مسافره للابد
16-12-2022 - 12:52 pm
السلام عليكم جميعا اخواني واخواتي
بما اني موجوده في برزبن لليوم الخامس واعتبر نفسي سائحه وزائرة في نفس الوقت وبما ان الفراغ يبدا من بدري ومافي شي الواحد يسويه. حبيت نتشارك الآن بآرائنا عن استراليا بحيث يكون كل شخص يكتب رأيه عن استراليا لحد الآن واحلى مكان راح له , وكل يوم يزور مكان يحب يطلعنا عنه يقول لنا عنا واكيد راح نستفيد بحيث يكتب عن احد هالاشياء:
مكان حلو, مكان مقلب , نصيحه, تصرف غبي صدر منه, موقف ما راح ينساه
طبعا ابدا بنفسي أول مره ازور استراليا, نوعاما اعجبتني بس مافي وناسه بشكل رهيب, بس احسن من الحر بالبلد والجو روعه ومافيه بروده الا خفيفه
اول مكان رحت له الى حد الآن : شارع الملكة queens street حلو نوعا ما ومزدحم واسواقه كثيره, بس ياكثر الهنود والصينيين , وطبعا رجعت ما اشتريت شي (بخيله واوفر للقولد كوست)
الخطأ اللي ارتكبته بغباء طبعا: صرفت فلوس سعوديه معاي وقال لي سعر الصرف اربعه ريال لكل دولار مع ان اللي اعرفه 3 ,15
موقف رائع: المسلمين يبتسمون لك اذا شافوك , واحلى شي يقولون بلهجة متكسره السلام عليكم
وبس هذا اللي اتذكره وساوافيكم بالجديد
اولاً الحمدالله على سلامتك ... وثانياً اهنئك على الفكرة الجميلة ... وان شاء نجد التجاوب الفعال من الاعضاء المتواجدين هناك او على الاقل اللي توهم راجعين ...
عني شخصياً لم ازر استراليا هذا العام ... ولكن برسبين لم تعجبني نهائياً ... عد اني اروح اجلس ساعة ساعتين في كوفي او آكل شي في الساوث بانك وارجع على القولدكوست مباشرة ...
وبالنسبة للمسلمين ... فللمعلومية مدينة برسبين واحدة من اكثر المدن الاسترالية يوجد فيه جالية مسلمة كبيرة ... لدرجة ان تاثيرهم السياسي والاجتماعي على المدينة كبير جداً ... ويكفي ان نعرف فيها اكثر من 9 مساجد غير المصليات المنتشرة في الجامعات وغيره ...
تحياتي ...