الحمد لله عدت من اندونيسيا قبل اربعة ايام انا واصدقائي الثلاثة وكانت رحلة موفقة ولله الحمد ولكن حدثت لنا منغصات تجعل الشخص ينفر من هذه البلاد رغم روعتها . واليكم ماحصل معي حيث حصل معي ثلاث مواقف .
الأول : اول مانزلنا المطار توجهنا لمكتب الفيزا ودفعنا 100 دولار لأربع فيز ثم توجهنا للجوازات ويوم وصلنا عند الموظف اللي كان يمشي كل اللي قبلنا الا نحن اصحاب الجواز الاخضر قال "هديه هديه" أنا طبعا جلست اطالع في جوالي واكلم اخوياي عشان اسوي نفسي ماني لمه ، المهم كرر كرر . يقول هديه 100 . انا سويت نفسي مادري وش السالفه وقلت ايش .. قال "جيب هديه" 100 وقام وكتب على ظهر الفيزا 100 انا مادري وش يقصد 100 ريال او 100دولار او 100 الف روبية . قلت له انا دفعت 100دولار للفيزا وخلاص .. وقام يكرر كلامه وعرّق وحالته حاله وعصب وقام رمى الجوازات في وجهي وقال يالله GO بدون مايختم . رجعت لمكتب الفيزا عشان اعلمها قلت يمكن تقول له استح على وجهك وقلت هذا يطلب مني فلوس وانت اخذت مني حق الفيزا ليش الفلوس.طبعا انحرجت وقالت انا اخذت منك حق الفيزا 100دولار وغير كذا انا مااعرف شي . رجعت بالصف مره ثانيه واشوف كل العرب والخليجيين يمشون بسرعه بدون تعقيد يوم وصلني الدور عند موظف غير الاول قام طالعني ووجهني لنفس الموظف الزفت الأول (متفقين بينهم) رحت له وقال اوه "يو اقين" جيب هديه هديه 100 ، انا تعبت من الوقفه مرتين وتأخرت لان السواق كان ينتظرني برا وكل شوي يدق وخفت اشتكيه يمشوني هنا بس يأخروني في العفش او اي شي ثاني قمت طلعت 100ريال وعطيته اياه واخذها وختم جوازاتنا ومشانا حسبي الله عليه الناس كلها تمشي طبيعي الا حنا .. ليش هذا الاستغلال ؟ وين سفارتنا ماتعالج الوضع هناك ؟؟
الموقف الثاني : في رحلة العودة توجهت لكونتر وزن العفش وبعد الوزن قال انتم أربعة وكل واحد منكم له 20كجم يعني يحق لكم مجانا 80 كجم فقط وعندكم زيادة 20كجم لازم تدفعون حقها 800 دولا الحرامي .. يبي يسرقنا . طبعا حجزنا على الخطوط الكويتية قلت له ياطيب انا جاي من الرياض قال لي موظف الخطوط الكويتية ان كل واحد يحق له 40 كجم مجانا يعني لنا نحن الاربعه 160 كجم .. قال لا في اندونيسيا يختلف غير الرياض والكويت قلت ياعمي الخطوط هي نفس الخطوط والطياره نفس اطياه ايش اللي يختلف ؟ قال خلاص ادفع حق 10كجم 400دولار قلت لا مامعي انا يحق لي 40 كجم قال طيب ادفع حق 5 كجم . انا عرفت انه نصاب من يوم ماصار ينزل في الوزن ويخفض عشان ادفع فلو كان صادق قال ادفع كذا ولا شيل شناطك . بعدين انا فعلا الموظف في الرياض قال لي لكم 160كجم وكان وزن عفشنا كامل 110كجم ولا كلمنا
المهم قال لازم فلوس انا فهمت ان ماراح يمشينا الا بفلوس قمت طلعت له 100الف وقلت مشينا ساعدنا حنا سعوديين ومغلوبين على أمرنا في اندونيسيا فلو كان في مراقبه من السفاره ماستغليتونا طبعا قال لا . زود افلوس انت المفروض تدفع 800دولار وانا بمشيك ادفع زياده قلت له مامعي . المهم مشانا الله لايوفقه بعد مارجع وحده من الشناط الصغار قال شيلوها معاكم نكاية فينا عشان مازودنا البخشيش .
الموقف الثالث : توجهنا للجوازات لتختيم الخروج وكان السرا يمشي على طول اجانب وخليجيين وعرب لين جانا الدور اخذ الجواز مني وطالع بي وقال جيب "هديه" 100 . انا سكت وطالعت به كأني ماني عارف ايش يقول قام حط الجواز على الطاولة وقال هديه جيب ميه . قمت وطلعت 100الف والناس كلها تطالع ورئيسه يطالع وعطيته الفلوس ابتسم وقال هديه فور مي ؟؟ يعني كأنه ماطلبها . حسبي الله عليه . مشانا وكان يبغى يطلب من كل واحد من خوياي 100 بس انا وقفت عنده لين مشاهم كلهم عشان يعرف انهم تبعي وشكله حقد علي . ختمنا ومشينا واحنا بصراحة
متضايقين من هالمواقف اللي تصير معنا احنا فقط يالسعوديين . والله العرب والاجانب والخليجيين كانوا يمشونهم زي الحلاوة حتى اني بعد الجوازات استفسر من كذا واحد يقول ماطلب مني شي ولا يقدر اصلا . يعني ليش صاحب الجواز الاخضر مستهدف ومستغل
رسالة ارجو ان تصل الى من يهمه امر السعوديين في اندونيسيا ويضعون حد لهذه الممارسات . طبعا انا مااتكلم عن تزويد السعر من قبل الباعه والمؤجرين والتجار علىالسعوديين لأن هذا بحر واسع ولاتقدر تسيطر عليه وهذولا يمكن يعالجهم عدم الاقبال عليهم .
ولكن اتكلم على المستوى الرسمي .. جوازات ، مطارات وبوردينق وعفش .
والله انه رغم انبساطنا في اندونيسيا الا ان هذه المواقف نغصت علينا ويجب عدم السكوت
اسف للإطاله ولكن حبيت انقل لكم تجربتي