اهلين كيت كات
اسمعني انا توني جاي من هناك انا وزوجتي وبنتي
برد على استفساراتك واحد واحد (( اوة يا كثرها !!!! ))
بس تستاهل ....
1 سافر وانت متطمن ...
2 يعني ما فية شي ابد ولا (( يس )) ولا (( نو )) اكيد فية ...
مافي مشكلة راح تسير امورك لو با الأشارة ههه ..
3 انا مسافر ومعي بنتي عمرها سنتين ونص ولم اواجه اي مشكلة
بس انها اشغلتني شوي بالطائرات والأسواق والشارع ... بس معي الشوكولاتة
أي صيحة أي طلعة غلط كلها قطعة (كيت كات) على اسمك ... وتنتهي المشكلة .
نجي الان للأستفسارات !!!!!!!!!!!!!!!
1 انت ذكرت أفضل المناطق في بانكوك بالنسبة للمدة كالتالي :
فوكيت : 7 ايام ... شيانج ماي : 4 ايام او ثلاثة ... بانكوك : 3 او 4 ايام في نهاية الرحلة
(فوكت) جزيرة تتميز برحلاتها البحرية .. واللألعاب المائية ... ولا تنسى (( فنتازيا )) عرض روعة
وكذلك ( صن ست ) افضل غروب في العالم .. بس خسارة انا رحت وماطلعت الشمس ذاك اليوم غيوم
كذلك اعلى نقطة في فوكت ... واشياء كثيرة في فوكت ...
(شيانج ماي) مدينة الزهور ... والطبيعة .. تتميز بشلالاتها وبعض الرحلات الممتعة مثل ( الفنت فارم )
اللي هي مزرعة الفيلة حيث تبدأ في عرض للفيلة ثم ركوب الفيلة مرورا بالمرتفعات ثم عبور النهر
على الألواح الخشبية ثم ركوب عربات تجرها الثيران ثم بعد ذلك وجبة الغداء ( بوفية معقول نوعا ما )
ثم المرور على عرض القرود ثم حديقة الورود ....
ايضا هناك رحلة تمر بأكثر من معلم سياحي وتشاهد القرويات (( ام ارقاب طويلة )) على الطريق
وبها بعض المعابد ... بس انا ما رحت للمعابد لأني لا احبها ...
2 التذاكر الدولية الكبار 2700 ريال والصغار 2000 ريال (( طيران الخليج ))
التذاكر الداخلية انا اخذتها من الرياض ثلاثتنا بسعر 3000 ريال شاملة كل التذاكر
وهذي غلطة ... الرحلات الداخلية عندهم كثيرة بالهبل ورخيصة مرة يعني من المطار
تقطع التذكرة وعلى الطيارة على طول ... ( عنده اربع شركات طيران )
الفنادق تتراوح مابين 100 الى 150 دولار لليلة ... ( طبعا الغرفة المزدوجة )
مع الأفطار ..
المصروف اليومي التقريبي 500 ريال (( مرفة جدا جدا )) وجدا بعد .. ههه
انا ما حسبتها بس هذا مبلغ كبير على اليوم الواحد ويوم عن يوم يختلف ...
3 سعر صرف الدولار الى عملتهم : ال 100 دولار = 3750 بات تقريبا
4 التأشيرة زي ما تبي من السفارة او المطار الشخص 100 ريال
انا اخذتها من الرياض لمدة شهرين .. بس من عندهم من المطار يعطونك لمدة 15 يوم بنفس السعر
وأي يوم زيادة 50 ريال للشخص .. يعني خذها من السفارة احسن لك ...
5 الفنادق برشحلك الآتي : (( مجربة .. سكنت فيها ))

• بانكوك عندك فندق (( اماري بوليفارد )) حلو مرة للعوائل

فية فندق اسمة (( لاند مارك )) يقولون حلو بس ما جربتة

• فوكيت عندك فندق (( اماري كورال بيتش )) فندق روعة وعلى البحر مباشرة

في شاطئ الباتونج ( اللي هو شاطئ الوناسة والحياة والحركة )
فية فندق (( مريديان )) حلو بس ماهو بالباتونج ... يبعد عن الباتونج 10 دقائق
وتبي رأيي اسكن في (( اماري كورال بيتش ))

• شيانج ماي عندك فندق (( الشيراتون )) حلو وممتاز يقع على ضفاف النهر

وقريب من البازار نايت ( السوق الليلي )
فية فندق ثاني اسمة (( رويال برنسس )) يقع في وسط البازار نايت
ايضا هناك فندق حلو اسمة (( شيانج ماي بلازا ))
واذا تبي رأيي اسكن في (( الشيراتون ))

• بالنسبة للحجز اذا تبي تكون في السليم احجز من هنا خصوصا ان لغتك صفر على قولتك

ولو بغيت تحجز من هناك مافية مشكلة يوجد مكاتب بالمطارات لحجز الفنادق بس لا تنسى
تفاصلهم بالسعر ....
6 الرحلات الداخلية ما فية مشكلة خذها مناك احسن لك (( ارخص ))
وطياراتهم على قفا من يشيل بالهبل خصوصا من الصباح الى العصر
وحدة ورا الثانية مافية اي مشكلة بالحجز .... واللغة لا تشيل هم بتمشي نفسك ...
مدة الرحلات لا تتجاوز الساعة في كل رحلة ... بس بقولك شي مافية
رحلات دايركت بين فوكت وشيانج ماي ... لابد من مرور بانكوك ...
المواصلات من المطار الى الفندق بالتاكسي تاخذة من المطار بسعر لايتعدى 60 ريال
7 من ناحيت الأمن تطمن الوضع آمن ولا فية مشكلة بالمرة ... ماغير اناقز انا وبنيتي بها الشوارع
ولا حولك احد ... (( بس دائما في الخارج خلك بالسليم ... اظمن لك ... شكلي خوفتك بها الكلمة الأخيرة
عموما لا تخاف الوضع مطمئن لدرجة الوناسة ... ))
بالنسبة للأوقات بقولك شي بعد 12 بالليل خلك بالفندق أحسن لك ... لأنك بعد ها الوقت راح تشوف مناظر
ما تعجبك انت والعائلة ... يعني 12 وانت بالفندق ...
8 مواقف النصب الحمد للة ماتعرضت لها ابد ... بس خلك مركز خصوصا بالأسعار ( خلك ذيب )
9 اسعار التكاسي : ما راح تحتاج للتكسي كثير لأنك راح تحجز لرحلاتك السياحية من المكاتب
السياحية المنتشرة بالشوارع ( هج عن المكاتب اللي فيها عرب ) وراح يجيك الباص بالفندق الصباح
وياخذك للرحلة وبنهاية الرحلة يرجعك للفندق ...
والمشاوير القريبة عندك ( التوك توك ) ارخص من التكاسي .. بعدين وناسة وسيلة جديدة علينا ...
انا احيانا آخذ التاكسي ب 150 بات بالساعة يعني 15 ريال .. عموما ما تحتاج للتاكسي ..
نصيحة : في بانكوك زحمة مرة حاول تستخدم السكاي ترين ( القطار ) ...
0الاسواق :
التسوق غالبا في بانكوك خلة للثلاث ايام الأخيرة ...
اهم المراكز التجارية في بانكوك هي :
ابداها ب سيام باراجون ثم سيام سنتر ثم سيام ديسكفري ( وهذي كلها ماركات وغالية)
كلها جنب بعض تطلع من واحد تدخل على الثاني ...
اذا طلعت من سيام ديسكفري أعبر الشاعر من خلال جسر المشاة الى
المركز النابض والحلو والروعة والرخيص نوعا ما اللي هو (( M B K ))
وملاصق لة ( طوكيو سنتر ) ...
واذا تبي نصيحتي خليك على ام بي كي وطوكيو سنتر احسن لك ...
نصيحة : لابد من المفاصل بالسعر يعني اللي يقولون لك ب 1000 بات قلهم ب 200 بات
وراح يوافقون لك ...

• فية عندهم اكشاك بالشارع وبسطات رخيصة مرة ...

محلات الماركات المقلدة تلقاها في ( نانا ) منطقة العرب .. وهي كثيرة
احسنها محلات ( فريدة علي ) ومحلات امينة .... وغيرها ...
(((استفسارك الأخير )))
الأماكن السياحية :
اولا بانكوك :
1 سفاري بارك ( عروض حلوة لأسود البحر وعروض الدلافين وعرض الكاوبوي
والعرض الأروع على الأطلاق جيمس بوند .... لا تفوتك .... )
2 دريم وورلد ( ملاهي حلوة )
3 السوق العائم ( تتجول على قارب وتشاهد قوارب الفواكة حولك ... يبيعونك بالغصب ههه
كذلك تشاهد محلات التحف والهدايا ... تتسوق وانت بالقارب ما تنزل ... حلو مرة .. لايفوتك )
4 المعابد ( انا ما احبها ما رحت لها )
5 بعض الرحلات السياحية داخل وخارج بانكوك .
ثانيا : فوكيت
1 فوكيت فنتازيا ( عروض حلوة ثم العرض الأروع على الأطلاق مدة ساعة ونصف
يبدا الساعة التاسعة مساء .. يعني رح الساعة 7 شاهد العروض اللي قبلة ...
وفية عندهم صالة طعام كبيرة وبوفية حلو .. يوجد قسم للأكل الأسلامي )
2 الرحلات البحرية ( رحلة الى جزيرة بي بي + رحلة الى جزيرة جيمس بوند)
وحدة منهم تغني عن الثانية ...
3 ركوب الفيلة والمرور بين اشجار المطاط والمرتفعات ...
4 الألعاب المائية بالشواطئ ...
5 اعلى نقطة في فوكيت ...
6 ( صن ست ) افضل غروب في العالم (( اذا انت رومانسي رح لة ... ههه ))
بس على الله تطلع الشمس ذاك اليوم .. انا على بالي رومانسي اخذت المدام ورحت
بس ما طلعت الشمس كان الجو غيوم ...
7 بعض الرحلات لصيد السمك ...
8 المعابد بس ما احبها ...
ثالثا : شيانج ماي
زي ما قلت لك بالبداية ( الفنت فارم ) مزرعة الفيلة ... قلت لك وش فيها بالبداية ...
الشلالات وبعض الاماكن اللي ذكرتها لك في البداية .....
وسلامتك ,,,,,
مع اطيب الأماني برحلة ممتعة ان شاء الله
وأي خدمة ثانية انا حاضر
اخوك / خالد

تايلند
إختيار موفق
أنا رحت لبوكيت وعجبتني كثير وأتمنى أزورها مره ثانية وايضا بانكوك روعه للتسوق أما شنغاي فاللأسف لم يحالفني الحظ بزيارتها
واذا لك خاطر في مزيد من التفاصيل تفضل بزيارة تقرير رحلتي عن بوكيت بالصور وهو موجود بالتوقيع
تحياتي

c diorالله يعطيك العافيه على هذا الشرح
مع تحياتى

وستا
حبيب البي (( وستا))
الف شكر على اخلاقك يا ذوق
ويعلم الله اني استفدت الكثير من ذا المنتدى
لذلك وجب علي ان اساعد اي احد يبي مشورة
من خلال خبرتي المتواضعة في تايلند
لك مني كل الود والأحترام
دمت بود
اخوك / خالد

انا اشهد انك وسيع البال والخاطر تحملته استفساراتي الكثيره واتحفتني بملخص في منتهى الروعه
تدري اول ما قريته دايركت سويت طباعه احلى نشره سياحيه من احلى مرشد سياحي

ماشاء الله اخونا c dior
ماخلا لنا اي شي ينقال يعني مافيه زياده على سلامه ابد
ولو اني انصحك تسكن في سوفتيل افضل وانظف وفيه غرفه وصاله ومطبخ صغير وبسعر خيال
0ريال
اما باالنسبه لتذاكر الداخليه احجزها من النت افضل وعندك طيران ( ون تو قو )
الرحله من بانكوك الى فوكيت ب 340 ريال للشخص رايح جاي
اما الفيزا طلعها من المطار افضل لان انت ماراح تجلس اكثر من 15 يوم
انا طلعتها من المطار وتأخرت يوم وماقالو شي لان تأخير يوم عادي بس اكثر غرامه
ام واي خدمه امر

البرنسيسه
اهلين (( برنسيسة ))
منك نستفيد
حنا نقطة في بحرك
دمتي بود