السلام عليكم ورحمة الله وبركاته
اخواني اعضاء منتدى العرب المسافرون حبيت اشارك معكم تجربتي في رحلتي الى سريلانكا مع شركة تعاقدت معها اسمها
(Great Vacations) قريت فكيشنز لصاحبها (كريس ارنولدا)
بداية الامر فكرت اني اختار شركة مو معروفه ومنتشره بين العرب هنا بالمنتدى خاصة ان الاغلب يتعاملون مع شركات معينه تنعد على الاصابع وناس تمدح وناس تسب في هالشركات
فقلت يلا يمكن اطلع لي بشركة جديده وتحاول تجذب زباين عربيين فتسوي اللي تقدر عليه عشان نكون مرتاحين
فقمت ومسكت القائمة حقت الشركات اللي معتمده من وزارة السياحه السريلانكيه اللي موجود هنا بالمنتدى وراسلت فوق العشرين شركة وبعضهم ردو علي وبعضهم لا
وطحت بهالشركة (great vacations) اللي كان سعرها معقول نوعا ما وهو نفس السعر اللي اعطتني اياه شركة اير وينق
وفنادقنا هي : رمادا كولومبو- كلوب دولفين نيقمبو - ليلتين هوناس فولز- ثيفا كاندي- ليلتين شاليهات قفرنورز بنورليا- ليلتين بنتوته بيتش- كازا كولمبو كلهم مع فطور
وسعرنا شامل المواصلات لاي مكان نبيه والسواق يكون معنا 24 ساعه والبنزين والمصاريف حقت السيارة كلها عليه وأكدنا على هالشي اكثر من مره, وأنا السواق يتكلم عربي,ويكون مرشدا سياحيا.
اسم صاحب الشركة كريس ارنولدا وهو اللي يرد علينا بالايميل كان جدا متجاوب معنا ويرد علينا بنفس اليوم اللي نراسله فيه
طلب مننا تحويل ربع المبلغ عشان يبدا يحجز وحولنا له وطلبنا منه الفاوتشرات حقت الحجوزات وصار كل يومين او ثلاثه يرسل لنا حجز واحد
لحد ما بقا حجزين اللي هم شاليهات قفرنورز وبنتوته بيتش
ارسلنا له نطلب منه التاكيد حق هالفندقين وما رد علينا
انتظرناه اسبوع اسبوعين وما رد
بالاخير قررت ادق عليه.. ودقيت عليه ورد علي وسألته وين الحجزين قال معليش النت عندي فيه مشكله وانا مشغول هالايام بس الحين اول ما تقفل برسل لك التأكيد قلت له طيب اشوف
وقفلت منه وانتظرت يوم يومين وما ارسل
واضفته عندي بالسكايب وتطلع لي صورته عاد هنا انا ضاق صدري
حاط وراه علم اسرائيل
قفلت بنفسي يلا دامني دفعت له المقدم وتعاقدت معاه خليني اكمل خاصة انه مسيحي مو يهودي فلا اشغل بالي بهالعلم
وبالاخير قررت ادق على الشاليهات بنفسي واشوف اذا جد حاجز لنا ولا اتهاوش معاه
ودقيت وسالتهم عن الحجز وقال لي تونا دقينا على صاحب الشركه وقلنا له ان الحجز تأكد
قلت زين وقلت بنفسي مو لازم ادق على الفندق الثاني شكله صادق
المشكله الاولى:
جا موعد رحلتنا ووصلنا مطار سريلانكا وخلصنا اغراضنا وصرفنا وطلعنا صالة الانتظار ولقينا واحد شايل لوحه باسمي رحت لمه على بالي انه سواقنا
طلع هو صاحب الشركه اللي نراسله
سالته وين السواق
قال يوصل عايله سعوديه وبيجي بكرا لكم وانا اليوم بوصلكم اي مكان تبون قلنا زين
ودانا الفندق وطلب مننا ندفع له باقي المبلغ قلنا طيب وين العقد قال باللاب توب
قلت لا ما ينفع لازم يكون مطبوع ومختوم من المكتب قال حنا ما عندنا ختم بس توقيعي
قلت طيب ابيه يكون مطبوع وتوقع بخط يدك قال لي ما يحتاج انا دايم اودي اوروبيين وما عمرهم طلبو مني عقدهنا انا قلت اوماا !! اوروبيين وما ياخذون عقد !! كثر لي منها !! ابي عقد مطبوع وموقع بخط يدك واثبات ان عندك مكتب وبعدها اعطيك الفلوس