السلام عليكم ورحمة الله وبركاته ..
مساء البارحة عدت من الكويت وقضيت ليلة ونصف كانت جميلة و ( متعبه ) كذلك
طبعا
صحيت الساعه 9 صباح يوم الاحد ( مانمت الا 2 ) اخذت الشنطه وكنت جاهز ولله الحمد عدا ( التحويل المبالغ الى الدينار الكويتي )
فقررت اني امر البنوك واخذ الفلوس وعلى الخط الى الكويت
طبعا ساعه كامله او تزيد فريت خمسة بنوك ولا عندها تحويل يا سلالالالالام
تصدقون بغيت اكنسل الرحله بكبرها
بالاخير حصلت محل صرافه
وحولت 1500 ريال الى دينار كويتي واخذ علي الدينار ب 13.3 .. وش رايكم كذب علي ولا لا ؟؟
وصلت على 2 الظهر وسكنت بفندق أيبس على شارع سالم المبارك الليلة ب 30 دينار بعد بحث متواصل قرابة الساعه الكامله
الفندق نظيف موقعه ممتاز جدا يعيبه المواقف
ويعيبه صغر حجم الغرف مثل ما ذكروا لي الاخوان
يوجد به واير لس مفتوح
والقنوات للاسف بس 32 قناه ليش مدري
طبعا النوم كان هو مشكلتي فما نمت تمام وهذا اللي لخبط رحلتي بصراحه
ولا انسى لفتي لخمسة بنوك كما ذكرت
وصلت دايخ للغرفه
بس جو الكويت كان روعه بحكم اطلالة الغرفه على شارع الخليج
ذهبت للمارينا على المغرب ادور لي مطعم وبصراحه ما جاز لي شيء
واعجبني الجسر المعلق على امتداد شارع العرب
رحت بعدها لسوق شرق وعلى ماكدونالدز
بعدها للشقه
نمت ساعتين وصحيت بس قبلها دق باب الغرفه واحد من العاملين بالفندق وكنت على بداية النومه وخربها من جد
رحت الابراج جلست لي ساعه تقريبا وبعدها رجعت للغرفه
ولا جاني النوم بس دايخ
وشلون فسروها
طبعا شفت لي فلم ب سوبر موفيز ولا فيه فايده
طلع النور ورحت لشارع المطاعم واخذتي لي وجبه من كوردو مو كودو
ورجعت نمت ساعتين
ثم رحت ل المركز العلمي ماطولت فيه
والفيشه اللي ماعرفت معناتها من المصري البواب الله يهديه
بعدها رحت للافينوز وطوالي على السينما
اخذت فلم اسمه 7 باوند لممثل معروف مدري شنو اسمه
بس ع فكره الفلم بايخ
ولفت انتباهي ان سعر الفلم ب 3 دينار وسوق شرق ب 1.5 ليش
بعدها رجعت لفندق اسوي شيك اوت واخذ التامين تبعي 10 دينار
رحت بعدها اتغدى على الساعه 4 في ميس الغانم وكان زحمه بصراحه
طلبت لي مشاوي على حمص رز ( وشلون تجي مدري )
وانا طالع كان الجو عاصف وهواء شديد ( وش رايكم بالجمله متعوب عليها )
المطعم بشكل عام راقي ونظيف والاكل اعطيه 7/10 .. بكيفي اقيم على مزاجي
بعدها
حبيت ازور اقاربي ب ضاحية صباح السالم
ومسكت طرق الين وصلت الضاحيه لكن انا جيتها بطريق الملك عبدالعزيز وضيعت وطلعت منها وامسك هالخط الين وصلت للفحيحيل وقفلت معي لاني قربت من المنفذ
واسأل واحد قال طريق الملك فهد بالجهه الثانيه واروح له وارجع للضاحيه
جلست قرابة الساعه
وتوكلت على الله الى السعوديه وكان الجو غبار وخطر بصراحه ..
وبكذا انتهت هالرحله
=============
===========
شكر خاص جدا لموقع العرب المسافرون وخاصة بوابة الكويت اللي والله ما قصروا معي من خلال موضوعي اللي كتبته وبالاخص المشرف ضاري والاخت نوره ( اعتقد هذا اسمها والله ناسي )
فكل ما الاقي شيء اتذكر هالموقع فالف شكر لكم
=============
=============
موقف مضحك ..
طبعا انا من الناس اللي يحب شيء اسمه مانجو
وعلى شارع الخليج كنت من اول ليله امر على لوحه مكتوب عليها فريش مانجو ( اعتقد هذا اسمه )
وقلت لازم امره
ويوم قربت منه
بالاخير طلع
قهوه ومعسل اعتقد
تحطيم صح
===============
============
ادري ان التقرير كثير كلامه ولا له سنع بس تحملوني
وكان ودي اصور بصراحه لكن غلطتي ما جبت لي كاميرا فهي والله مهمه وقبل كذا لا عاد احد يسافر وهو ما نام
=====
===========
مع السلامه