k.s.a-mr.m
03-12-2022 - 07:40 am
السلام عليكم ورحمة الله وبركاته
اخوني اخوتي
اشكر الاخ الاكبر حلو ومدلع بانه نصحني اروح استراليا وان شاء الله ربي يوفقنا ونروح لها
اخوني انا ماعرف شي فيها
ابيك تسوي لي برنامج سياحي لاتقل عن 20 الف
برنامج سياحي لمده 15 يوم ومجموع الصرف كيف يكون وشو العمله اللي استخدمها واهم الفنادق
طبعنا ياخون انا اللي ابيه فيه 1 _ امكان ترفية 2 _ امكان جميله ومناظر خلابه وساحره 3 - اسواق جميله ورخصيه للهدايا والذكريات 4 _ رحلات لاتنسى 5 - حدايق
والله يوفقك لما يحبه ويرضاه
مرحبا اخوي ومشكور على كلامك
بنسبة لتفاعل في بوابة استراليا انا بتكلم عن نفسي انا اكون موجود فيها حزت الصيف او قبله لان تكثر الاستفسارات فيها
بس مثل هلوقت اتشوفني يا في بوابة قطر او في البوابة السياحية العامه علشان افيد الكل
بنسبة لك بقولك اول شي اهم المناطق في استراليا هي غولد كوست & سدني & ملبورن & بيرث & ابرسبنت
اشهر مناطق استراليا من ناحية السياحه والاماكن الترفيهي اتعد غولد كوست (ساحل الذهب )
هي مدينة على البحر شاطئها يعد من افضل الشواطى بلعالم وتطل عليها مجموعه من الابراج على امتداد الشاطئ
حوالين المدينة مدة ترفيهية ومدن ملاهي اولا السي ورلد (عالم البحار ) ثاني وحده دريم ورلد (عالم الاحلام) وثالث وحده الموفي ورلد ( عالم الافلام )
ومن غير فيها رحلات ثانية مثل رحلت السفاري وهي عباره عن سيارة اتقودكم بين الجبال واتعيشكم الحياة الاستراليا من اكل وشرب ومشاهدة الحيوانات الاستراليا ولبس الزي الاستراليا
وعندكم الاوت باك وهو عرض خيول حلو وايد وانا الصراحه كنت رافض اروح له ومو متشجع بس يوم رحت له اتمنيت اروح ثاني مره ويقدمون مع العرض وجبات العشاء وفي منها حلال ويقدمون مع العرض سماعات وفيها دبلجه بلغة العربيه ويعد من افضل العروض هناك وهو يكون بليل
وعندك رحلة الى اريف الاسترالي وانا الصراحه ماجربتها ولاكن يعلمونك حياة الاسترالين وكيف حتى اشلون يذبحون خرافهم
عندك رحلة لحديقة الحيوانات الاستراليه وهي حلوة وايد انا جربتها ومعها رحلة الى مصنع النحل لانه مشاهد حديقة الحيوان وكلهم حلوين
وفي رحلة الى مضمارات سباق السيارات حلوة بس مب مثيرة وايد
في رحلة على السيارة البرمائية حلوة اتجوبك في الغولد كوست واتشوف الغولد كوست
ومن غير في رحلات للمدن القريبه مثل الصن شاين ومثل برسبن وهم مدن قريبه من غولدكوست تقدر اتروح وترجع بنفس اليوم
ومن غير المدينة صح مب كبيره وايد بس فيها كوفيات ومطاعم حلوة والشاطئ روعه وخاصة بليل لمى تتمشى فيه ومن غير في اشياء ترفيهي في المدينة مثل بيت دراكولا وبيت المتاهه ومثل الكوفي شوب الثلجي وهاي اشياء ممكن تدخلها ضمن جولتك على المدينة
ومن غير المدينة يكون فيها سوق ليلي حلو ومن غير عندهم محلات فيها اشيا حلوة ومب غالي
ومن غير عندك السيرفس بردايز وهاي شارع كله مطاعم وقهاوي وكوفيات والعاب الترونيه وبعظ الماركات العالمية الحلوة
وعندك بعظ المجمعات مثل المارينا ومثل الباسفك فير ومثل استراليا فير
ومن غير عندك التوب ايلاند وهي جزيرة حلوة وايد
والاماكن وايد في غولد كوست انا رحت فيها اكثر من اسبوعين واحس ماكفاها من كثر ماهي حلوة
بنسبة للفنادق ففي فنادق حلوة مثل الهولدي ان ومثل كوارتيارد ماريوت ومثل فندق فرساتشي
وفي شي حلو في غولد كوست وهو ان عندهم نظام الشقق الفندقية وهي اتكون ابراج مصممه على اشكال اسويتات مافي غرف بروحه يعني اتكون صالة وغرغه وبلكونه ومطبخ وحمام وهي روعه وارقى من الفنادق بعد
انا انصح في السيركل كافن وايد وايد وايد حلو والمكان لا يعلى عليه استراتيجي من قلب يعين في نص السيرفس بردايز وتحته في جمعية وفيه مطاعم وكوفيات والمنظر بليل وايد حلو
ومن غير فيه شقق ثانية مثل الشيفرون وهي قريبه وايد من السيركل بس السيركل يعد اجددهم
وعندك الصن ستي وهو وايد وايد حلو ونفس شركة السيركل كافن بس يعيبه مكانه مع ذالك يعتبر قريب يعين ابو مشي 5 دقايق وانا جربت الصن ستي ووايد حلو ولو معك عايلة واطفال كان نصحتك فيه على طول
وعندك شقق الغولد كوست وهي قريبه من الصن ستي وعندك الماريوت وهو قريب من السيرفس بردايز
وعندك الكيو ون وهو يعد داخل من اطول 20 برج بلعالم ووايد حلو وراقي وهو يبيله اشوي مشي للبردايز مب وايد وفيه فوق البنوراما الي تقدر اتشوف منها المدينه كلها وفيه كوفي شوف وانصحك اتروح للبنوراما وقت العصر علشات اتشوف النهار والمغرب والليل وتستمتع
وانا لو بتسمع نصيحتي اقول انك تحجز في السيركل كفن لانه وايد حلو وعصري وموقعه واطلالته حلوة وايد وقبل لا تطعون من غولد كوست احجزو يومين في فرساتشي لانه حلو وايد وهم يسون لييالي للهني مون وليالي رومنسية حلوة وايد واكيد بدشو جو وبتستانسون
وانا انصح تقعدون في غولد كوست اقل شي 9 او 10 ايام
تقريبا هاي كل شي عن غولد كوست والحين انتقل معاك للمدينة الثانية وهي سدني
سدني هي تعد العاصمة التجارية لستراليا وهي من احلى المدن في العالم
وانا من الناس الي احب سدني وهي مدينة كبيره وحلوة بنسبة لرحلات في رحلات للجبل الازرق وهي رحله روعه
ومن غير عندك المجمعات التجارية مثل الفكتوريا وهو حلو وايد وعندكم مسرح الاوبر هاوس
وعندكم الهاربر والهاربر سايت وايد حلوو كله مطاعم حلوة وفيه مجمعات وابراج والمنظر روعه
سدني مليئة بلاماكن الحلوة بس انا اشوي خاينتني الذاكرة في سدني ومع ذالك بسويلك بحث علشان اتذكر افضل الاماكن اهناك وهي من احلى المدن ووايد احبها
وبنسبة للفنادق فاحلا الفنادق هو ستار ستي وهو وايد حلو ووايد احبه وهو نظام شقق ونظام فندق وكلهم حلوين وراقين جدا وفيهم سيرفس يومي وفيه جمعية تحت وبعظ المطاعم الفاست فود والايس كريم
وبعده عندك فندق الفور سيزنت وعندك فندق الانتركوننتننتل وعندك فندق السوفتيل وكلهم على الهاربر سايت ووايد حلوين
اذا بتروحلها انا اقول 5 ايام حلوة لها وممكن حتى توصل لعشر ايام
ثالث منطقة هي ملبورن حلوة وطابعها اوربي من ناحية الاثار والمتاحف وفيها رحلة لجبل الثلج وهي حلوة بس الرحلة طويله جدا اذا بتستحملها انا انصح فيها وفي بعد رحلة القطار البخاري وهي حلوة وايد وبس بعد طويلة
وعندك المجمعات في مثل شادستون سنتر وهو مجمع حلو وايد ولاصق فيه مجمع مايا وايد راقي وحلو وعندك مجمع الكراون وهو حلو وايد
وفيها بعد مجمعات ثاني ومن غير الاسواق وفي رحلة على الحنطور اترويك المدينة كلها بعد من الرحلات الحلوة
وفي شارع اسمه سدني رود في ملبورن بعيد اشوي من المدينة يعني مب وايد بس هو حلو وفيه مطاعم عربية وحلال وفيه مقاهي شيشة بعد لو كنت مدخن
وافضل الفنادق عندك الكراون بلازا وايد حلو وفي فندق انا جربته بعد اسمه استانفورد بلازا بعد حلو
ومعظم الفنادق يقدرون يحجزون لك رحلات مثل رحلة الثلج وممكن يوصوفن لك ويكتبوت لك عناوين بعظ الاماكن لو ماعرفتها
وطبعا رحلة استراليا طويلة ومثل ماقلت لك في شركات اتسوي ترانزيت مثل الاماراتية اتسوي اترانزيت سوان في بانكوك او سنغافورة او هونغ كونغ
وعندك الماليزية اتسوي اترانزيت في ماليزيا وعندك السنغافورية اتسوي اترانزيت بسنغافورة
وعندك التايلندية اتسوي اترانزيت بتايلند وعندك الكاثي باسفيك اتسوي اترانزيت في هونغ كونغ وعندك القطرية اتسوي اترانزيت في هونغ كونغ وسنغافورة
وعندك الاتحاد اتروح دايركت وفي بعد رحلات للاماراتية اتروح دايركت وبعد القطرية صارت اتروح الى ملبورن دايركت
طبعا التنقل بين المدن يكون كله بطيارة لان المسافات بعيده اما بطياره اتكون قريبه والشركات المتوفره هي جت استار والكوانتس الاسترالية
بنسبة اذا كنت جاي من الخليج او شرق اسيا وتبي اتروح الى غولد كوست اول شي فغولد كوست مافيها مطار دولي ولهشي احجز على برسبن وبعدها تاخذ سياره مدة ساعه ونص وتوصل الى غولد كوست وفي باصات تاخذها من المطار والافضل اتكون حاجز سياره اتوصلك من والى المطار بس اذا كنت بتروح مدينة ثاني قبل غولد كوست يعني لو بتروح ملبورن قبل او سدني وبعدها اتروح غولد كوست فعلى طول روح غولد كوست دايركت لان فيها مطار داخلي
ونفس الشي لو بتغادر غولد كوست الى مدينة استراليا ثانية فطلع من مطار غولد كوست الى المدينة الثانية
اما الوصول من والى الخليج فيكون يا عن طريق ملبورن او سدني او مطار برسبن الدولي
بنسبة لمدينة برسبن فيكفيها يوم واحد لانك على كل حال بتكون في غولد كوست وتقدر اتزورها
اما مدينة بيرث فللامانه مازرتها بحكم انها بعيده وتبعد عن سدني 4 ساعات بطيارة وهي بلجه الثاني من القارة ومايمدحونها وايد
وارجع الى مدن شرق اسياء بنسبة لسنغافورة فحسن الاماكن هو شارع الاوشيد وهو شارع تجاري وكله مجمعات تجارية وماركات
والرحلات فيها السفاري نايت وهي حديقة حيوان وعروض ولاكن هلمره دخولها بليل وفيه قطار يمشي بين الحيوان بس لا اتخاف الحيوانات في اقفاصها وفي عروض على النار ووايد حلوة الرحلة
وعندك رحلة السوق الهندي والصيني والمعابد الصينية وهي رحلة حلوة ومن غير السوق الشعبي
وعندك رحلة حديقة الطيور وهي حلوة وايد وعندك السنغافورة فلاي وهي مثل لندن اي اذا كنت اتعرفها وهي عن مرجيحه كبيره فيها كبسولات تتسع كل كبسوله ل 30 شخص وتاخذ فيك لفة كامله واتعد حاليا اكبر مرجيح في العالم وهي اكبر من الي في لندن ولاكن في اكبر منها بصين ولاكنها لحين قيد الانشاء
وعندك رحلة الباص البرمائي وهي حلوة وايد واتلففك على سنغافورة كلها
ومن احلى احلى الرحلات هي جزيرة سنتوسه وهي حلوة وايد وعباره عن جزيرة وتلفريك والعاب وعروض مائيه ودلافين وهي حلوة وايد
وسنغافورة فيها شارع للعرب ولاكنه عادي ومب حلو وفرق بينه وبين الي في كوالالمبور
وبنسبة للفنادق انصحك بلجراند حياة وهو احلاهم بنسبة لي وعندك فندق الماريوت وهو حلو وايد وفي نص شارع الاورشيد وفيه سوق وسينما تحته وعندك الفورسيزنت وفي فنادق ارخص اشوي وعلى مستوا وفي فندق انا مجربه اسمه اورشيد بريه وهو حلو وايد واسعاره وايد مناسبه وفي بداية شارع الاورشيد ووايد حلو وجنب استار بكس
وثاني كوالالمبور وهي عاصمة ماليزيا وحلوة وايد وافضل الاماكن وهو اكيد مجمع التون تاور وهو حلو وايد ومع حديقته وهي روعه
وعندك بعده شارع العرب وهو كله وكفيات عربيه ومطاعم ووايد حلو وفيه فنادق حلوة فيها ماركات عالمية
وعندك حديقة الطيور وحديقة الفواكة وحديقة الفراشات
وعندك مجمع مع مدينة ملاهي ومع مجمع يبعد عن كوالالمبور بين الساعه الى الساعه الاربع بس ناسي اسمه بحاول اجيب اسمه
وعندك صن لاقون في سلانجور وهو عبارة عن مدن ملاهي مائية ومجمع وفنادق حلوة
وعندك المجمعات التجارية الي في شارع العرب
وعندك المعبد الي فوق الجبل وبعد ناسي اسمه لان اخر مره رحت فيها ماليزيا من 4 سنوات
وعندك برج الاتصالات وهي البانوراما وتقدر اتشوف فيها كوالالمبور كلها
ومن غير عندك الشاينا تاون او السوق الصيني وهو حلو وايد وفيه بضاعات غريبه وارخيصه
وعندك مجمع التنايمز سكوير
وعندك منطقة جنتج وهي فوق الجبل وحلوة وايد وفيها مدن ولاهي واهم شي المنطقة بارده وحلوة وايد
وافضل الفنادق هو فندق مندرين وهو ملاصق للتون تور ولاكنه بعيد عن شارع العرب
وعندك مجمع الملنيوم وانا مجربه وانصح فيه وهو وايد حلو وعندك مجمع الماريوت وحلو وانصح فيه وراقي وكله ماركات وفيه مجمع عبارة عن 7 مجمعات ومن غير تحت فيه مطاعم متنوعه صينية وايطالية وهندية
وعندك الرتز كارلتون وهو ملاصق للماريوت ووايد حلو وعنك الفورسيزنت
واخر شي بانكوك الصراحه انا مانصح فيها وايد لانها وصخه وغير نظيفه
وبنسبة لاماكنها انا مارحت فيها الامجمعات والي رحت لهم هو مجمع طوكيو وهو حلو وكبير بس زحمه ومن اشهر مجمعاتهم
ورحت مجمع العالم الجديد او النيو ورلد وهو راقي وحلو بس اسعاره غالية
ورحت مجمع سامو وهو فيه ماركات ووايد حلو بس اسعار الماركات غالية عندهم
ورحت لسوق الشعبي وزرت شارع العرب بس للاسف شارع العرب صح فيه مطاعم عربيه بس قمة في القذارة وغير نظيف والشغلات الي انصحك تاذخعا لو زرت بانكوك هي القماش الصوف الكشميري لانه اسعاره فرق عن الخليج يعين المتر هناك ب 50 ريال بس بلخليج المتر 200 ريال وهو من افضل انواع الصوف وانصحك بلاكترونيات لانها رخيصه ومن غير في بضاعات تقليد بس انا ماعجبتني للامانه يعني احس الكوالتي او الجوده مب الى اهناكوبنسبة لرحلات فشرق اسياء رحلاتهم متشابها وايد مثل المعابد والحدايق مثل الزهور والفواكة والطيور يعين هاي اهيا
تقريبا هاي كل الي عندي في هاي الرد اتمنى اني اجبتك على كل استفساراتك
وامانه اي استفسار على بالك لا اتردد سوان من ناحية الفيزا او اي شي ثاني مكان سياحي او فندق
ترا انا موجود وبلخدمة
وتحياتي لك