هلا أخوي محشش أفندي ههه بصراحة أسمك غريب جدا ومضحك في نفس الوقت عموما هذي الرحلة تحتاج لوقت للتخطيط أنا بشوف ردود أخواننا الأعضاء وعطني وقت بسيط راح ينزل لك فيه برنامج إن شاء الله يعجبك بس خليني أستفسر شوي عن الجبل الأخضر وبعض المناطق وأرد عليك ومبروك الزواج مقدما بس بصراحة من الحين أقول لك 21 يوم كثير على عمان 10 أيام تكفي لاتقول أبغى أحطمك بس بصراحة لأنك عريس أما أذا كان معكم أطفال شهر ماتكفي ههه تحياتي لك يالغالي

والله مابي ازعلك بس، يعني،،الوقت ما مناسب لعمان وانصحك تكمل على ماليزيا لأن حرام تأجل السفرة لين يتعدل الجو، لأنه بهذاك الوقت الجو يكون حر، يعني مسقط (والي حواليها مثل الجبل الاخضر)حلاتها شهر يناير وفبراير، براد وانشطة وحيوية وبالصف حر حر حر،،اما صلالة بيوليو الوقت يبدا معاها الخريف والجو يحلو بين شهر سبعة وثمانية بس صلالة كلها تكفيها خمس ايام،، انا اقول تخلون عمان لشهر عسل ثاني "اكيد بيكون اقصر من 21 يوم" وودي المدام ماليزيا خلها تستانس يا راجل،، والا شو على بالك شهر العسل مرة وحدة بالعمر ؟ لالالالالالالالالا ههه

هلا بالطيب الغالي... عزيز وشوفتك منوه
OMAN44
أدري يا خوي إنها كثير... بس أنا حاط 15 بالكثير... 5 مسقط 5 صلالة 5 الجبل الأخضر
لأني أحب الطبيعة... بعدين أنا وزوجتي نبغى نزور عمان.. ف إن شاء الله راح تكون حلوه لأننا متحمسين
عقبال ما نجيب أطفالنا ويلعبون مع أطفالك
تسلم يا خوي راح أتعّبك

هلا باللي لفاني يا هلابه... عدد دقات قلبي في غيابه
مسقطية
راح أوديها كل مكان إن شاء الله والله يساعدني على سعادتها
كل سنه شهر عسل إن شاء الله
يسلم قليبك مسقطية ع الرد

أخوي الغالي
أولاُ أقول مبروك عليك الزواج مقدماً ، ومنك المال ومنها العيال ، ولا تنسى تدعي أخوك في يوم العرس .
وثاني شيء بقول حياك الله في دارك وبين أهلك وناسك ، وعمان تتشرف بكل زورها الغاليين وخصوصاً أعضاء منتدانا الرائع .
بالنسبة لتوقيت قدومك الى السلطنة ألا وهو 26 يوليو ، تراه توقيت طيب لزيارة صلالة لان الجو والخضرة خلال هذه الفترة راح يكون عال العال ( بإذن الله ) ، وإن شاء الله تنبسط في زيارتك ، بس بالنسبة للعاصمة مسقط والجبل الأخضر فالجو راح يكون حار جداً خلال هذه الفتره ، وأنت عاد براحتك إذا حبيت تزورها .
بس اقولها لك وبصراحة أحلى وقت لزيارة مسقط ومنطقة الجبل الأخضر هي خلال شهر نوفمبر و ديسمبر حيث الجو الرائع والجميل ، وفي الجبل الأخضر يكون موسم حصاد الرمان الشهي :36_1_51 يمي يمي ).
وإذا حبيت أعمل لك جدول لزيارة صلالة أبشر وفالك طيب بإذن الله .
وإذا في خاطرك شيء تفضل وفالك طيب .

مرحبا بك أخوي
الف مبروك لك , والله يسعدكم ويهنيكم ويرزقكم المال والبنون
نصيحة مني أنا سبق وزرت ماليزيا وعمان .. واثنينهم بلد جميل وفعلا تستحق الزياره
لكن ك شهر عسل وبميزانيتك فأنا أنصحك وبشده انك تحول على ماليزيا فهي مكان مثالي للعرسان
فيها جزر رائعه وأماكن سياحية أكثر من كثيره ومتنوعه وأسعارها جداا مناسبه ويكفيك أهم شي
جوها الرائع ، اللي راح بمشيئة الله يكون عنصر مهم بالرحله
بالاضافه الى ان ميزانيتك - ماشاءالله - تساعدك على ذلك بسهوله حتى بالامكان تروح اسبوعين اوروبا
وتحصل على أحلى شهر عسل ..
ممكن تأجل عمان لشهر عسل ثاني ان الله أراد ، هي دولة جميله لكن لاتنفع لشهر عسل
مثلا صلاله بطبيعتها وجوها الرائع .. لكنها تنفع فقط للعوائل الكبيرة والكشتات والرحلات .. والتجمعات بشكل أدق
لكن لعرسان جدد ببداية حياتهم ... أرجع أقول حوّل على ماليزيا .. هذا شهر عسلكم الأول المميز ، والأنسب له أن يكون بمكان مميز مثل ماليزيا ,
وفقك الله لما يحب ويرضى

الف مبروك لك , والله يسعدكم ويهنيكم
انا انصحك في ماليزيا

الف مبروك ومنك المال ومنها العيال عمان حلووه والخليج كله حلوو بس حرام شهر عسل تقضيه هناك لانه الخليج كله نفس الشي واللي خلاني اتكلم ميزانيتك ماشاء الله حلوه جدا تكفيك تروح النمسا وسويسرا لمده اسبوعين واحسن لك حتى من ماليزيا بما انك شايفها بس نصيحه ادخل على بوابه النمسا والا سويسرا وشوف الجنان عسى الله لايحرمنا من جنان الاخرره حرام المبلغ تصرفه على شي ممكن تروح له بااي وقت انا رحت بصيف 2007 النمسا وفرنسا لمده اسبوعين والمبلغ كامل من طيران وفنادق ومواصلات وصرف يومي والله ماتعدى 30000 ريال

يا جماعة خلوه يتهنا
وعمان فيها المقومات السياحية ممكن توزع فيها ال 21 يوم وفيها كل المتعه
5 ايام في صلالة
5 ايام في مسقط (منتجع بر الجصة افضل مكان تقيم فيه .. زور سوق مطرح الشعبي والكورنيش بالليل وشاطئ القرم وقت العصر والمغرب .. والمتاحف وزور المراكز التجارية عندك السيتي سنتر ومركز البهجة والحدائق مثل القرم الطبيعية والصحوة وقت المساء ......وزور اي مكتب سياحي عشان ترتب لك رحلة سياحية
ايضا انصحك تروح باتجاه الباطنة الى فندق شاطئ السوادي تقضي لك يوم وتطلع معاهم رحلة غوص (يمكن تلاقيني هناك )
2 يوم في المنطقه الداخلية بين الجبل الاخضر وكهف الهوته وجبل شمس (انزل في فندق الجبل الاخضر)
1 يوم وادي بني خالد في الشرقيه أو تروح العين الثوارة في نخل (نخل اقرب في المسافة)
4 ايام في محافظة مسندم شمال عمان اطلع من مسقط بالعبارة السريعة (يوجد موضوع خاص بهذه العبارات) ست ساعات لغاية ما توصل وانزل في منتجع الحواس الست (منتجع راقي ورومانسي) اطلع رحلات بحرية لمشاهدة الدلافين وصيد السمك
هذي كلها 17 يوم طبعا باقي الايام راح تروح في المواصلات والتنقلات بين كل هالاماكن
مبارك عليك الزواج مقدما استمتع شهر وبتشوف الويل سنين ههه امزح