1. طبعا بخصوص الاقامة في لبنان تقدرون تستعينون بموقع booking - alwaseet


2. موقع بوكينج موثوق ومجربينه وتقدرون تحجزون منه دايركت


3. 1- بخصوص البيزات الدولار يساوي 1500 ليرة


4. 0ليرة تعطونها للحمالين الي بيشلون الشنط .


5. نبتدي الحين بالبرنامج

بسم الله الرحمن الرحيم
السلام عليكم ...
حضرت لكم برنامج لمدة 10 أيام بحسب قرب المناطق من بعضها وجميع التفاصيل ..
طبعا البرنامج ينفع للصيف والشتاء بس خلينا نقول للصيفية 80 بالمية

طبعا بخصوص الاقامة في لبنان تقدرون تستعينون بموقع booking - alwaseet

موقع بوكينج موثوق ومجربينه وتقدرون تحجزون منه دايركت

والوسيط للاشخاص الي يبحثون عن بيوت او شقق فندقية مباشرة من اصحابها غالبا ما يكونون عارضينها شهريا بس يعني الي محطي في باله ينزل اكثر عن اسبوع وياه عايلة ومصاريف السكن غالية في لبنان انا افضل السكن في شقة فندقية او شقة ناجرها , وبالنهاية نستخدمها فقط للمبيت

1- بخصوص البيزات الدولار يساوي 1500 ليرة

وانا افضل انكم تصرفون من الامارات حتى المطار يكون غالي وحاولوا ما تكون الصرافة بس من فئة المية دولار يعني نوعوا الفئة بين الدولار و و 5 و10 و 20 و 50 دولار ..
لان موب الكل يشل فكة المية دولار ... ولما تكونون في لبنان اشتروا اي شي من محل او مطعم اول يوم وخليه يرد الباقي بالعملة اللبنانية و استخدموا منها لكن قبل لا ترجعون باخر يوم خلوا معاكم 2000 ليرة احتياط وتصرفوا فيها , لما تردون تصرفونها برع لبنان بتخسرون وايد في العملة .

0ليرة تعطونها للحمالين الي بيشلون الشنط .

2- طبعا سيارة اجار او سواق اهم شي لان لبنان من دون سواق او سيارة ما تقدر شي لأنه عندك مشاوير تمشي وفسح والتاكسي غالي .. طبعا لان ممنوع احطي أرقام على العام
من خلال تجربتي انا واهلي عندي ارقام سائقين واهم شي ان فيهم ذمة وضمير وامانة , يعرفون كل الاماكن السياحية والاسعار وعندهم طولة بال وسياراتهم نظيفة .. يعني بالمختصر بيوفرون عليكم وايد من الوقت والجهد ..وبخصوص محلات تاجير بعد في عندي رقم كذا محل وفالكم طيب ..أي وقت بغيتوا الارقام موجودة عندي .. بس أهم نقطة تتصلون وترتبون كل شي قبل السفر وتحجزون موعد معاهم.
طبعا انا حطيت كذا اختيار ممكن انتوا على راحتكم تلغون وتضيفون بس حبيت اذكر اهم المناطق السياحية في لبنان مع ان والله حرام ظلمنا وايد اماكن

نبتدي الحين بالبرنامج

طبعا للاخوان والاخوات الي يحسون ان البرنامج ثقيل ممكن يشلون منه على كيفهم والي مطولين بالسفرة أكثر من 10 ايام ممكن يوزعون البرنامج براحة اكثر لاني رح اسويه شامل لاكثر المناطق سياحة واغلب المناطق الحلوة في لبنان وأي تفاصيل ثانية انا جاهزة
1- اليوم الاول : اذا كانت الرحلة في فصل الشتاء وممكن زيارتها في فصل الصيف والتمشي فيها والغداء في مطعم اسمه العرزال وهو يقدم مناقيش وبطاطا مشوية وعنده مشاوي وقعدته حلوة, منطقة فريا وعيون السمان هي الوجهة الأساسية وخصوصا لما ينزل الثلج , طبعا التوجه يكون في الصباح ويوجد أنشطه كثير للقسام بها في الفريا منها التزلج على الجليد ومنها أيضاً ركوب الترفليك أو التلفكيك ومنها أيضاً التزلج بالسيكي دووطبعا لما يحين الغدا ارشح مطعم الادغال ( غالي) ممكن تروحون لمدينة فقرا وفيها مطعم مميز اسمه الاناطر وبنفس الوقت تزورون الآثار الرومانية ومن بعدها ممكن تزورون مدينة ( دينو سيتي ) فيها تماثيل ومجسمات للعصور البدائية وهي على طريق فريا ..مدينة الديناصورات تحديدا تقع في بلدة اسمها " عجلتون " ..طبعا الوقت رح يكون صار المسا وممكن تقضونه ايضا في بيروت وفي مطعم الفلمنكي موجود بين السودكو والاشرفية والاكل عنده خطير .
اليوم الثاني : افضل الاماكن البعيدة تروحون لها من الصبح مثل مدينة الآثارالمشهورة بعلبك , طبعا افضل طريق للذهاب هو عن طريق نهر الكلب وخلال الطريق رح يعجبكم المنظر كلها قرى واحياء صغيرة وشجر ومن بعدها ممكن تزورون غابات بلونيا رائعة جدا بمعنى الكلمة وطبعا وانتوا راجعين بتمرون على مدينة زحلة ( مدينة العنب ) وهي من اجمل المدن في لبنان على وجمال نهر البردوني وبخصوص الاكل الخيارات متعددة من المطاعم وأفضلهم مهنا - قريطم - نمير واكيد لا تنسون اكل البوظة بعدها تاخذون طريق العودة لبيروت عن طريق شتورا وراح تمرون على بحمدون وعاليه .. ويوجد سوق قديم في عاليه ممكن تاخذون عليه لفة وفي اشياء وايدة تناسب اغلب الاذواق .
المسا ممكن تزورون الجيون مول ( سيتي مول ) وتتعشون فيه وتتمشون وتلعبون اليهال اذا كانوا وياكم يهال .. وطبعا اغلب الماركات الموجودة فيه لها افرع في دبي بعد .
اليوم الثالث : الوجهة رح تكون شمال لبنان وتروحون باتجاه نهر الكلب ( كسروان ) مارين بالطريق على جونيه جبيل البترون وغيرها حتى توصلون لطرابلس ..قلعلة المصيلحة او المسليحة على طريق بيروت طرابلس و لازم تمرون على قصر منطقة بخعون شي خيالي ,فقصر بخعون أو " قصر الاحلام " من معالم لبنان التراثية المميزة ومساحة المشروع 5000 متر مربع، يضم العديد من التحف من مختلف الحضارات القديمة: الفرعونية والفينيقية والرومانية والعربية، فضلاً عن رموز التراث اللبناني.
والغداء بيكون في مطعم اسمه الشاطر حسن , اكله ما يتفوت
ومن بعدها تكملون على منطقة عكار منطقة جميلة جدا ورح تمرون بعدة مدن وقرى ..
المسا وانتوا راجعين تمرون على المحلات وسوق الكسليك للشوبينج وطبعا للعشا بيكون في مطعم السنيور في منطقة الكسليك وفي أيضا قهاوي وقعدات ممتدة في هالمنطقة .
اليوم الرابع :ممكن تبدونها زيارة محمية شجرالأرز بمنطقة الشوف وبعدها الذهاب الى قصر بيت الدين وزيارة متحف ماري باز ومنها الى قصر موسى معماري وهالقصر فيه تحف روعة وممكن تمرون على مغارة كفر حيم وبعدها التوجه الى مطعم الباروك وتناول وجبة الغداء فيه ومن بعدها تروحون ABC الأشرفية وهو مول كبير والتمشي في شارع الحمراء وبخصوص العشاء عندكم مطاعم كثيرة في المول ولكم حرية الاختيار والسوق الي فيه رخيص وممكن تلاقون وايد اشياء حلوة
اليوم الخامس : طبعا زرتوا الشمال والحين دور الجنوب ..صيدا صور جزين وفي صيدا تزورون قلعة صيدا وهي مختلفة على فكرة عن قلعة جبيل ومقسومة الى القلعة البرية والقلعة البحرية وفي سوق صيدا القديم يستحق الزيارة بالاضافة الى تلة المريق مكونة من أصداف بفعل الخالق ووقت الغداء ارشح عدة مطاعم منها مطعم ذوات - مطعم فلافيلو - مطعم الحان - مطعم أربيانو - طبعا اذا كان عندكم وقت وحبيتو تكملون باتجاه صور وجزين مدينة سياحية تشتهر بمناظرها الطبيعية وينابيعها ومدينة صور مشهورة بالآثار مثل بعلبك وعنجرأما جزين فهي مختلفة تماما . والمسا تقضونه في بيروت في السوليدير ( داون تاون ) وفي مطاعم كثيرة ومن اطيب الاكل الي جربته كان في مطعم البلد .
اليوم السادس : طبعا في حال وجود اطفال زيارة مدينة الحبتور لاند مدينة العاب رائعة وممتعه في نفس الوقت وحتى الكبار ممكن يلعبون فيها وبعدها تتوجهون الى منطقة برمانا ويفضل التجول فيها لانه جوها جدا عليل وبخصوص الغداء مطعم منير بسبب اطلالته المميزة واكله اللذيذ وقعدته الحلوة ومن بعدها بلدة فالوغا وهي من مراكز الاصطياف المشهورة، ومن أبرز معالمها سراي من القرن التاسع عشر يمتاز ببوابة تتمازج في زخارفها التقاليد المشرقية بالتقاليد الإيطالية وتعتبر من أجمل بوابات قصور تلك الفترة.
والمسا في مطعم مختلف من نوعه اسمه لامب هاوس ويقدم وجبات فيه ارز ومحاشي ماعز وتقاطيع يعني قريب على الاكل الخليجي
اليوم السابع : تكون زيارة لمغارة جعيتا وتتكون من المغارة العلوية والسفلية وتاخذ 3 ساعات يعني قسموها ساعة ونص فوق وساعة ونص تحت ( مشي وبالقارب ) .. خلوا في بالكم تلبسون لبس يكون مرن وحذاء رياضة علشان ما تتعبون من أول النهار .. وخلوا معاكم احتياط جاكيت لان الجو داخل بارد
في الشتاء يسكرون المغارة اغلب الاوقات بس على حظكم اذا كانت مفتوحة حطوا في بالكم الجو بيكون بارد جدا وحتى في الصيف في برودة بس مش بدرجة برودة الشتاء وبيكون الجزء السفلي من المغارة مغلق بسبة الامطار لان منسوب الماي بيكون مرتفع ومافي مجال للقوارب تمر .
طبعا اذا كانت المغارة مغلقة تبدون اليوم من هني : بنفس المنطقة من بعدها تقدرون تزورون متحف المشاهير وتركبون رحلة من جونيه بالتلفريك تصعدون لمنطقة حريصا حيث يوجد مزار للسيدة مريم عليها السلام ( ام سيدنا عيسى ) وهو مكان مقدس بالنسبة للمسيحيين وترجعون بالتلفريك لمنطقة الركوب جونيه .طبعا الغداء ممكن يكون في احد المطاعم الموجودة في هالمنطقة وانا رح احطي كذا واحد وانتوا اختاروا مطعم مخلوف وبصراحة احب اكثر شي من عنده ( الشاورما ) - مطعم الجزيره وهذا اكل بحري وفي مونويلا بس انا شفت خدمته تغيرت رغم اطلالته الحلوة الي على البحر ( سيىء ).
وممكن انت وراجعين تمرون على مدينة الحيوان بجانب نهر الكلب ..ممكن من بعدها تريحون في كوفيه شوب في الطريق او محل للحلويات وفي بالطريق طبعا عدة محلات منها محل اسمه سيبون للايس كريم والحلويات العربية والكيك وعنده قعدة حلوة - في ايضا محل مسك دويهي ايضا نفس الشي
المسا تروحون لمنطقة الروشة وتتمشون على الكورنيش والعشا بيكون في احلى مطعم على الروشة واسمه الباي روك كافيه وهو مطل مباشرة على صخرة الروشة .. وتقدرون تتعشون وتاخذون حلويات او عصائر وتسهرون فيه .
اليوم الثامن : طبعا هالمدينة مدينة بيبلوس ( جبيل ) تستحق الزيارة وزيارة القلعة والتمشي بسوق جبيل والغداء في احد مطاعمها ولك حرية الاختيار وطبعا اغلبها ماكولات بحرية ومشاوي , لكم حرية الاختيار بس انا حبيت مطعم كسار - مطعم لوكندا وفي العودة تمرون على مدينة أفقا ..من مغارتها ينبع نهر أدونيس المعروف حاليا بنهر إبراهيم ..ومدام نحنا في جبيل نكمل على مدينة البترون وفي جولة على المعالم الأثرية في البلدة، لا تستطيع إلا أن تقف مشدوهاً أمام ضخامة السور الفينيقي على الشاطئ، وهو عبارة عن كسبان رملية تحجرت في الطور الجيولوجي الرابع وأمام المدرج الروماني في حي مراح الشيخ، تتملكك الرهبة وتعود بالخيال إلى سطوة الرومان في تلك الأزمنة الغابرة. وطبعا كنيسة مار جرجس يسمونها أيا صوفيا التركية العربية لانها شبيهة جدا لها
ول " عصير الليموناضة " في البترون نكهة خاصة، وهي المدينة المشهورة ببساتين الليمون التي تحيطها بسياج أخضر، وعلى مدار السنة، يأمها السواح واللبنانيون من كل المناطق للتلذذ بمذاق عصيرها الفريد , واخيرا كالعادة السهرة والقعدة المسا تحلى في بيروت وضواحيها وارشح العشا في مطعم كبابجي في الحمرا له فرع وله عدة افرع في مناطق قريبة
اليوم التاسع : التوجه الى زغرتا وزيارة بحيرة ( بنشعي) آية من الجمال وحواليها في مطاعم وقعدات والحلو ان مافي زحمة في المكان وتقدرون تنزلون للبحيرة عن طريق قوارب صغيرة , وفي ايضا مزارع زيتون جميلة والشجر شكله رائع ومميز وفي طريق العودة ممكن تمرون على مدينة عنجر وتزورون قلعة الامويين بمجدل عنجر ..ومن بعدها تتوجهون لمتحف الحرير في مدينة بسوس ( منطقة عاليه )
ويوجد ركن لبيع بعض المتوجات الطبيعية والأصلية ورخيصة الثمن .. واخيرا متحف الاحياء البحرية يستحق انكم تمرون عليه ويقع في منطقة ( الجديدة )..طبعا ما ننسى مدينة بشري الي فيها بلدة التي تعتليها أقدم غابة أرز في لبنان و العالم. أعلى جبال لبنان يتميز قضاء بشري بمناظره الطبيعية الخلابة، و بالأخص وادي قاديشا، الذي يوجد فيه أول دير في لبنان وتستحق الزيارة . وطبعا اذا حبيتو شي مميز وخفيف انصح العشا يكون من عند مطعم ملك البطاطا في شارع الحمراء او اي مطعم شعبي لان اغلب الاكل رخيص ولذيذ
اليوم العاشر : زيارة جبل لبنان مرة اخرى وبالتحديد بسكنتا تنتشر البيوت فيها وحدائقها على أقدام جبل صنين ومن بعدها ممكن تاخذون جولة في مدينة بيت مري وهي مدينة فيها 4 هضاب جميلة ومرتفعاتها متناسقة مع بعضها وفيها شجر صنوبر كثير وطبعا في مطعم الجنة الغداء فيه احلى بسبب المناظر الخلابة والمكان الي يقع فيه المطعم والمطل على الجبل ومن بعدها تزورون بكفيا مشهورة مياهها المعدنية، ومن أهم ينابيعها نبع النعص المعروف منذ القدم بمنافعه الشفائية، بحيث تحلق حوله عدد من الفنادق التي يقصدها من يسعى إلى معالجة المشاكل الصحية. ومن بعد الظهر تكون التمشي في بيروت أحلى
وممكن تزورون الداون تاون مرة اخرى وفي محلات كثيرة للتسوق فيها بالاضافة لمحلات ماركات عالمية ايضا في منطقة فردان .
تقريبا عطيتكم اهم المناطق المهمة في لبنان واتمنى ما اكون نسيت شي
صارلي 5 ساعات ونص وانا اكتب في هالتقرير , وما أبغي غير دعوة صادقة من قلبكم
لاختكم ..