مراحب عليكم يا أعز مسافرين ....
قبل اسبوعين نزلت استفسار عن افضل مطعم راقي يناسب عزيمة مميزة , و اقترحوا علي الأعضاء الأعزاء عدة مطاعم , بس أنا كنت حابه إنه يكون بفندق , و أغلب الاقتراحات كانت على ( سبايزو ) ,,,
و بالفعل وقع اختياري على سبايزو .
مطعم ( سبايزو ) يقع في برج المملكة في الدور 77 , بوفيه الغداء فقط يبدأ من الساعة 12 إلى الساعة الرابعة , و ما بعد الرابعة طلب من المنيو .
حجزت قبل بيوم طاولة لشخصين غداء يوم الجمعة , و طلب مني الموظف موعد الحضور , و قلت له 1:30 ظهرا , و سجل الاسم و رقم الجوال .
سعر البوفيه يوم الجمعة 175 ريال للشخص الواحد شامله الخدمة ( من رأيي السعر ممتاز بالنسبة لمستوى المطعم )
توجهنا الساعة 1:20 لفندق المملكة , و دخلنا الاستقبال و كان خالي و ما فيه موظفين , و ما كأنه فندق خمس نجوم , بصراحه شيء غريب , دخلنا المصعد , بس ما حصلنا رقم 77 , و طلعنا نبغى أحد نسأله وين مصعد المطعم , و بعد وقت حصلنا عامل نظافة و دلنا على المصعد الخاص بالمطعم , و قبل ما تدخل المصعد فيه موظف يسأل إذا إنت حاجز أو لأ , طلعنا المصعد طبعا مع موظف جالس بالمصعد على طول , و قبل ما ندخل للمطعم سألنا الموظف عن الاسم , و قال لنا تفضلوا ,,, ولما دخلنا قالوا لنا شخصين ما تكون الجلسة مطلة , و بصراحة جلسنا في النص في مكان مرتفع , و هو بالنسبة لي افضل من الطاولات المطلة , لأننا نشوف المنظر بوضوح .
البوفيه ( أيطاليا - فرنسي - ياباني ) الأكل جيد , لكنه غير معتاد , حيث تعودنا في البوفيهات على المشاوي, و أنواع الرز , و الذبيحة ,,, هنا ما فيه غير نوع رز واحد , و فيه وفره في المأكولات البحرية , السمك مسوينه بطرق كثيرة يمكن أربع طرق .و الحلويات متنوعة , و فيه ( أم علي ) .
المكان راقي جدا جدا , و الناس إللي فيه راقيه , مافي احد يطالع بأحد , كل واحد بحاله , و الأطفال قليلين و مؤدبين , لا فوضى و لا صجه و لا صراخ , يعني عالم راقية , و الناس قليلين مرة و هذه بصراحة ميزه في المطعم , و الجلسات رايقه و و الأجواء حلوه و مريحة , يقدمون مع الأكل ماء , و عصير جوافه ( إجباري ) و بعد الكل بلاك كوفي .
بصراحة أنا أعطيه 10 / 10 ,,, من ناحية الخدمة , و النظافة , و الروقان , و الأكل , حتى الناس إللي فيه بعد يستاهلون عشره على عشره ,, و الحمد لله كانت عزيمه متكامله و مميزة , و أنبسط زوجي كثير , و أعجبته المفاجأه , بس للأسف قبل لا نطلع جالي خبر بالجوال مفجع , خرب مزاجي , و تنكدت , بس الحمد لله على كل حال .
عموما إللي عنده مناسبه و و يبغى يعزم شخص عزيز عليه و تكون العزيمه مميزة , أنصحه ببوفيه سبايزو على الغداء يوم الجمعه .... أتمنى لكم أوقات و مناسبات سعيدة .