1. برنامج الرحلة :


2. كل المنتجعين ما فيها تلفزيون .


3. اليوم السابع: في هذا اليوم .... تمشينا بالمنطقة رجلية


4. بيت الموضة (house of fashion) رخيص مره وبضاعته ممتازة .


5. اليو م الثاني عشر مشينا للسعودية يحفظ اله ورعايته ...


6. معلومات عامة :

في البداية احب ان اتقدم بالشكر الجزيل لكل من ابو عمر والمطيري و كابيان على مواضيعهم الرائعة والمعلومات المفيدة عن سريلانكا لأني استفدت منها بشكل كبير .... حبيت اشاركم في خبرتي هالمرة في سريلانكا لعلها ان تكون مفيدة للجميع ... وعذرا على اللغة المستخدمة بعضها عامي وبعضها فصحى.

برنامج الرحلة :

بعد الوصول إلى كولمبو ثم التنسيق مع مكتب سياحي في المطار Lanka Travel Services و كانت مدة الرحلة 10 ليالي 11 يوم . و قد تم الاتفاق على برنامج كامل سيفصل لاحقاً بقيمة 1000$ ( شامل سيارة بسائقها وهو في نفس الوقت مرشد سياحي + فنادق ومنتجعات 5 و 4 نجوم شاملة الافطار ) وهذا السعر لشخصين فقط
اليوم الاول: الذهاب إلى الفندق ( قالاداري ) والإقامة لمدة ليلة هناك . و تخللها الذهاب إلى مركز ODEL للتسوق والذي يحوي عدد كبير جدا من الماركات المقلدة بثمن رخيص جدا. ونظرا لضيق الوقت لم يسعني زيارة المراكز الأخرى .
اليوم الثاني: توجهنا من كولمبو الى دمبولا و سكنت في culture club وهو منتجع راقي يطل على بحيرة وهو أيضا على نظام فلل او اكواخ و عندهم مركز صحي للمساج يحبه قلبك يحطونك بصندوق مثل التابوت كله بخار ثم تاخذ حمام اعشاب Herbal Bath. الصحيح اني سويت مساج من قبل بس مثل هذا ما شفت و قيمته 180 ريال تقريبا . وأيضا زرنا معبد البوذيين المعبد الذهبي . الله لا يعيدها من زيارة . في الطريق بين كولمبو و دمبولا راح تلاقي باعة اناناس .... لا تفوت على نفسك المذاق
اليوم الثالث: توجهنا إلى سيقيريا اللي ما فيها الا صخرة كبيرة ( جبال حايل اجمل منها مليون مره ) وأنصحك انك ما تضيع يوم في ذلك المكان . سكنا في هابارانا فيليج HABARANA VILLAGE وايضا هو منتجع جميل وعلى بحيرة . في نفس اليوم قمنا بسفاري على ظهر الفيل . الصحيح انها ممتعة جدا الشخصين ب 40 $ . و أيضا فيه سفاري بالجيب بس في رايي انه ما يستاهل لأن الحيوانات اللي راح تشوفها ما هي ممتعة مثل البقر والحرباء والفيل . السفاري اللي في اندونيسيا احسن منها بكثير . نقطة مهمة : دمبولا وسيقيريا يكفيها يوم واحد فقط لا تضيع اكثر من كذا

كل المنتجعين ما فيها تلفزيون .

اليوم الرابع: توجهنا من سيقيريا إلى كاندي و جلسنا في فندق Swiss Residence والصراحة كاندي حلوه مره ... ارتحنا فيها ... زرنا في هذا اليوم حديقة The Royal Potanical Park و تمشي في هذي الحديقة الكبيرة جدا و تذكر الله و تتعجب على اشكال الاشجار . ( في الطريق زرنا بعض الورش للحرف اليدوية للمنحوتات الخشبية – و صناعة الفخار –و مصنع الاحجار الكريمة )
اليوم الخامس في كاندري ايضاً في الصباح توحهنا حدائق البهارات Spices Gardenو بعده الى محمية الفيلة elephant Orphanage وهي رائعة جدا جدا جدا تشوف فيها اكثر من 60 فيل من بين صغير وكبير و اعمى و معاق ... وبعدها يسبحون الفيله في النهر . وبعدها ذهبا الى العرض الثقافي Cultural Show وهو ممتع فيه رقص شعبي والمشي على النار . فيه مطاعم بيتزا هت و كنتاكي
اليوم السادس قبل ما نمشي الى نوراليا مرينا على سوق الفاكهة في كاندي واشترينا مانجو . الصحيح ان طعمة مهبول لا يفوتك. و بعدها ا نطلقنا الى نوراليا . الطريق كان روعة و سبحان الخالق المناظر ترد الروح . وقفنا للغداء عن اكبر شلال بالمنطقة . ان وصلت هناك اصفط سيارتك وازل للشلال . بس الله يعينك على الطلوع فوق . اسعار المطعم جدا مناسبة . يعني ان والمدام تغدينا وشبعنا والحمد لله بس 50 ريال . بعد الغدا انطلقنا الى مصنع الشاهي ... طبعا المناظر عن يمينك ويسارك كلها مزارع شاهي .. واذا ذقت الشاهي السيلاني راح تعرف ان الشاهي اللي عندنا بالسعودية مهب اصلي. طبعا لازم نشري شويت علب شاهي ( حقاق يعني) . بعدها انطلقنا الى الفندق Hill Club الفندق شكله من برا تقدليدي لانه على الطراز الانجليزي . فيه عيب واحد وهو انه لازم تلبس رسمي اذا بغيت تروح للعشاء . يعني لازم بدله بكرافته . وهذي من صالحنا يالخليجيين لأنه بهالحال لازم يجيبون العشاء لك بالغرفة . الغرفة ما فيها تلفزيون .

اليوم السابع: في هذا اليوم .... تمشينا بالمنطقة رجلية

اليوم الثامن: الطريق طويل من نورالينا الى هيكادوHikada110 ساعات بس مرينا من عند مناظر رائعة و قرى كثيرة ومذن مثل koogola ahangham galle . و اخيرا وصلنا الى فندق كورال قاردن (Coral Garden ) بس على طول حطينا روسنا ونمنا
اليوم التاسع: بعد الافطار ... الشطي رائع ... وبعدها ذهبنا وركبنا قارب زجاجي القاع glass bottom boat وهذا القارب روعة تشوف تحتك الشعب المرجانية والاسماك والسلاحف . بعدها سوينا سفاري بحري .. وشفنا العديد من الجزر البحريه على النهر كانت روعة ...واذا كان تبغى تروح bentota تراها ماهي بعيدة كلها ساعة وانت واصل باذن الله اذا كان ودك تشوف تماسيك لازم تروح في الصباح الباكر تقريبا الساعة 6 الى سفاري المائي
اليوم العاشر: بعد الفطور .... مشينا الى مونت لافينيا mount lavinia ( منتجع يبعد 12 كيلو عن كولمبو ) . المنتجع مره حلو .... و مطعمهم ممتاز . الشاطي رايق ... باقي اليوم قضيناه بالتسوق من كولمبو . رحنا الى :

بيت الموضة (house of fashion) رخيص مره وبضاعته ممتازة .

• Cotton collection ... وهو محل واحد بس اسعارة مثل السعودية .
• Libraty plaza وهو مجمع تجاري واسعاره عادية
• Crescat plaza مجمع حلو فيه مجمع مطاعم في الدور السفلي ... ينفع للتمشي والفرجة .
• Arena محل واحد بضاعته حلوه بس اسعاره عادية
• Majestic city مجمع تجاري انا ما جيته بس اتوقع اسعاره عادية
• واخيرا ODEL مريناه اكثر من مره بضاعته ماركات و فيه ملابس لجميع افراد العائلة واسعاره غالبا بتراب الدراهم بس مو كل شي عندهم اشياء غالية . اذا قلت السعر عادي فمعنا انك ممكن تلقاه بالسعودية بسعر مقارب . وانا انصح انك تتسوق من ODEL و the House of fashion الاسعار مره رخيصة لمجمل البضائع و جودتها عالية الى حد كبير .

اليوم الحادي عشر بعد الفطور مشينا على فندق Galidari و بعدها تسوق ..

اليو م الثاني عشر مشينا للسعودية يحفظ اله ورعايته ...

معلومات عامة :

• شركة Lanka travel services ممتازة سواقنا اسمه محمد رزفي ممتاز .. وعندهم سواقين يتكلمون عربي ... وهذا جوال صاحب الشركة . اسمه احمد زهراني – شاب طيب ومحترم . ( 0094 777 368 724)
• بالتسبه لفندق قالاداري .... مطعمهم ممتاز ... مطعم عربي واخر صيني ...
• المراكز اللي ذكرتها فوق بان اسعارهم رخيصة .... السبب لان المصنع يصنع كميات كبيرة اغلبها للتصدير والباقي للسوق المحلي .. يعني نفس الجودة ... بس اللي يباع هنا غالبا يقصون الورقة اللي في الرقبة علشان ما يصدر ... ولا تراها نفس البضاعة اللي عند الماركات الكبيرة ...
• الشعب محترم .... بس كثرت الاوروبيين هي اللي تخلي العوائل غالبا ما ترتاح ...
• البخشبش مهم هناك ... بس ريالين تسوي الهوايل عندهم ...
• أول ما اصل للفندق اروح للمطعم واسأل الشيف ( كبير الطهاة) اذا كان يعرف أي اكلات عربية .
• في الطريق من نوريليا الى الساحل الجنوبي يوجد حديقة حيوان كبير اسمها ( Uda walawa National Park) انا وصلتها تقريبا الساعة 2 الظهر وكان الجو حار فما دخلناها .

بيان بأسماء بعض الفنادق :
Colombo
Galadari
Trans Asia Hotel
Galle Face Hotel
Airport Garden Hotel
Dambulla
Culture Club
Sigeria
Habarana Village
Kandy
Swiss Residence
Le Kandyan Hotel
Citadel Hotel
Hill Top Hotel
Thi Lanka Hotel
Earl's Regency Hotel
Noraia Lya
Hill Club
Tea Factory
Grand Hotel
St. Andrews Hotel
Hekadewa
Coral Garden
Mount Lavinia
Mount Lavinia Beach Resort
Galle
Light house Hotel
Bentota
Samon Villas Hotel
Taj Exotica Hotel
Villa Riviera
Triton Hotel
جميع ما كتب سابقا يعبر عن رأيي الشخصي .... ممكن توافقني وممكن ما توافق .... بس حبيت اشارككم بخبرتي بالسفر لسريلانكا ...واعذورني على الإطالة ...