- بسم الله الرحمن الرحيم ..
- الوصول كان ل مطار ميامي ... و تبدأ المعاناة ..
- و تراهم متساعدين جدا ً .. بس خلك صادق معهم .. برد اعصابك ع الآخر
بسم الله الرحمن الرحيم ..
في البداية أحب أن أشكر المنتدى و القائمين عليه من مشرفين و اعضاء .. لأن الجميع ماقصرو من نصائح و تقارير مفيده جدا ً جدا ً جدا ً ..
و من رد الجميل ل هذا المنتدى حبيت اكتب لكم ملخص بسيط وان شاء الله ارفق فيه بعض الصور ل رحلتي و سيكون ملخصي عبارة عن نقاط بذكر كل ما جاء فيها نقطه نقطه و إن شاء الله راح يكون مفيد ل جميع المبتدئين في السفر ل امريكا لأنها أول رحلة لي ..
- بصراحة فكرت بالسفر ل امريكا بعد ما قصيت 6 سنوات دراسة جامعية و حبيت اجل هالرحله مكافئة للمجهود الي بذلته في هذه السنوات و كان القرار ل امريكا لوجود صديق لي هناك سعودي
- الرحله كانت بتاريخ 27 / 1 إلى 18 /1 .. 20 يوم بالتمام .. وشملت فلوريدا - واشنطن - نيويورك
- مصروفي 5000 ريال سعودي .. تقريبا ً 1300 دولار .. طبعا ً جلست في منزل صديقي اغلب الرحله ع شان كذا ما تكلفت الكثير لان السكن و المواصلات موجوده .. مع اني دفعت حق البنزين هناك لانه غالي جدا ً و الجالون ب 3 دولار تقريبا ً
- الطيران كان عن طريق الخطوط البريطانية .. البرتش ايروايز .. تكلفة التذكرة ب 3800 ريال .. ترانزيت عن طريق لندن 3 ساعات ..
تقيمي للطيران 8 / 10 .. رائع بكل شي الوقت و التعامل و كل شي .. بس الشي السيء جدا ً .. الضيق .. ضيق جدا ً جدا ً مافيه أي مساحة و المقاعد صغير .. تعذبت 19 ساعة
بالعوده كانت طيارتي ع الامريكان ايرلان .. وكانت المقاعد وسيعه و اكبر و اريح ..!!
فهذي المشكلة الي كانت ب البرتش فقط .. و راح يكون درس لي اني ما راح اسافر الا ع الدرجة الاولى او رجال الاعمال لانها مغريه جدا
الوصول كان ل مطار ميامي ... و تبدأ المعاناة ..
الطابور كان قصير ل كبينة الجوازات و لغتي الانجليزية ضعيفه .. سألني ليش جاي .. و كم بتجلس و من وين لك فلوس اذا بتجلس هنا ..جاوبته وشكله ما اقتنع و انا صراحة ارتبكت قليلا ً .. ف اخذ اوراقي و حطها بملف اصفر .. هنا بلعت ريقي و دريت اني جبت العيد ..
و وداني ل حجره كبيرة لها و فيها الكثير ينتظرون .. هنا ارتحت وقلت مو لحالي انتظرت لمدة 3 ساعات تقريبا ً ولا احد ناداني و الناس تجي و تمشي وانا جالس .. بعدين شفته ماسك جوازي الاخضر وعرفت انه انا لاني انا الوحيد السعودي .. ف قلت ارفع راسك انت سعودي ..
وشفتهم يسولفون و يشاورون بعض .. دريت ان السالفة بس تأخير نذاله فقط .. ف ضبطت اعصابي لانهم منرفزين .. خصوصا ً إن الموظفين من اصول لاتينيه بعدين ناداني .. والموظف واضح انه صاحب لكاعه ( يعني يبي ينرفزني و يتعبني )
و أروح معه و تخيلو اسئلته فقط ..
ليش جاي ؟ و كم يوم ؟ و من وين لك فلوس ؟
وين كنت تدرس ؟ وش اسم مدرستك الثانوية ؟ و اي جامعة انت ؟ و متى تخرجت ؟ و وين بتسكن بأمريكا ؟ وش اسم امك و ابوك و ين مكان ميلادهم و تاريخ ميلادهم ؟ هل تدربت مع الجيش او على تمارين دفاعيه و اسلحه ؟
المهم جلسنا على هالإسئلة مدة ساعة كاملة بعد رحلة 19 ساعة
بعد اربع ساعات فك اسري و ختم اوراقي وقالي ان هالإجراءات ضروريه لانك اول مره تجي ولازم تعرف كل شي و لكل دولة قوانينها ... و طلعت و ما اخذت 5 دقايق لا وانا برى المطار و صديقي بإنتظاري
لكن بكل امانه مع اني جلست 4 ساعات بس تعاملهم صراحة قمة بالأخلاق و شتان بين اخلاق موظيفنا و موظيفنهم
- نصيحة لكل شخص اول مره يسافر .. اضبط اعصابك و نفسك و خلك طبيعي تمشي امورك .. بس انا لغتي ضعيفه و اتربكت في بعض الاسئلة و من حقه يأخرني و يسألوني كل هالاسئلة
و تراهم متساعدين جدا ً .. بس خلك صادق معهم .. برد اعصابك ع الآخر
- طلعت من المطار و اخذنا فرره في ميامي شفنا اهم المعالم .. واتجهنا ل ميلبورن .
- اقامتي كانت في فلوريدا مدينة ميلبورن الصغيرة الجميلة .. تبعد ساعة عن اورلاندو و ساعتين عن ميامي .
- اغلب الايام كنا نروح اورلاندو بما انها مدينه سياحيه و المولات فيها كبيرة وجميل ..
- الأماكن الي زرتنها في اورلاندو : 1- اليونيفرسال ( مدينه ترفيهيه خيالية بمعنى الكلمه ) و كانت التذكرة ب 200 دولار تقريبا ً ل يوم واحد .. و تستاهل صراحة .. وانصح الجميع اخذ التذكرة الإكسبريس لانه تدخلك الألعاب من طابور خاص بالإكسيبرس لان الانتظار بالعادي تجلس 20 دقيقة إلى نصف ساعة .. حنا بعدين شرينا تذكرة الإكسيبرس ب 60 دولار تقريبا ً إذا ما خانتني الذاكرة ..
2- فلوريدا مول .. وصراحة المجمع هذا عادي .. لكن لا يمنع زيارته
3- المالينا مول .. مجمع رائع جدا ً جدا ً .. و كل الماركات فيه ومش كبير مره بس ممتاز جدا ً و حلو .. وفيه مطعم تشيز كيك فاكتوري
4- ديزني داون تاون .. رائع جدا ً و فيه مطاعم و كافيها محلات هدايا و عروض حلوه .. أنصح بشده زيارته ..
5- داون تاون اورلاندو .. فيه بحيره رومانسية جميلة جدا ً .. للي متهاوش مع زوجته يروح هناك و صدقني يتراضون ع طول خ
6- شارع الانترناشونال درايف .. فيه محلات و العاب و ملاهي و البيت المقلوب .. شارع جميل من اهم معالم اورلاندو لابد زيارته ..
7- الاوت لت .. ب اورلاندو فيه 2 اوت لت .. فيه بعض الماركات غير موجوده بالآوت لت الثاني .. ف انصح بزيارة الإثنين ع شان الواحد ما يتحسف خ .. و بصراحة .. أرخص شي بالآوت لت .. العطور ف أرجوا من الي بيروح لا يوفر و يشتري كميات كبيرة لانها ارخص من هنا بكيثر أقل من 50 %
تقريبا ً هذه الأماكن الي زرتها في اورلاندو
نلتقي في الجزء الثاني بإذن الله
