ماشاء الله تبارك الله

حديقه بول
افضل واحسن حديقه رحت لها
احبها هذي الحديقه بشكل غير طبيعي

موقع الحديقه
http://www.friendsofpoolepark.co.uk
/
عنوان الحديقه
0Boldre Close
Poole
Dorset
BH12 2HP
هذي حديقه جنب بيتنا مرره حلوه ومريحه ممتعه
فيها العاب اطفال مع بيت كور
وفيها بحيره بط بالاضافه الى جزء من الحديقه يطل على البحر
نصيحه اللي يروح هناك ياخذ له كيس خبز تست فيه هناك بط وطيور
اول ماتشوف الخبز معك خطر تاكلك ههه
او اعملو زي حركتي جمعو الخبز الفائض واللي انتهت مدته
ولما يجي نهايه اسبوع او اسبوعين خذوه معكم ^_^(هذا الكلام موجه للي ساكنين في بورمث سنين )
فيها قطار يلف بك بعض الاماكن فيها
بحكم اننا نعرفها زين صورت لكم كم صوره
ممتعه جدا ^_^
صوره للقطار
ماشاء الله البط عندهم كنهم بعارين يروعون وين برزانا عنهم ههه

هذي صوره وزي ماتشوفون خط القطار

هذا الكرسي كنا جالسين عليه وشوفو كيف الطيور اجتمعو عشان فتات
الخبز الصراحه ممتع للاطفال وحتى الكبار

بالاضافه لوجود مطعم
وهذي صورته من الموقع

وجلساته حلوه مره
والمواقف فيها مجانيه مده ساعتين ^_^
وقريبه جدا من بول ستنتر

واحيانا يكون فيها كرنفال ^__^ وهذي صوره له

صور متفرقه من الحديقه

عشان توصلون للبحر وانتم تتمشون حول البحيره
بيجي نفق صغنون مشاه خشو معه واقطعو الشارع وراح تشوفونه ^_^
وبكذا خلصت اول رحله

Longleat
اليوم رحله جديده في مملكه بريطانيا وتحديدا في جنوب بريطانيا
رحلتي اليوم باذن الله بتعجبكم....
حديقه وسمعت انها اكبر حديقه في بريطانيا للحيوان...
ممتعه جدا ^_^ ولله الحمد
اولا راح اعطيكم ماهو المطلوب قبل مانروح
1التاكد من حاله الجو عن طريق النشره الجويه ..
2حساب مسافه الحديقه وحطو في بالكم يبغالها اقل شي 4 ساعات للتجول بداخلها بدون حساب مسافه الطريق
بالنسبه لمدينه بورمث فهي تبعد عننا بالضبط 1 ونص
3حاوولو تطلعون من البيت الساعه 10 عشان توصلون هناك على 12 او بالكثير 1
4خذو بعض الاكلات الخفيفه زي الكورسان والمافن ولاننسى القهوه والشاهي
5[خذي احتياط جكيتات وغيار لطفلك
بعدها تفضلو تصفحو الموقع^_^
http://www.longleat.co.uk
بوست كود الحديقه
Longleat address: Longleat, Warminster, Wiltshire, BA12 7NW
بعض الملاحظات:
على الطريق راح تمرون ب 3 قرى ريفيه تقريبا وكل دقيقه تراقبكم الكاميرات والسرعه لازم تكون30
عشان كذا هذا الشي بيأخر من الرحله فحطو لها حساب
بالاضافه ان كل الطريق لفلفه تقلب الراس بس متعه لان الطريق فيه طبيعه جنونيه
وايضا احب اوضح ان لما تمشون في الطريق على نفس التوم توم او بعباره اخرى القارمن راح تمرون باقل شي 3 لوحات كلها تقول
هنا سفاري لكن ماعليكم
انتم امشو مع التوم توم بيدخلكم طريق ضيق مره هذا طريقها امشو ماعلييكم زين
بعدها بتجيكم لوحه مكتوب سفاري بارك وبعدها تشوفون 4 لوحات ملونه على لفتها خلاص لفو معهها هذي هي
لانكم لو بتلتو مع التوم توم راح يوصلكم لطريق بري انتبهو وعموما انا حاطه صوره للمدخل ^_^
صور لمدخل الحديقه
راح نشوف الان قائمه الاسعار
شوفو
لما توصلون للتذاكر راح تسألكم
تبغون فقط الحديقه واتوقع سعرها10 باوند
والا الحديقه مع البيت مع تقريبا 9 اشياء معه
شوفو ال9 اشياء هذي بوضحها لكم
طبعا
احنا اخترنا الثانيه وكان سعرها 22 باوند كما هو موضح سابقا في اللوحه
راح تقول لي وش هذي الاشياء
شوفو معي
اول شي راح تقولكم انها تبيع كتاب ب 5 باوند احنا مااخذنها وماانصحكم به
لانها اصلا بتعطيكم خريطه للموقع وكل شي مطلوب
اول ماتدخلون راح تعطيكم زي اللي في الصوره
هذي خريطه الحديقه من جهه القصر واللي حولها(الصوره من الموقع)
الان راح اوضح لكم وش فيها الحديقه غير الحيوانات
بس اول شي خلونا ناخذ جوله بين الحيوانات ^_^وبعض التعليمات البسيطه عنها
وبعدها نرجع للاشياء الباقيه يالله اخليكم مع الصور
احب اوضح لكم نقطه
راح تمرون من عند قرود تشوفون الناس يوقفون بالساعات عشان تجي عندهم
وترقى على سياراتهم
احنا لقينا خطه ماخذت ثانيه حتى جاء فوق سيارتنا 8 قرود وكل السيارات اللي ورانا
سوو حركتنا
طبعا ممنوع فتح الدريشه عندهم لكن كانت معي قطعه مافن وفتحت الدريشه وذبيتها
وجاوني ركض وسكرتها على طول جلسو يدورون على القطعه
قمنا وشغلنا مساحات السياره وجو كلهم يشربون من مويتها ههه
وهذي صوره لهم
جمل حجم عائلي
هذا حيوان مسوي تمويه ههه
وعل يكفي قبيله
احب اوضح نقطه بشأن الغزلان
لما تدخلون واحه الغزلان راح تشوفون وحده تبيع اكل الغزال
في كاس ب 1 باوند لايفوتكم يجون لحد دريشتكم وياكلون من يديكم
ملاحظه هامه لما تاخذون اكل راح تشوفون الناس صافه على جنب صفو معهم
وعطو الغزلان شوي من الكاس لاتعطونهم كله زينا
لاننا اكتشفنا ااننا يوم مشينا شفنا يمكن 7 غزلان جايين لنا في الطريق
يحسبون معنا اكل وتحسفنا اننا خلصناه كله في ذيك المواقف
لما تدخلون واحه الاسود والنمور بتشوفون حمايه كبيره جدا
اي سياره تدخل يسكرون الباب وراها بعض الصور
طبعا الحيوانات كثير وصعبه احطها كلها لما تروحون راح تشوفوونها ^_^
لان راح اقولكم وش في الحديقه غير الحيوانات
اول شي
Longleat House
هذا مسجل في القائمه لكن التذاكر لازم تكون معكم
عشان تدخلون
شوفو اول شي هذا قصر كبير وجدا ممتع
ممنوع التصوير فيه وايضا ممنوع دخول العربيات بشكل عام
حتى عربيات المعاقين
راح تشوفون في الخريطه صوره القصر ورى القصر صوره صغيره لعربيه
معناها هنا تحط عربيتك بعدين تدخلون القصر
صوره للقصر من الخارج
اول ماتطلعون من القصر راح تلقون متاهات مرايات في الطريق حلوه
ماحصل لي وصورت والدخول لها مجاني ^_^
بعدها
Adventure Castle
قلعه المغامرات خاصه بالاطفال من سن 14 وتحت
الدخول لها ب3 باوند وللمعلوميه تراها موب شامله
للتذكره يعني تدفعون لها تنفع للي معه اطفال
بعدها
Hedge Maze:
متاهه رايقه فعلا متاهه ورايقه
وسعرها شامل مع التذكره ^_^ ممتعه جدا لاتفوتونها
وهذي صوره لها
بعدها
Pets Corner
زاويه الحيوانات الاليفه
حلوه صراحه وطبعا سعرها شامل مع التذكره
ممتعه للاسف ماصورتها
بعدها
Butterfly Garden
حديقه الفراشات
سعرها ايضا شامل مع التذكره
حديقه مره حلوه احب اوضح لكم اول ماتوصلون لها راح تدخلون محل !!!وتلقون فيه بلاستيكات على شكل باب
ادخلو معها بعد مايتأكد ويختم على تذاكركم
الطريف في الامر اننا اصلا ماجبنا خبرها بس واحنا نتمشى
هطل مطر غزير ودخلنا في هذا المحل عشان نحتمي من المطر
وصار حديقه الفراشات ههه
ممتعه مره الفراشات وهذي صور
بعدها
Railway
قطار يلف بك بعض الاماكن حلو وايضا السعر شامل
صوره للقطار
بعدها
Safari Boats:
سفينه صغنونه حلوه مره للاسف ماركبنها على الرغم
ان السعر شامل مع التذكره
لكن على حظنا الجو ممطر ولاكان فيه وقت
لكن انصحكم لو كان مامعكم وقت
لاتركبونها لانها نفس لفه القطار
بعدها
Postman Pat
رجل البريد خاصه بالاطفال ايضا
وسعرها خاص وغير شامل
بعدها
Tea Cup Ride
هذي لعبه اطفال تعرفون اكواب القهوه عندنا في ملاهينا
هي نفسها
للاطفال وسعرها خاص
بعدها
Old Joe’s Mine
هذا خاص اتوقع بالخفافيش
على الرغم انه شامل مع سعر التذكره
لكن ماكان فيه وقت للدخول له ولاعندي
معلومات او صور عنه
بعدها
Motion Simulators
هذي لعبه شامله ايضا لسعر التذكره
تعرفون اللي في ملاهينا اللي تركبونها مسكره
لشخصين او اربعه وتتحرك
اتمنى تكونون عرفوتها هي نفسها
ولا ركبناها لان مافي وقت
وكانت معي بنتي ومادري هل هو
مسموح انها تركب او لا
واخير صوره للمخرج
[
تمت ولله الحمد

اليوم رحله جديده من نوعها
رحله منتزه دايم نروح لها ولانمل منها ^_^
منتزه وحديقه
.moors valley
موقع الحديقه
http://www.moors-valley.co.uk
البوست كود
Horton Road, Ashley Heath, Nr Ringwood, BH24 2ET
صوره لمدخل الحديقه والمتزه
منتزه الدخول لها مجانا ^_^
فقط قيمه موقف السياره احب اوضح لكم نقطه
الساعه 6 او 7 بالكثير تسكر الالات الخاصه بالدفع لموقف السياره
ويصير مجاني ودايم نطلع بلوشي لاننا نطول فيها
واذا جينا نطلع نلقاها مفتوحه والالات حقت الدفع مسكره
لكن لو طلعتو قبل كذا لازم تدفعون ولاتخافون غالبا ماتتعدى 5 باوند لفتره طويله
تقريبا 5 ساعات
المنتزه مليانه محلات تبيع ايسكريمات تبرد عليكم لما يكون الجو حار شوي
فيها قطار صغير يلف بك ربع الحديقه
صوره واحنا راكبين القطار
يوقف القطار في محطه تنزلون فيها كافتيريا بعد 3دقايق
يرجع القطار ويكمل لفته ^_^
صورمن المحطه
ولا انسى اقولكم ان الحديقه فيها ملعب غولف
وبحيره ومسطحات خضراء والعاب اطفال
واهم شي في الحديقه وهذا اللي مميزها عن باقي الحدائق
فيها حبال على الاشجار وحركات وتسلق وكذا
يعطونك ادواتك وتروحون في قروب مع واحد يعلمكم خطوه خطوه
ووتتسلقون من شجره لشجره ممتعه جدا وتقدرون تشوفون صور لها في الموقع
الحديقه تستاهل العنوه لها
اسعارها تسلق الاشجار
العمر من 10 الى 17 = 20 باوند
فوق ال 18 =30 باوند
وهذي بعض الصور اخذتها وانا اتمشى فيها
وماتحلى الطلع هالا ب,,
برضو تجي ايام يكون فيها كرنفال صغنون
جانب من العاب الاطفال
تمت ولله الحمد

جزيره سوينج
موقع الجزيره
البوست كود
Durlston Country Park, Lighthouse Road, Swanage, Dorset, BH19 2JL
صراحه ماتعتبر جزيره لان لها طريق بدون سفينه من ورى بس بعيد
العباره او السفينه اختصار واقرب لها بدون تعب
مؤهوله بالسكان وفيها سوق صغير مفتوح وحلوه مره ولاتتفوت
يميزها طبيعتها الجنونيه بحكم قله المباني السكنيه فيها
اول شي ركوب العباره
بالنسبه للسياره
3 باوند رايح 3 باوند راجع =6 باوند
وفيه باص خاص يروح لها

صوره من داخل العباره( الفيري)

والان دخلنا الجزيره

ومرينا من سوقهم

واللي ابرز مافيه هذا المحل اللي ماادخله الا شاريه منه

ووصلنا اخير
نظره على اسعاره الباركنج

الفيزتر سينتر
بعدها طلعنا
وصرنا نمشي لحد ماطحنا في هذا المكان

من جهه اخرى ماشاء الله من شده الطبيعه شاقه الزفلت

قبل مانسى لما تضبطون احداثيات القامرن على البوست اللي اعطيتكم اياه
راح يوديكم من ورى للجزيره يعني ماتركبون الفيري
وبتمرون من ها المكان الاثري
لكن نصيحه خليكم على الفيري احسن
اتبعو اللوحات اللي مكتوب عليها فيري لحد ماتوصلون لها وخلال ماانتم واقفين
انزلو خذو لكم ايس كريم من الشارع نفسه
والحمدلله رجعنا للبيت

Holme Nurseries Ltd
الموقع

البوست كود
Holme Nurseries Ltd
West Holme Farm
Wareham
Dorset
BH20 6AQ

اليوم رحله جديده في عالم الحدايق
حديقه ممتعه ميزتها ان مواقفها مجانيه
بالاضافه الى متعه القطف فيها
فيها فرواله وبطاطس وذره
وتفاح وتووت هذا اللي اعرفه
بالاضافه الى الكثير من الشتلات للبيع ^_^
صوره للمدخل

الحين دخلنا
على طول للشتلاات

تعدينا الشتلات وكملنا التمشي في الحديقه

واحنا نمشي قابلتنا زهور رائحتها فواحه

لوحات ارشاديه
شجره التوت

واخير وصلنا للمتعه في قطف الفرواله

الفروالهحقل

هذي كانت من نصيبنا
كراسي للراحه

مقابل الكرسي هذي البحيره

واخيرا صوره للمكان اللي تحاسبون فيه وكان تبغون شتلات

سلتنا

زياره اليوم مخصصه لحبايبنا الصغنونين ^_^
حديقه

FaRmEr PaLmErS
الموقع
Postcode BH16 6EU

جدا متعه خصوصا الاطفال من عمر 1 الى 8 سنوات
خلونا نتفرج مع بعض
صور المدخل والمخرج في نفس الوقت

نظره على قائمه الاسعار

بسم الله دفعنا ودخلنا

صوره لخريطه الحديقه من الموقع
صور زحاليق

اليوم مخصص لرحله لمدينه ثانيه
تبعد تقريبا ساعه ونص مدينه بورتسمث
كنا مخصصين لها يوم كامل ولاكفى صراحه بس ما انكر ان اليوم هذا كان جدا
ممتع

اولا ضبطنا احداثيات القارمن على هذا البوست كود
Spinnaker Tower
Gunwharf Quays
Portsmouth
Hampshire
PO1 3TT
هذا البوست كود
حق برجهم برج
Spinnaker Tower
نفس برج دبي بالضبط مدري من اللي سارق الفكره من الثاني ههه
وصلنا هناك واحنا نمشي مرينا بسوق ومرينا بهذا الاسم الغريب

نسيت اعطيكم الموقع
ودفع قيمه الدخول
ثمن تلقط لكم صوره على خلفيه خضرا
دخلنا وركبنا مصعد
وطلعنا للدور الاخير
م خورافي المشهد
تفرجو معي

بعدها نزلنا وجينا نطلع قالو لنا كان تبغون صوركم
طلعت الخلفيه البرج خورافيه واخذتها ^__^
لما نزلنا قابلنا حبيب الكل برجر كنج
صوره من الموقع
واخذنا بطاطس وببسي وكملنا المسيره
بعدها توجهنا لجزيره
Isle of Wight
ووقفنا بسيارتنا على اساس نركب في السفينه
المهم لما نزل زوجي قالو له نصيحه مايكفيها يوم
فكنسلنها
بس لما بحثت عنها في النت لقيتها صراحه تستاهل العنوه
وانا انصحكم بها وبشده
يومين اتوقع تكفيها
لقيت هذي الحديقه الخورافيه فيها وانصحكم فيها من خلال تصفحي لموقعها

لما رجعت لكاميرا الفيديو اكتشفت ان جنب هذي الحديقه قلعه ولقيت لها عنوان وموقع بعد
يعني ضبطو القارمن على موقع القلع هوانا متأكده انكم بتلقون الحديقه جنبها
موقع القلعه
City Museum & Records Office
Museum Road
Portsmouth
PO1 2LJ

وعلى اذان المغرب رجعنا لديارنا بورمث

اليوم حديقه ممتعه ام وحلوه الطبيعه فيها والاهتمام

Upton country park
صراحه حلوه الواحد يمر (ايس لاند ) وتاخذ منه عده الشوي
http://www.iceland.co.uk/
ام لاتحسبونها منقد وحطب وحاله
لا تجيك جاهزه في علبه قصدير حتى معاها الشبك طبعا استعمال مره واحده فقط
خذوها مع الولاعه واللي يشغل الحطب هذاك الابيض اللي كنه بيض صعو

السلام عليكم ورحمه الله وبركاته
اليوم رحنا لحديقه في بورمث
اسمها
monkey world
واضح من الاسم انها تختص فقط بالقرود لكن لا
صحيح هي 3 ارباعها قرود لكن فيه قسم خاص بالطيور^^وحلوه
اول شي ياطويلين العمر قبل ماتطلعون من البيت خذو لكم شاهي
ومافن او بارد وشكولاتات ^^صحيح فيه في الحديقه محلات
بس حلات الشاهي بترمس^^

اول شي هذا موقعها البوست كود
MONKEY WORLD, LONGTHORNS, WAREHAM, DORSET BH20 6HH

نبدا اول شي بصوره للاسعار

وفيه تخفيض للطلاب
نبدا بصور من الحديقه جميع جوانب الحديقه
وعلى فكره تراها كبيره واول ماتدخلون يعطونكم خريطها لها
بالاضافه الى الخرائط اللي معلقه في كل مكان

هذا الكرسي اللي جلسنا عليه
هذي بعض صور القرود

هذا الحيوان صراحه مادري وش اسمه

هذي جهه الطيور لكن عشانها موب محبوسه اقصد مخلينها بين الاشجار فاللاسف ماشفنها

هذي جهه ايضا من الحديقه وفيها العاب للاطفال

[]]صوره للجلسات اللي عند المطعم

واخيرا صوره الحديقه من برا

والسلام عليكم ورحمه الله وبركاته

والله من وجهه نظري هذي الحديقه خلوها اخر شي
يعني لما مايبقى شي تروحون له روحو لها
صراحه نوع من تغيير الجو لا اكثر]