- بسم الله الرحمن الرحيم
- أولا : قبل السفر
- انت بحاجه الى هذه الاشياء والتي قد تكون بسيطه ولكن فائدتها كبيره :
- ثانيا : في المطار
- النصيحه:
بسم الله الرحمن الرحيم
طبعا انا لست من الخبراء في هذا البلد ولكني انقل تجربتي المتواضعه في السفر لهذا البلد حتي يتجنب كل من سوف سيسافرلاول مره الي هذا البلد الاخطاء التى وقعت فيها بسبب جهلي في هذه الامور التي سوف اشرحها .... مع الاعتذار للاخوه الذين قد يكونون ذكروا هذه الامور قبلي .....
أولا : قبل السفر
انت بحاجه الى هذه الاشياء والتي قد تكون بسيطه ولكن فائدتها كبيره :
- احرص علي ان تكون لديك مبالغ بسيطه من البات (عملة تايلند) يعني عشرين بات علي سبيل المثال وذلك لزوم البغشيش لانه الصراحه حصل معاي موقف انه اول ما طلعت من الطياره واتجهت مع العائله الي الجوازات كانت المسافه بعيده وكان في سيارات لنقل الركاب وخصوصا الي معاهم اطفال – مثل حالتي – المهم اول ما ركبت قالي السائق انه لازم ادفع بغشيش في الصندوق الموضوع في السياره وفعلا كان في صندوق زجاج مكتوب عليه " بخشيش " بالانجليزي , طبعا اخوكم ما معاه الا دولارات – وكلها مئات بعد- المهم لما وصلت الي الجوازات قمت وعطيت السائق عمله كويتيه وهي نصف دينار اي ما يعادل 70 بات , طبعا السائق ما عجبه شكل النصف دينار وخذ يا تحلطم ( يمكن بعد سب بالتايلندي ) .... نفس الموقف تكرر مع اللي يشيل الشنط .... المحصله قام اخوكم يشيل ويحط بالشنط وكل ما جاء واحد من العمال يبي يساعد قلت له مشكور ويعطيك العافيه بس فكني من شرك ما عندي بغشيش .... ومن بعدها قمت اجمع العشرين بات واحرص عليها بس علشان البغشيش.
- خذ معاك بوصله علشان تعرف اتجاه الصلاة ... ليش ... انا اقول لكم ... اول ما وصلت الفندق , سالت العامل اللي جاب الشنط هل يوجد مسلمين يعملون في الفندق ؟ قالي فيه اثنين من ربعه مسلمين , شوي ولاهم جايين سالتهم وين اتجاه الصلاة ... يحليلهم كل واحد ياشر بصوب وبعد اخذ ورد بينهم اتفقوا علي اتجاه ثالث وقالوا هذا هو اتجاه الصلاة .....
ثانيا : في المطار
طبعا المطار فيه مكاتب سياحيه والصراحه عليهم حركات عجيبه : اول ما خذيت الشنط وانا ادور علي باب الخروج ولا ذاك اللي كاشخ وحاط شعار وشكله يشتغل في المطار سالني من وين انت ؟ وهل هذه اول زياره لك الى تايلند ؟ اخوكم بحسن نيه قلت له نعم هذه اول زياره , جان يقول لي انا من الخطوط التايلنديه ولانك جاي علي الخطوط التايلنديه راح نقدم لك هديه ... تفضل معاي ... اخوكم ما صدق ... ووراه ... طبعا وصلني حق مكتب سياحه واتضح ان صاحبنا موظف في شركة السياحه ولا يشتغل بالمطار ولا هم يحزنون ...
النصيحه:
1. مكاتب السياحه في المطار اسعارها نوعا ما غاليه وممكن تحصل ارخص بره المطار
2. لا تاخذ بكج كامل من مكاتب المطار احجز ليله في فندق ( ولا ترضي بالسعر الي يعطونك اياه .. فاصل وراح ينزون السعر ) .. والباقي ممكن تاخذه بره المطار ... وعل فكره اسعار الرحلات معروفه وحتي البقالات ممكن يحجزون لك الرحله اللي تبيها ... وشغلهم كله مضمون لان لهم عموله علي كل رحله يرتبونها
3. اذا عنك حجز فنادق فنصيحه رتب رحلاتك من المكاتب خارج المطار لانهم ارخص وتقدر تختار الرحله اللي تبيها
4. بعد ما تخلص خذ لك تاكسي من مكتب المطار (مكتب خاص للتكسي موجود قبل بوابة الخروج ) ولا تقول بره ارخص , لانك بتحوس من واحد لواحد – وخصوصا اذا معاك عائله – وعقب ما تتفق مع واحد بيقولك تعال معاي ... وتلقي التكسي واقف بآخر المطار وانت وراه قاعد تسحب بالشنط وما توصل الا وانت متحسف مليون مره ....
عقب ما توصل تبدأ مرحلة الاعداد للرحلات والحياة اليوميه ... وهذه لها تكمله
أرجو أن لاتزعل مني ولكن والله لااجد ان هذه الدولة لا تصلح للعوائل ولك تحياتي....