- السلام عليكم ورحمة الله وبركاته
- تايلند يعني سيام يعني مملكة النور
- وأنا بعدد لكم المراكز التجارية والترفيهية في بانكوك.
- وفيه مجمعات كثيرة لكن هذا اللي يحضرني الآن.
السلام عليكم ورحمة الله وبركاته
تايلند يعني سيام يعني مملكة النور
طبعا بما اني ضيف جديد عليكم قريت اغلب المشاركات بخصوص تايلند ،وادري دايما ردودي تجي متاخره، فتحسبا للإحراج في التأخير سويت موضوع جديد وان شاء الله بتكلم فيه بشرح بسيط بحكم خبرتي المتواضعة عن مملكة النور.
لاحظت بمروري على مواضيع اللي قبلي شفت ناس مؤيده وناس غير مؤيده للسفر لتايلند وكل يتكلم عن نظرته والشيء اللي شافه. وانا الحين بقولكم وشو اللي عندي.
أول شيء بسوي مقارنه عن دول شرق آسيا اللي زرتها وماهو المميز بها:اندونيسيا - الرخص والإجرام.
ماليزيا - الطبيعة الخلابة والجو الساحر وغلاها نص ونص.
سنغافورة - تعتبر ثاني دوله بالنسبة للنظافة وغلاها فاحش. (وجبة الماكدونالدز 10دولار تقريبا) أو أكثر شوي.
تايلند - أهم ما يميزها هو الأمان وهذا شيء مهم جدا بالإضافة إلى الرخص والطبيعة الخلابة وجوها لكم عليه شوي.
بالنسبة لأخوانا اللي انتقدوا تايلند أنا أتوقع ما توفقوا بالسكن ولا توفقوا بالرحلات ويمكن بس جلسوا في بانكوك، تايلند بلد زرتها كثير والله ما أمل منها على سبيل المثال الصيف الماضي كنت مرتب رحله لي فينا زل مسي وسالزبورج وميونخ وبعدين بروح برتسلافا بس من شفت عرض الخطوط التايلندية ما قدرت أقاوم!!! وأنا بالسنة أروح لها أكثر من مره.
الشاهد أنا رحت لها عازب ورحت لها متزوج.. وأنا متزوج صراحة استمتعت كثير وتصلح للعوائل 100% لكن للي يعرف والأمر ترى جدا سهل ومايبيله شي.
أنا أعطيكم طريقتي بالسفر.. أول شيء احجز كويت بانكوك كويت (حسب ديرتك طبعا)
أول ما أوصل بانكوك اخذ لي فندق ليله وحده (أفضل طبعا فندق اماري بوليفارد) لأنه فندق عندي 15 نجمه يعتبر السنتر وكل شيء قريب منك خاصة المطاعم العربية أو السكاي ترين القطار الهوائي والصرافين وحتى الصرافين اللي بمنطقة نانا أفضل من البنوك من ناحية الصرف ومقابل الفندق أيضا سوبر ماركت الفوتلاند وفيه كل شيء حتى اللبن والروب .. والمطاعم العربية تقدم كل شيء في الأكل العراقي اللي يقدم الجلو كباب والجلو مرغ وفي المطاعم المصريه على سبيل مثال لا الحصر مطعم ناصر المصري ومطعم نفرتيتي المحاشي والكشري وحتى الكوارع والمطاعم اليمنية المندي والمظبي والحنيذ أكثر من مطعم وفي مطاعم تقدم الأكلات الكويتية الجريش والهريس والمربين وصب الكفشه ومطاعم كثيرة وتصدق حتى الأكلات القديمة المندثرة راح تلقاها هناك.
بالنسبة للرحلات والتور في عدة أماكن لكن لي يعرف صح على سبيل مثال دريم وورد اغلب أو كل المكاتب تاخذها للشخص يوم كامل 1.250 بات لكن اللي مثل حلاتي يعرف لها أنا أروح معا زوجتي بتكسي 100 بات والتذاكر 600 والرجعة 100 يعني كلفت علي للشخصين 1400 بات لاكن لو بروح معا التور بتطلع علي 2500 بات.
هذا يشمل اغلب الرحلات سفاري وسوق النهر وعلى فكره هالسوق يفتح الساعه 6صباحا ويغلق الساعه 11 ظهرا
اللي يميز تايلند الأمان صحيح في أماكن ما تصلح لكن محد يقولك وين رايح أو وين جاي .. يعني بأي وقت تطلع أي ساعة مو مهم والشعب بطبيعته مسالم بس عاد الواحد يكون حريص والشعب فقير جدا لكن حبوب ومسالم
وأنا بعدد لكم المراكز التجارية والترفيهية في بانكوك.
- *المراكز التجارية**
- امبوريوم وهذا مجمع جدا راقي وجديد ويضم جميع الماركات العالمية وفيه سينمات ومطاعم عالميه.
- طوكيو سنتر MBKوهذا من المجمعات المشهورة جدا هناك وفيه كل شيء تقريبا من سينما ومطاعم وأثاث وكل شيء.
- Baby Market وهذا خاص للأطفال تقريبا 12 دور.
- Batonam هذا قريب من فندق أماري وترقيت وفندي البايوك سكاي ... وهو سوق كبير وأشبهه في سوق منجادوا في جاكرتا.
- Center مجمع كبير.
- اللوتس.
- The Mall وفي ثلاث مجمعات بنفس الاسم وكلهم يقعون بجنوب بانكوك (بالطريق السريع 45 دقيقة تقريبا) وتتميز المنطقه بسكانها المسلمين واحرص على ذا مول الكبير أحلى موز مشوي ومقلي تأكله هناك راح تشوف الحجاب بكثرة هناك عندهم.
- China Town طبعا معروف للكل بس كبير جدا وعبارة عن شوارع يعني لازم تدل فيه
وأنصحكم بالشيخ أمين
- Bat Bong وهو سوق الليل يفتح في الساعة 9 مساء ويغلق تقريبا الساعة 3 صباحا.
- Night Pasarوهذا يفتح الساعة 12 الظهر ويغلق الساعة 12 بالليل.
وفيه مجمعات كثيرة لكن هذا اللي يحضرني الآن.
- *المراكز الترفيهية**
- Dream World وهي مدينة ملاهي كبيرة ويوم واحد ما اعتقد بيكفي لها وفيها ألعاب كثيرة وحلوه وخطيرة وفيها مدينة الثلج أول ماتدخل يعطونك لبس خاص بالمدينه طبعا مدينه صغيره لاكن حلوه وديربالك تروح الجندول وبعدين تدشها مثل ماسويت تبلل شعري من الجندول ورحت مدينة الثلج شعري ثلج.
- Safari Park وهي حديقة فيها عروض للدلافين والفيلة والقرود والحمام وفي عرض ماجك وفيها ألعاب بس قليلة وبعدين تنتقل للحيوانات وتدخل بالباص والحيوانات تكون مهدودة. - حديقة التماسيح والفيلة.
- المتحف الوطني
- مصنع الذهب والمجوهرات
الشاهد.. بانكوك حلوه كثير لكن نخلي الباقي لمواضيع كثيرة.
نصيحة للأخ كبيان
العروض وايد حلوه من الفلبين إلى تايلند.. اذكر على سبيل المثال يعطونك 3 أيام أقامه في فندق أماري بوليفارد (سعر الليلة 10 دولار(
وسامحوني على الإطالة والأسلوب التعبان.
أخوكم الصغير مراهيش
بس زعلتني على كلامك عن العمة
وننتظر المزيد والمزيد من خبراتك السياحية .. سوءا في تايلند او غيرها.
تحياتي لك ،،،