1. ايها الشعب الكريم


2. السلام عليكم ورحمه الله وبركاته ...


3. ::::: المطار والطياره ::::::::


4. ::::::::: ارض ال فلبينو :::::::::


5. صدمة اولية :


6. tune hotel


7. :::::: الى بوهول :::::::::


8. ::::::: بوهول :::::::::


9. رحلتي القادمه للفلبين مره اخرى وفعلا على اسمها "الورده "

بسم الله الرحمن الرحيم ...
ايها المسافرون الاحرار .. ايتها المسافرات الماجدات

ايها الشعب الكريم

السلام عليكم ورحمه الله وبركاته ...

بداية قصتي مع السفر في 11-8-2014 لمده ثمان ايام وصفى 6 بدون يومي السفر .. كنت بسافر لاوربا وحجزت لسويسرا .. ثم الغيت حجزي لاني سبق وسافرت اوربا كم مره .. ثم قلت المغرب وجيت قبل اسبوع باحجز لقيت الحجوزات فل وتقارير واقرا لاتقرا وكل شوي تقفل وتبتعد امكانيه الحجز بالايام واجازتي محدوده .. فلمعت فكرة اندونيسيا ولاني سبق وسافرتها وجت فكرة الفلبيين فدخلت البوابه وخرشوني الجماعه وكأنك رايح تحارب مو سياحه (تحذير والامن والامان و و و و )
ولكني قلت ابدهاش ياولد .. مالك الا الفلبين واهي فرصه نقفل شرق اسيا سبق وسافرت ماليزيا واندونيسيا ورحله مجيده لتايلند قبل 3 سنوات ..
انها الفلبين اذا :
حجزت على الخطوط السعوديه ب 4600 درجه سياحي .. ويوم الاحد اخر الليل دخلت الرياض برا .. معي عزبتي ( تقليد سخيف عندنا يالسعوديين حنا وهالقهوة والهيل اللي اخذينها موضه ) بتعرفون بالاخير ..

::::: المطار والطياره ::::::::

المهم وادخل المواقف واوقف الراحله واسحب شنطه كبيره بها عشر وعشرين فنيله وشورتات ولبس وكشخ لاتكشخ .. وعزبه من السنيدي .. وياحيالله بالمطار .. انت الاعرابي قلت نعم يابني .. قال معك 26 كيلوا .. ولاحول ولاقوة الا بالله هذي هجره مو اسبوع
قلت امر الله .. شل ابوك وحط ابوك و26 كيلو واللابتوب بيدي ومن هنا وهناك ونركب الطياره الساعه 2 والدرجه السياحيه هي سجن حقيقي للرحلات الطويلة رغم اني امام باب الطواري .. ويوم ركب الاعرابي وتمطى وعدل عمامته الفستقية قلت للمضيف وانا متهلل الاسارير كم ساعه الرحله قال 10 ساعات مع التحرفض الاولى (9 وربع رسمي ) .. طبعا كلنا ندري عن الرحله وطولها ولكن معايشتها امر قاسي .. جدا .. تتلوى وتنام وترقد وتنجضع يمين وتنسدح على كتف اللي جنبك بحنان وتاكل وتقرا كل السبع مجلات اللي قدامك وتعليمات السلامه معهن كل ذلك ب 3 ساعات ويبقى ليلا طويلاا ..
صلاة الفجر لله الحمد لقيت وسعه باخر الطياره (جامبو ) فيها وسعه بالخلف تشيل 3 او 4 رجال ويصلون فيها .. وصل ياولد قبل تطلع الشمس

::::::::: ارض ال فلبينو :::::::::

مالكم بالطويلة نزلت مانيلا وبالمطار اصدقكم القول اني شاد حزامي ومتحيزم بكم معلومه اخذتها من المنتدى التاكسي ابو عداد والحرامية والنشالين .. والاعرابي محتزم للعلم وشاد نفسي وكل مامريت قوم الا انواع التبسم والضحكات .. ابوك ياصبي .. الامور زينه .. وامشي واثق الخطوات نحو البوابه وعيوني تلاقط .. واشري من هكالعجوز شريحه ب حوالي 50 ريال .. اسبوع لامحدود انترنت واركبها بالايفون.. والصرف الميه دولار =4360 بيزو اوقريبا منها .. وعلى التكاسي وانا ماشي .. سمعت كم واحد يهمس تاكسي تاكسي .. واكتشفت حينها ان الاخوان هنا ظلموهم فهم ليسوا حراميه وانما كداده مثل اللي بمطاراتنا ينادونك خفيه تاكسي تاكسي .. المهم واركب مع التاكسي وانواع الابتسامات الان الساعه ال 4 او خمس عصرا .. بتوقيتهم وعلى الفندق
المشوار حول 30 او 35 ريال .. مع الهاي وي دفعت للطريق ضريبه 2 ريال .. ووصلت مكاتي افنيو بفندق
best western plus antel hotel
ب 260 ريال سعودي غرفه جميله ومطبخ وصاله وهادئه .. ودخلت انا وعزبتي .. وهاتك يانوم ( بعد رحله العشر ساعات ستمرض 24 ساعه وانت تقل فقمه بس تسدح )

صدمة اولية :

البلد حار ورطب بشكل مزعج جدا .. وانا ديني ولا دين الحر .. كما اسلفت في عرق (فقمه ) .. وكانت اولى الصدمات (متخيل الحر مسبقا ولكن كان الحر فوق المتوقع والشمس لاهبة وحارقه) هذا اول ايام الرحله اخر الايام كان فيه امطار فخفت حده الشمس
ميزه الفندق اللي قلت لكم انه قريب من المول وسوبرماركت تبعد 40 متر .. ومطعم البتراء العربي 200 متر مشي .. ومطعم حسين الايراني 250 متر بوسطه منطقة مكاتي الجميلة والمشهوره
عليك بالمطاعم العالميه ووجبات السمك لله الحمد تعديك الحلال والحرام .. واحرص على ان تسأل عن الخنزير ودهنه وهناك مطاعم تخلو منه كبيتزا هت جربتها هناك (بالخضار ) .. اقول كذا لاخبركم ان اسعار المطاعم العربية اللي يقالها (حلال ) كالبتراء وحسين مبالغ جدا فيها .. تعشيت بمطعم حسين اوصال ورز وحمص وشاهي ب 120 ريال !!
بينما بيتزا حجم سوبر ب 40 ريال
مانيلا فيها سوق اسيا مول .. وهو سوق خرافي وكبير جدا .. واسعاره لاتتوقع انه رخيصه فهي زي اسعار اي مول بالرياض وربما اغلى
الاسواق الشعبية اللي يمدحو فيها بعض الاخوة ويقولون عن متعه التسوق بها هي اسواق ضعيفه ولافيها شي يغري للشراء اضافه الى انها غير مكيفه ومزدحمه بالعربي رح لاسيا مول والمولات الكبيره كالجرين بلت ويكفيك عن الباقي
اعلى مشوار بالعداد من مكاتي للاسواق او اي مكان من 10 -15 ريال في الغالب ..
البلد امن جدا ووالله ماشفنا لانشالين ولا بياعين مخدرات ولا نصابين ولا غيره من تخويف الاخوان هنا اللي هبلوا فينا .. ويقولون لك لاترد على احد ولاتعطي احد وجه .. والله اني فالها سوالف مع الفلبينو وسوالف عن حرب العراق والوارس ان ميدل ايست والوار ان مندناو
نصيحه لوجه الله .. رأيت مشهد من بعيد وانا رايح اتعشى في المطاعم العربيه وللانترنت .. (لشارع برقص الوقح ) وهو على شهرته مجرد خمارات وارذل القوم فيه والشواذ والامور السافله ..
حتى ان المحترم من الفلبيينين انفسهم يذمونه
مريت السفاره السعوديه بالدبلوماتيك ايريا .. وسجلت الجواز عند رئيس شئون الرعايا الاخ الرشيدي وهو رجل محترم استقبلني باحترام وترحيب
اخذت لي يومين بمانيلا .. ودارت بيني وبين آل فلبينو نقاشات حول بوركاي وشهرتها .. والوجهه المتوقعه .. وش رايكم وماوشرايكم .. المهم جت بالبال سيبو .. وعلى مكتب الطيران نبي رحله لسيبو ومن منا المهم ب 600 ريال ون وي مع (30 كيلو عفش ) لاحول انت وقشك
ويوم اصبحنا وشك اوت .. وعلى المطار وخطوط التايجر .. ويامرحبا بش .. وباهلك وبعزبتك وساعه طيران مع الفلبيينن وانواع التنكيت والسوالف
:::::::::::وننزل بسيبو ..::::::::::
ومن المطار ب 15 ريال لفندق اسمه

tune hotel

وانا انصح به الاخوان اللي يريدون الهدوءءءء والنظافه التامه واعطيه بالهدوء والنظافه 10 من 10 وسعره باليوم 120 ريال .. !!!
نعم 120 ريال لانه بلا خدمات زايده والغرف فيه صغيره نوعا ما ويخلو من البارات والمراقص (لله الحمد ) بالعربي حق المسافر اللي يبي السياحه النظيفه .. وامامه مول اسمه ايالا مول فيه كل شي مطاعم وصرافه وبريد وانترنت ومكاتب طيران وسياحه ..
المهم ونتسدح بالفندق .. وياحيالله .. ويوم ثاني .. ندخل للمول فرع ms اختصار لمول اوف اسيا .. وأسال عن الرحلات لمنطقة بوهول وهي منطقة مهمه جدا ان تمر عليها ان نزلت بسيبو .. والقا عرض ب 550 ريال سعودي ليوم واحد وبالعباره 2 ساعتين من سيبو لبوهول .. المهم مالله امرني واطلع ولم احجز .. وبالليل رحت لايالا مول (50 متر) من فندق tune ... واحصل انواع المكاتب السياحيه والقا عرض عندهم ب 380 ريال .. يوم واحد لبوهول مع الغداء والعباره .. حلو

:::::: الى بوهول :::::::::

ومن الصباح الباكر وتكسي ب 7 ريال للميناء وادخل لمنطقة go2 وهي الشركه الناقله ويعطوني التكت على العباره بوت سريع .. ويوم دخلنا للعباره وحجزي درجه سياحي .. قلت ابغا الفرست كلاس وهو اعلى العباره ومكيف ومريح جدا .. قالوا ادفع الفرف وادفع 23 ريال .. ارخص
ويركب اخوكم الاعرابي المزركش مع الكوريين صفر الوجيه اللي اشكال بناتهم تقل باربي وورعانهم مثلهم تماما .. وهات الكوري ود الكوري .. وعريبيا وسطهم (كنت العربي الوحيد ) وعرفت ذلك لاني (حنطي والبقية صفر وبيض خشوم سواحلي )
المهم وساعتين .. بالبحر (جو خيالي تحس انك بعيد جدا عن الاوطان )
تخبرون مع البحر والرحله ولحالي .. تشعر انك غريب .. وكأنك مشغل اغنيه ...
( اتذكرك مثل الغريب لما يتذكر ديرته .. راح الشتاء وجانا شتاء وانا انتظاري ليا متى )

::::::: بوهول :::::::::

نزلنا بوهول وانا معلق على صدري شعار .. تقل (ضمان ثلاجه ) .. وليا هكالبنت مستر فاهد قلت نعم طال عمرك قالت اتبعني وعلى الباص .. ولا فيه عشرين راكب انا وواحد بحريني متزوج فلبينيه وفلبيني امريكي جاي من امريكا وولده والبقيه كوريينني .. يالليل الوناسه )
تعرفنا على بعض .. هاي .. ايام فروم سعودي اريبيا وبعض كوريينني يالله يعرفها .. وننطلق ومن كنيسه لكنيسه وهاذي منهده وهاذي دمرها البحر لما هاج وهاذي وهاذي .. الى اخره .. المهم مالكم بطويلة احسن مالبرنامج ركبونا بقارب جميل .. على هيئه مطعم كبير يتجول في نهر بوهول الكبير وانواع الوناسه والغداء وانت بالنهر يابويا .. وامطرت بعد .. هكالساعه عريبيا غنى .. مطر وغداء ونهر وسفر .. الاربع الخطيرات .. واستانس وناسه تحكي بها العربان ..
وبعدها زرنا جبال الشكولاته وهي جبال خضراء ذات قمم متساويه سبحان الله .. منظرها بديع .. والمرشده السياحيه تشرح لنا (بالانجليزي ) وضع هذه الجبال .. وبعدها ذهبنا لحديقه فيها اصغر قرد في العالم .. ( واعيباه ) وانا اطلع واخليهم لابوكم لابو قرودكم .. المهم رحت وصليت وهم مشغولين بقرد كبر الكف .. انا ماحبيت القرد الكبير دون بحب الصغير .. حسيت ان الضب رمز قومي هكاللحظه ..
المهم ويرجعونا من البرنامج اخر النهار للعباره .. واركب عبارتي وانطلق نحو سيبو .. وناصل بعد المغرب وعلى الفندق ونوم .. من قلب ..
اللي مامعه لغه .. او معه زميل معه لغه جيده .. سيتعب قليلا خصوصا في المناطق النائية عن مانيلا .. وان لم يلاقي صعوبه فلن يستمتع لا في حديث مع احد ولا في استشاره او حجوزات .. غيرها
نصيحه خل شنطتك وحده يدويه صغيره لتجنب السحبله كما حصل لي
كل سفراتي السابقه اتفاخر باصالتي واسحب قشي ونص مطبخي معي .. وحسبتها بعد هالسفره .. لحظه في شي غلط .. ليش ماحنا مثل الخواجات كفي بخمس ريال وهو ماشي وبلا اطبخ لاتطبخ هيل لاتهيل
لعلمكم عزبتي للفلبين بها 3 علب ابو كيلو (تمر سكري) لاحول الاعرابي اعرابي
طبعا لما رجعت من سيبو .. فريت مانيلا ورحت للجرين بلت وكم سوق شعبي .. وطقت كبدي من الحر .. والزحمه .. (طبعا في اي مشوار بالتكسي في مانيلا جهز نفسك للزحمه الخانقه وطول المشوار بشكل ممل )
اذا ركبت مع التكسي يقول لك قفل الابواب من الداخل .. وربعنا يحسبون انه خوف من الحراميه سألت التكاسي يقولك (للامان فقط ) يعني (تقليد عندهم زي ربط حزام الامان )
الشعب ودود جدا والاحترام يجلب الاحترام ...
البلد اسعاره كأنك بالرياض وربما اغلى قليلا الماء الصغير ب ريالين ونص والتوست (6 ريال ) للعلم بالرياض ب (3) ريال .. اسعار الملابس والعطور والاحذيه اكرمكم الله كأنك بالرياض .. للتوضيح اقولها
الحذر من المنتجات الغذائية لان ابو ذنيب (الخنزير ) حاضر هو وزيته بالكثير من المنتجات
الامان عالي جدا بمانيلا فالاسواق والمواقف والسوبرماركات ومحلات الصرافه وحتى محطات الوقود ملئيه بالحراس المسلحين بشكل مكثف جدا .. المولات وانت داخل يفتشونك روتينا لاشافوك سايح يمشيك في الغالب
انتهت الرحله ومليت ولحالي قلت ياولد ابدهاش .. السعوديه بس واتصل بمكتب الخطوط وترد علي اخت سعوديه .. وتنسق لي حجز على البزنس كلاس -تلوعت من العشر ساعات الجيه - المهم قالت ادفع 256 دولار فرق ياعدل يابدل قالت ماعنك وعنها .. واحول لها 256 دولار .. واركب على البزنس كلاس
(الرحله رجوع 8 ساعات والكراسي وثيره وتتمدد لين تصير سرير الا ربع .. و نمت منها للامانه 6 ساعات نوم عميق ابو احلام وتقلب وخلوع والخ )

• شعرت بالحنين للدرجه السياحيه والكرسي اللي كأنك جالس بكرتون اصغر منك وتخبرون سوالف السياحيه ووجيه الغلابه (زمان يافن)جنبي احد الاخوة من المدينه غفر الله له .. ورايق وواضح انه من طبقة (ألهوامير ) سألني فين رحت وفين سكنت فلما قلت له سيبو والفندق ب 120 ريال انصدم وطالع في .. ايه ياحبيبي مو متعود الا على ال 800 ريال والالف ريال .. قالي والله حلو (نصاب قالها من غير نفس) قلت له يارجل انا شخص بسيط ابحث عن الهدوؤ والنظافه والاحترام والفندق اياه مصنف 10/ 10 بالنظافه في المواقع العالميه

سعودي ايرلاينز كالمعتاد الاسوء خليجيا . ذبحنا البرد فيها قلنا للمضيف خفف البرد قال هذي طياره جامبو قديمه يعني كأنها جمس حق الحقاق من زمان .. والمكيف حقها له درجتين (بارد قوة او حار ) فاختارو .. قلنا هات البطانيه ..
ملخص رحلتي السريعه لفلبينو .. وهي ان البلد جميل بشرط ان تروح له في ديسمبر ويناير وفبراير عسا ان يكون الحر خفيفا

رحلتي القادمه للفلبين مره اخرى وفعلا على اسمها "الورده "

صدمه حضاريه للفلبينين القادمين لبلادي فمن الابتسامه واللطف الى (ياصديق سوي لاين ) وجلافه الربع حتى ان اصحابنا بالرحله لما وصلنا الرياض تلاحظ عليهم التحفظ والحاله حاله .. طبعا رزعونا سعودي ايرلاينز 45 دقيقه على بال ماجت شناطنا
وهذا ماسيدعوني للاكتفاء بشنطه صغييره محموله في المرات القادمه وبلا اصاله بلا هم
البلد امن جدا للي يعرف يوزن نفسه ويبتعد عن الاماكن الغير محترمه
البلد يحتاج على الاقل اسبوعين صافيه بدون يوم ذهاب ويوم قدوم حتى تلحق تسافر فيه بروكاي وسيبو والمناطق الاخرى
مانيلا حدها يومين وانت نازل ويوم الرجعه الاخير لانها زيها زي اي عاصمه مزدحمه شوي .. ولافيها ذاك الزود
سيبو تحتاج 4 ايام منها رحله يومين متصله (برنامج لبوهول فيه يوم ويومين و3 ايام ) اليومين افضل لكي تستمتع ويختصروا عليك الوقت ويودوك لاحسن الاماكن مباشره