام وإدراك الهدف الذي سافرت وتغربت من أجله لانه مش منطق
تسافر على بلد لاتجد فيه من يساعدك او يقف معك في ظرف ما لاقدر الله
لان حياتنا وعاداتنا الإسلامية والاجتماعية تفرض علينا مساعدة الاخرين
وتكوين صداقات الخ....
وبالنسبة للانجليز العكس لو تنضرب قدام عيونهم في الشارع مافي
احد سائل عنك .
والخلاصة اللي يبي الفائدة راح يحصلها سواء بوجود طلاب عرب
او بدونهم...
وكثير من النوابغ من حملة الشهادات العليا بيتفاخروا بوجود
طرب عرب معاهم ويذكروهم في كل مناسبة....
والى الان العلاقات فيما بينهم قائمة الى الان ....
(العودة إلى جدة)
طبعاً بعد خمسة وعشرين يوم وصلت معي ابي ارجع اشتقت للسعودية وحياة السهر للصباح والبحر
وصوت الآذان.
والحر عاد يوم بدأ لندن ماعاد تسوى شي بنظري....
وكان باقي على الرحلة اسبوعين شفت خطوط رحلات BMi في الانترنت وحصلت امكانية
(ذا ازين شي فيها أي رحلة تحصل مقعد)
رتبت العفش وقلت امشي الثلاثاء ترددت والشباب مسكوا فيني الا اقعد قلنا نرضيكم ليه لا
اجلت الرحلة الى الخميس ومع الصباح على المطار عاد دفعوني الBMI
0باوند أجور تغيير الحجز دفعت والله لو يطلبوا 100 أهم شي ارجع السعودية(وطني الحبيب ولن أحب سواه)
الله يرحمك ياطلال مداح.
طبعا اقلعت الرحلة هناك الساعة التاسعة والنصف الصباح...
وكنت اشك انه نفس الطائرة الظاهر مافي إلا هي برضه مافي TV
وكان الطفش عامل عمايله مواصل وحالة كانت.....
الرحلة ماكان عليها زحمة اكثرهم بريطانيين يرغبون في العمرة وزيارة مسجد الرسول صلى الله عليه وسلم..
وصلت السعودية الساعة الخامسة والنصف بالتوقيت المحلي...
وكان في استقبالي بعض الأصحاب المهم اول ماطلعت السيارة ضحكت وابتسمت وتطمنت
إني رجعت لصوت المكيفات
الواحد بدون مكيف مثل ال Wallet بدون Money!!!!!
تحياتي ولدي بعض الوقفات عن كأس العالم هناك وبعض التعليقات الاخرى..لاحقاً