- بسم الله الرحمن الرحيم
- ملخص الرحله وعدد الايام
بسم الله الرحمن الرحيم
في الحقيقه ما اعرف كيف ابدء موضوع سفرتي بس اول شي استسمحكم اني بكتب اللي اعرفه باللهجه المحليه وشي بيكون بالفصحى لاني اخاف ان المعلومه ماتوصل لاخواني وحبايبي من الدول الخليجيه الثانيه بالشكل المطلوب ....
بحاول اكتب باسلوب مختلف يعني قبل ما اسافر كنت متلهف لتقارير الاخوان عشان احاول اجمع اكثر المعلومات عن المستجدات في الدول اللي بسافر الها ولكن حاليا مع بداية انتهاء موسم الاجازات فكرت ان يكون تقريري بشكل ثاني طبعا لا يخلو من المعلومات والمواقف والنصائح والارشادات ولكن بيكون على شكل مواقف وانطباعاتي الشخصيه
ملخص الرحله وعدد الايام
تخطيط سفرتي الاول كان دبي فينا يومان زلامسي عشرة ايام والعوده لفيينا يومان وهذا كان بالحجز المسبق ولكن شو اللي صار مع طول فترة انتظاري للاجازه استوت بعض التغييرات يعني سمعت هذه الجمله كثير ياخي ليش ترجع فيينا ليش ماتشوف دوله ثانيه وميونخ اقرب من العوده لفيينا مره ثانيه !!!
في الحقيقه مع اقتراب موعد سفرتي وجدت ان العوده من ميونخ صعبه لضغط الحجوزات فصار عندي اختيار واحد وهو العوده من فيينا والصراحه ما استسغت العوده من مكان شفته ولكن ماصار لي بعدين خلاني اقول ياريال استسيغه ولا اتشوف شي ماشفته فقررت البحث عن محطه بديله للعوده ففكرت في ايطاليا وافتتاح محطة طيران الامارات الجديده في فينيسيا ولكن المعلومات الضيئله اللي عندي عن ايطاليا ابعدت اختياري لها ففكرت بمحطه ثانيه في المانيا فكانت فرانكفورت فقلت فرانكفورت فرانكفورت احنا ورانا حاجه ..... ايه هين هذا سفر مو لعب عيال ...
فتوكلت على العلي القدير سبحانه وخططت سفرتي كالتالي 31/7 الى 2/8 فيينا والعوده بتاريخ 16/8 من مطار فرانكفورت وهذا كان حجزي للتذاكر بمكتب السفريات وخليتهم يحجزولي يومان بس في فندق الهليتون الدانوب وكانت قيمة التذاكر مع اليومان حوالي 14090 درهم ، تذكرة النمسا 2750 للبالغ وتذكرة اي مدينه المانيه 4700 درهم تقريبا واللي انا سويته بالذهاب لفيينا والرجوع من اي مدينه المانيه وفر على تقريبا ستة الاف درهم لو كنت رايح وراجع من اي مدينه المانيه
المهم كان من بعد تاريخ 2/8 انطلق الى فندق في زلامسي استقر فيه يوم واحد وابحث عن طريق عن مكتب المعلومات عن شقه لمدة اسبوع وحجزت بتاريخ 10 و11 /8 بفندق ارابيلا شيراتون بوقن هاوسن
وبتاريخ 12/8 الى يوم 15/8 بمدينة او تقدرون تسمونها ضاحيه او قريه بس كبيره شوي اسمها اوفينبرغ وهي على حدود ستراسبورغ الفرنسيه وقريبه من مدينة رست الالمانيه اللي بها اليورو بارك حديقة الالعاب
واللي تبعد عن مدينتي 20 دقيقه بالسياره فقط بشرط مايكون حد ناوي يزور الحديقه غيرك بنفس اليوم هاهاها تبون تعرفون ليش اضجك لا خلو التفاصيل بعدين لاحقين على الضحك مواقفي المضحكه كثيره وحتى المرعبه
والحديقه اليوبارك والغابه السوداء وستراسبورغ الفرنسيه شجعني على اختيار فرانكفورت كمحطه للعوده واسمحولي عن انا بتكلم عن مدن المانيه بها البوابه النمساويه لان ما اعتقد في فرق بينهم من حيث القرب واللغه والكثير يضعون مخطط لزيارة هالدولتين في سفرته وانا افضل حتى للاخوان ان يضعون تقارير سفرتهم بكل بوابه تقرير شامل عن السفره كامل متضمن كل الدول اللي زارها عشان مايتشتت الموضوع
وباختصار كانت سفرتي لمدة 17 يوم مليئه بالاحداث والمواقف اللي بتناولها بشكل مفصل وبحاول ان انزل بعض الصور اذا عرفت لاني بصراحه غشيم بدرجة الامتياز
وعشان ما انسى احب اشكر كل الاخوان اللي كتبوا عن تقارير رحلتهم ولا انسى اخونا ومشرفنا اللي ننتظر عودته لهذي البوابه المشرف اخر الفرسان ابومشاري الله ايوفقه ويجزيه كل خير عنا ولا اخونا الفاضل هشام ولا حبيبنا رجل شرقي اللي افضاله عمت الكل والصراحه شكري يعم الجميع ولكل من سطر بيديه معلومه فادت مرتادي هذا البوابه واحب ان اشير الي شي مهم وهو انكم اتخططون لسفرتكم بشكل مسبق وكافي فالنمسا تستاهل الزياره وفي الحقيقه اهيه لو غاليه بس تستاهل .
ولو كانت غاليه بس ماتفرق عن اي دوله اسيويه كثير يعني اذا بتدفع عشرة الاف زياده ماتفرق اذا بتشوف كل هالمناظر الطبيعيه الخلابه والاجواء الرومانسيه وصدقوني بشوية تخطيط بتلقون ان الفرق مب ذاك الزود اتخيلو انا كنت ساكن في سفرتي السابقه بفندق اربع نجوم ببانكوك كنت ادفع 420 درهم لليله وهي مجرد غرفه بفندق ماجستيك قراند لا منظر ولا شي ومجرد غرفه يالله يالله اتشيلك انت وشنطك
وسكنت بشقه مطله مباشره على الجبل بكابرون غرفه وصاله تنقلب الى غرفة نوم ومطبخ والله ايعزكم حمام وبلكونه اشكبرها ابكراسيها المطله على الجبل الاخضر اللي امغطنه السحاب الابيض قولوا بكم
خمنو قولوا مب قايل اخاف ايي السنه اليايه احصل نصكم واقفين برع تتنظرون دوركم مافيني اخرب على نفسي هاهاهاها لقيتها الله ايسلمكم 60 يورو هاهاها يابلاش يعني بثلاثمئة درهم
وبفضل اختنا هدواه الله ايردها بالسلامه مع عائلتها الكريمه خططت ان اتكون وجبتين بالشقه ووجبه برع يعني الفطور بالشقه وقبل مانطلع انعد الوجبه الثانيه ونطلع نتغدى برع ونرجع بس انسخنها وكانت وجبه شهيه طبخ بيت عيش وتونه ومره عيش وجبسة تونه ومره عيش اصفر وتونه ومره عيش وقاعة تونه وذا حبينا انغيير سوينا معكرونه بس بعد بالتونه
الصراحه مشترياتي قبل السفره كلفتني 800 درهم معلبات ورز وغيره ولكن وفرت علي كثير اتخيلوا بس الوجبه الوحيده اللي اكلها برع اتكلفني تقريبا 50 يورو يعني مئتين وخمسين درهم في الحقيقه هي مقاربه لاي وجبه باكلها باي مطعم بدبي ولكن مع ذلك طبخنا ووفر علينا الكثير صح مشقه وتعب وغسال وكوي ونشر ملابس وعصرها قبل نشرها وكويها عقب نشرها واعداد الفطور ولكن اشعايلنك النهار عندك طويل لاحق على كل شي والصراحه كنا نشتري بعض المشتريات البسيطه مثل البيض والخبز والعصائر ونعد احلى فطور سواء كان بيض بالطماط او فول او اجبان والصراحه الفول كان رهيب خاصه عقب ماتاكله وتطلع للبلكونه وتوقف امتنح ايه فيه ايه وما انسى شي الصراحه خذينا الابريق الخاص بالقهوه التركش اه كم يسوي ترتشف هذيج الرشفه وتتامل السحاب والرشفه الثانيه تتامل الجبل الاخضر والرشفه الثالثه ولا مريوم و هنود دافرين الطاوله بالاستكانه وهم يركضون وراء بعض يلعبون
الصراحه قبل ما اختم هذه المقدمه عن موضوعي اللي بتكلم فيه بشكل مفصل بعدين حبيت ان اوجه اسمى ايات الشكر والامتنان الى صاحب الفضل الكبير واللي خفف علينا احساسنا بالغربه وكان حقا خير رفيق ومعين ببلاد الفرنجه الا وهو الكوز
واللي انصح فيه وبشده بل هو اهم من بطاقة الائتمان البنكيه وانا اعترف اني جحدت معروفه وتركته بغرفة الفندق ولكني مطئمن انهم بيعتنون فيه وبيستخدمونه بشكل اخر في ري ورود وازهار الفندق وانا بديت احسده بعد ماوصلت للاجواء الحاره وحبيت اوجهله هذه الاغنيه له خصيصا : (( ياكوز الهناء ياكوز الهناء ياليتني كنت انا ))
انتظرو مواقفي المضحكه والمرعبه من اول يوم لاخر يوم ولكم مني جزيل الشكر لحسن متابعتكم والقاكم على خير ........
