السلام عليكم ورحمة الله وبركاته
اولا وقبل كل شي الله يوفقكم دنيا واخره ويكتب لكم اجر كل من طاف وصلى وسجد وصام بالبيت الحرام والمسجد النبوي والمسجد الاقصى ويحجز لكم مكان بالفردوس الاعلى مع افضل الخلق محمد عليه افضل الصلاة والتسليم
ثانيا قسم بالله اني متابع لهالمنتدى من فتره وبجد وبدون مجامله والله يشهد على كلامي انه افضل منتدى تابعته شامل بكل شي الله يوفقكم على ماتسوونه لااخوانكم
ثالثا يااخوان قسم بالله حاس اني ضايع بالطوشه من جد زواجي بعد تقريبا شهرين من الان في تاريخ 29 - 6 - 1432 ه
وابي يكون السفر ثاني يوم وهو يوم الخميس لان الزواج بيكون الاربعاء لمدة 13او 14 يوم
وابي اروح شهر عسل ومن جد ماادري وين اروح شفت تقارير الاخوان للنمسا وفرنسا جتني ام الركب من الابداع اللي شفته وميت على الروحه لاوربا بس خايف تكلف حاط ميزانيه شامله كل شي تذاكر سكن اكل تمشيات تسوق كل شي من مطار الرياض الى الرجعه باذن الله الى الرياض تقريبا 20 الى 25 الف هلي تكلف والا لا لاني من جد خايف طبعا ماسويت شي الى الان لافيزا ولا حجز ولا شي بس ودي اروح كم دوله او اي برنامج حلو لانه شهر عسل تكفون ابي فزعتكم نبي ندلع المدام باوربا بس والله خايف من التكاليف وابي فزعتكم
لااحد يقولي تابع تقارير الاعضاء والله تابعت بس من جد دخت ابي واحد يقول انا لها ويعطيني برنامج شامل كل شي احمله على وورد واطبعه واتوكل على الله
ودي استاجر سياره بس خايف اضيع ولو اخذت قارمن ابي احداثيات كل شي
من جد والله يعلم وش كثر محتاج فزعتكم
اذا الميزانية ماتكفي دلوني على دوله حلوة تكفوون
فكرت بماليزيا بس احسها صارت قديمة كل من تزوج راح ماليزيا ودي اغير تكفون الله يوفقكم
واذا فيه احد عنده ملفات والله مستعد اجيه لبيته واخذها اذا مو قادر ينزلها
واذا احد افادني تكفوون ابي شي انزله واطبعه عشان ماادوخ راسي
الله يوفقكم دنيا واخره