في البداية احب اني اشكر جميع اعضاء العرب المسافرون من مشرفين و اعضاء الي و بصراحة وصلو بالمنتدى إلى قمة في الإبداع. انا ناوي اسافر سويسرا ان شاء الله في شهر 6 ( يوليو ) و الميزانية الي بتكون متوفرة وقت السفر ان شاء الله حوالي 21400 درهم إماراتي، يمكن توصل في احسن الاحوال إلى 25000 درهم( يشمل كل شي) و سبب الميزانية التعبانة اني ان شاء الله ناوي اروح الحج السنة هذي و بالنسبة للناس الي من خارج المملكة, الحج مكلف جدا و خاصة في الامارات, من 20 إلى 30 الف للشخص و يارت تحصل بعد!! طبعا انا اتكلم عن حملات عادية. و بالتالي اضطررت ان اوفر مبلغ محترم ل إثنين انا و زوجتي. ندخل في الموضوع:
- خط الرحلة بيكون عن طريق دبي شهر 6(يوليو) عدد المسافرين 2, اريد اروح انترلكن بأي طريقة, مدة الرحلة اسبوعين و ياريت تكون 3 بس اعرف ان الميزانية يالله تكفي اسبوعين. ما اقدر افكر بالسيارة اولاً بسبب الميزانية و ثانياً بالرغم من اني إماراتي إلا ان رخصة القيادة الي عندي سعودية و منتهية, المرور هنا ما يبدل إلى إذا كانت الرخصة صالحة, يعني لازم اروح السعودية و اجدد و انا ما عندي وقت. بإختصار وسيلة التنقل راح تكون بالقطار. انزين لو فرضاً حجزت في انترلاكن ما بين 4 إلى 6 ايام, بالقي الايام وين اروح؟ مدن كبيرة ما اريد.
- لو سويسرا عموماً غالية و ما تكفي, فكرت بزلمسي في النمسا!! هل اقدر ابات 4 إلى 6 ايام بزلمسي و اقضي باقي الايام في مناطق مختلفة؟
- كم تقريبا بيكون مصروف الجيب يشمل (وجبات, رسوم اماكن سياحية, تنقل) لمدة 14 يوم, طبعاً التسوق ماله مكان في الرحلة.
- السكن بحدود 300 إلى 400 درهم لليوم. شو رايكم ؟! مكان للإستحمام و الصلاة و النوم, باقي الوقت انا برع السكن. و بخصوص السكن, ليش معظم فنادق سويسرا السراير تكون عبارة عن سريرين ملزجين؟ ليش ما في حجم كنج او كوين؟
- لو فرضاً الجواب كان ان المبلغ ما يكفي لا لسويسرا ولا للنمسا,, انزين فيه مكان ثاني اقدر اروح له و يكون شبيه بإنترلاكن او زلمسي من حيث الطبيعة؟ الصراحة مليت من اجواء آسيا الحارة.
ادري اني طولت لكن والله من حيرتي. اخاف اروح و اتبهدل. و السموحه.
تذاكر الطيران من دبي الى زيورخ 7000 درهم
السكن 14 ليللة 9 الاف درهم
السويس سافير باس لاثنين 3200 درهم
اكل 14 يوم 7000 درهم
المجموع 26 الف درهم تقريبا
ممكن تنقص وممكن تزيد حسب سعر تذكرة الطيران والسكن
ممكن اول ماتوصل تتجه لانترلاكن اسبوع
ثم الاسبوع الثاني حول لوزيرن
وبالتوفيق