أتمنى من الأخوة المشرفين / الأعضاء مساعدتي
قاعد احاول احمل الصور مع الموضوع بس للأسف ما عرفت طريقة تحميل الصور .. وانا عندي مجموعة لا بأس فيها من الصور عن كيرالا
انتظر منكم الرد عشان اكمل تقرير
ولكم فائق الشكر والاحترام

عندي عدد صور كبير ومعظهما انا اخذته بتليفون نوكيا e66 واحجامهم بال 260 كيلوبايت .. حاولت استخدم الفوتوشوب عشان اصغر حجمهم .. واصغر حجم حصلت عليه هو بمعدل 150 كيلو بايت بعد ما اختار الlow quality لملفات jpeg
الي عنده طريقة اقدر اصغر حجم الصور عشان اقدر احملهم اكون شاكرله

تصغير الصور ببرنامج VSO Image Resizer
انسخ الجمله بالأعلى وابحث عنها في قوقل

ابو راشد التميمي
مشكور يا بو راشد وما قصرت

الجزء الثاني
تقرير الرحلة
توجهنا يوم الجمعة الى مطار دبي, والحمدلله وصلني قبل وقت كافي وكانت إجراءات تسليم العفش واستلام بطاقة صعود الطائرة سهلة جدا وما تأخرنا والحمدلله
أقلعت الطائرة في الوقت المحدد ووصلنا والحمدلله الى بمومباي وكان المنظر رائع من الطائرة
طبعا ما نسينا نعبي كروت الدخول الي وزعوها علينا بالطائرة عشان نختصر الوقت عند شبابيك الجوازات
وكان اجاراءات ختم الجوازات مقبولة ..كنت اتوقعها أسرع ولكن الحمدلله مشت الأمور .. واستلمنا العفش .. وانا كنت جايب معاي هدايا بسيطة للمشاركين معانا بالدورة التدريبية .. وكلها شغلات ما تسوى بس مغلفينها بكارتون كنت جايبة معاي بالشحن
المهم واحنا طالعين المفتش نادى مظفين الجمارك وأخروني كثير وطلبوا جمرك بالأول ولما رفضت آخر شي مشوني .. والظاهر ان كان قصدهم شي انا ما فهمته الا لما طلعت والحمدلله اني ما فهمت ..لوول
على كل حال كانت بومباي مدينة حلوة ومتطورة .. طبعا الزحمة وإختلاف طبقات المجتمع يلعب دور كبير .. ولكن بشكل عام كانت حلوة
واحنا مع الأسف كان معظم وقتنا مشغلوين بالدورة فما صار عندنا مجال نشوف المدينة عدل .. غير آخر ليلة الي طلعنا فيها عشان نتعشى .. وبالطريق قعد صديقنا الي معانا يلف فينا بكثير مكانات ومنها المارينا درايف وشفنا بوابة فكتوريا ومحطة القطار القديمة وبصراحة كانت كلها تحف معمارية
وشفنا فندق قريب من بوابة فكتوريا .. كانت دكيوراته رائعة من برا .. يقولنا صديقنا ان منهدس هذا الفندق كان برا ودز التصاميم للهند عشان يبنون الفندق ولما أجا يزور الهند بالمراحل الأخيرة من البناء .. أكتشف انهم بانين الفندق بالعكس .. يعني المدخل الرئيسي للفندق صاير باتجاه الي المفروض يكون فيه ظهر الفندق والعكس صحيح .. وما تحمل خيبة الأمل لأنه كان يعتبر هالفندق مشروع عمره .. فأنتحر من شدة الصدمة !!
هذا الكلام على ذمة الراوي والله أعلم .. بس انا عجبني الفندق ..كان راقي جدا
وفي يوم الأثنين .. كملنا إجراءات الخروج من الفندق .. واتجهنا الى مطار مومباي للرحلات الداخلية .. وصلنا للمطار قبل فترة كافية .. وأتمننا الإجراءات على خير والحمدلله .. ولكني لاحظت أن في جفاف بالتعامل مع المسافرين بشكل عام ومعي من ضمنهم .. وهذا الشئ غريب على بلد إذا كانت تهتم بالسياحة .. وأنا كنت أقارن مع تعامل موظفين الجمارك والجوازات في ماليزيا واللي كانوا بصراحة قمة بالأدب والإحترام.
على كل وصلنا كيرالا وأنا كان عندي تصور عن المكان من سوالف الناس ومن التقارير الي قريتها بالمنتدى ولكن السمع مو مثل الشوف .. كانت منظر الخضار والماي والجبال أكثر من رائع وسبحان الخالق في ما أبدع ... اللهم أرزقنا الجنة يارب العالمين
المهم .. وصلنا والحمدلله .. وكان واحد من الموظفين ماخذ اجازة بهالفترة وزاير اهله بكيرالا .. ولما سمع ان حنا جايين .. اصر انه يستقبلنا بالمطار ويجيبلنا تكسي بمعرفته .. وفعلا لقيناه وطلبنا منه يوصلنا لمونار للفندق الي المفروض ننزل فيه أول يوم .. ولكنه أصر أن حنا نزور بيته أول شي .. والمشكلة انه بيته بعكس اتجاه مونار حسب ما فهمت لانه ساكن في ألبي وبعد نقاش ..توكلنا على الله ورحنا زرنا بيتهم .. المناظر طبعا أكثر من رائعة .. كانت الطريق كله قرى ومافيه شي يجذب غير الأشجار والخضار اللي على مد النظر
https://artravelers.com
يتبع ان شاءالله

وصلنا بيت الرجال وأكرمنا .. وقررنا نمشي ..ولكن للأسف ما كان في مكان في منطقتهم "ألبي" يسوى السكن فيه .. فقررنا نشوف الهاوس بوت او المنزل المائي ,, وطبعا حنا خلاص ما في أمل نوصل مونار لان عن كلام السايق يبيلنا 5 ساعات من المنطقة الي كنا فيها الى الفندق الي حاجزينه فقررنا نلغي الحجز وخرب الجدول .. بس قلنا لعلها خيرة ورحنا لمكان في البي عشان نأجر المنزل المائي وكان صاحبنا الهندي يحاول يشوفلنا ربعه على اساس يدارونا بالاسعار والخدمة واجا واحد منهم واخذنا لمكان استئجار القوارب .. وكانوا في كثير ... بس لما شفنا القارب ومستواه بصراحة مو نفس الي شفته بالمنتدى وكان يطلب أسعار غالية .. وحنا طلبنا ان نستأجر القارب ويوصلنا لمنتجع الكوكونت لاجون في كوماراكوم .. بس قالوا ما يقدر يطلع القارب الحين وكان الوقت مغرب ..قالوا هذي فترة الصيد .. فغيرنا الخطة .. قلنا نقضي الليلة بالقارب وثاني يوم الصبح يوصلنا المنتجع ووافقوا .. بس طلبوا اسعار عالية .. وانا حسيت ان الرجال الي جاي معانا يساعدنا هو الي قاعد يرفع الاسعار علينا .. لان لما نسأل أصحاب المركب يقولك سعر ولما يجي صاحبنا يغيرون .. فتركنا الفكرة كلها .. سبحان الله ما ارتحنا
ورجنا لسواقنا .. وقلناله وصلنا كوماراكم وطلعت المسافة اساسا مو بعيدة واخذت معانا حوالي الساعة وماشاءالله بدت تمطر وكانت المناظر عجيبة بين الأشجار والمطر
وصلنا للمنزل القوارب الخاص بمنتجع الكوكونت لاجوون .. واتصلنا بالاستقبال وقلنالهم ان حنا وصلنا قبل الموعد المتوقع وقالوا ما عليه حياكم الله (بالهندي لوول)
المهم والله كان استقبالهم اكثر من ممتاز .. في حرارة واهتمام ممتازين جدا .. والمنتجع مبين عليه انه راقي
جابولنا عصير جوز الهند على ما رتبوا الكوخ الي حاجزينه .. وبعد ما كملوا الإجراءات قالوا تفضلوا لغرفتكم .. بس الغريب ما طلبوا منا شي تحت الحساب ولا كردت كارد ولا شي !! فسألناهم شالسالفة ..قالوا انتوا الحين تعبانين من الطريق ,, روحوا ارتاحوا الحين والصبح يصير خير .. فوالله كانت حركة حلوة منهم ,, وعطيناهم الكردت كارد وقلنا اخذوا اجار يومين مقدم ونشوف بعدين شالله يسهل.
وبطريقنا للكوخ كان المشي سياحة بروحة لان المناظر حلوة والمكان نظامة أكواخ متباعدة وممرات مائية وحدايق ونخل جوز الهند وأشجار وروعة, الواحد يحس نفسه ضايع بغابة ولقى ناس مرتبين (لوول)

وصلنا الكوخ كان أحسن مما كنت اتوقع من الترتيب والنظافة .. بس كانت تنقص بعض المستلزمات الي بالعادة تتوفر بالفنادق الخمس نجوم .. ولكن بغض النظر عن هالامور كان كلشي حلو وخصوصا أعزكم الله الحمام الي سقفة مفتوح ... شي عجيب
تعشينا ببوفيه الفندق لان ما كان فينا حيل نطلع وقعدنا نشوف الورقة الي عطونا اياها اول ما وصلنا واللي كان فيها مجموعة الخدمات والرحلات الترفيهية الموجودة عندهم وفي منها مجاني مع الغرفة وفي منها مدفوع وأوقات الرحلات .. وكان والله جدولهم ممتاز يعني تستغل يومك كله وما تلحق اصلا تطلع من الفندق ..
بالطريق من المطعم .. مرينا على غرفة التلفزيون (لان الغرف ما فيها تلفزيون) وكان فيها بعض الالعاب الترفيهية مثل الكيرم وطالة تنس وكم شغلة .. ولعبنا تنس طاولة شوي .. وردينا غرفتنا ونمنا مبكر عقب التعب وعشان نستعد لليوم الي وراه
ثاني يوم, أصبحنا على خير والحمدلله ورحنا لبوفيه الفطور .. كان البوفيه لا بأس فيه كتنوع وطعم الأكل .. بس المنظر كان ينسيك كل حواسك ويخليك ما تحس الا بعظمة الرحمن سبحانه وتعالى
خلصنا ورحنا لجولة بالفندق والي اكتشفنا ان فيه شغلات كثيرة .. وبعدين سوينا مساج بمركز الطب بالأعشاب التابع لهم ... وعقبها رحنا صلينا ورجعنا ركبنا قارب الي اخذنا بجولة بالممرات النهرية الصغيرة واللي يسمونها "باك ووتر" وكانت المناظر خيا اال تجمع بين بساطة الأماكن وروعة الطبيعة .. وما تسمع غير اصوات الطيور .. شي انصح اي احد يزور كيرالا انه ما يطوف هالرحلة ..
وطبعا كانت الأمطار تصب بين فترة وفترة والناس مستغربين لانهم يقولون انه مو موسم المطر الحين !! بس حنا مستانسين ونعتبره ان من حضنا كان في مطر

ردينا من رحلتنا وبدينا نجوع وملينا من الفندق الي ما طلعنا منه من وقت الي وصلنا بالليل .. فقررنا نطلع نتغدا برا .. وجابولنا قارب يوصلنا لمحطة النزول .. وتمشينا شوي وكنا شايفين منتج تابع لمجموعة فنادق "تاج " ورحنا نتغدى عندهم .. بس كان المدخل والاستقبال والمناظر احلى وارقى من كوكونت لاجوون .. وبصراحة مبين عليه خمس نجوم وسألنا بالاستقبال عن الغرف
والأسعار فعرض انه ياخذنا ونشوف الأكواخ بنفسنا, بس قلنا نتغدا بالأول وبعدين نشوف الغرف.
https://artravelers.com
وكان المطعم حلو ويطل عالبحيرة الرئيسية بالفندق .. والأكل كان جيد والخدمة ممتازة .. وبعد ما خلصنا كانوا محضرين لنا سيارة الغولف الصغيرة وأخذنا المسئول ولف فينا على 3 أنواع من الأكواخ
1 – العادي – نفس الي احنا حجزناه بالكوكونت لاجون .. بس مستواه أرقى شوي وأحدث
2 – الفيلا – مساحتها أكبر وديكوراتها حلوة
3 – الفيلا مع مسبح داخلي – وهذي كانت روعة من ناحية المساحة والديكورات ومكانها بالنسبة للمنتجع والشغلات التابعة لها والخدمات الي تشملها.
بعد ما حجزناها ردينا للكوكونت وريحنا شوي وطلعنا عشان نلحق على رحلة غروب الشمس المجانية الي ينظمها الفندق لكل ساكن من ضمن اجار الغرفة .. وكان في مجموعة معانا معظمهم عوائل هندية .. بالقارب كان معانا مرشد سياحي يشرحلنا عن كل شي نمر عليه وكان معانا شايب هندي مع ناي يعزف عليه .. وكنا نتمشى على الراحة لحد ما وقف القارب بنص البحيرة وطفى المحرك وصار هدوء وما تسمع غير صوت العصافير وصوت الناي
وردينا بالليل .. رحنا مسبح الفندق وسبحنا شوي وتمشينا ... وردينا الكوخ عشان ننام ونستعد لليوم الي بعده
وفعلا باليوم الي بعده اصبحنا على خير والحمدلله وفطرنا بالفندق وقلنالهم اننا بنطلع وانا مريت غرفة الانترنت لان ما في انترنت غير بالاستقبال .. المهم خلصنا امورنا واتصلنا بصاحبنا من فندق الفيفانتا من تاج وقلناله تعالنا عند مرسى القوارب الخاص بالكوكونت لاجوون.. وفعلا وصلنا المرسى ولقينا سيارة تنتظرنا اخذتنا حنا واغراضنا ورحنا للفندق وكان كلشي روعة
وأول ما وصلنا نزلنا المسبح وهات يا سباحة ..... وشوي والا الدنيا تصب مطر ما شاءالله مطر قوي وما يوقف
خلال اليومين الي قعدناهم بكيرالا كان في امطار واحيانا تكون قوية بس مو لهالدرجة والحمدلله .. وعلى كثر ما كان المطر حلو بس مع الأسف اضطرينا نقعد بالغرفة ومانطلع طول اليوم .. والأنترنت موجود بالغرف بس المشكلة انه مو مجاني ولازم ندفع عليه ..