حمد الله على السلامه اخي khallodee
ومنتظرين تقريركم تحياتي

حمداً لله على سلامتك
بس ترا 15 يوم فيها الكثر من الأحداث
فننتظر تقريرك
تحياتي

اعزائي واحبائي اقلعت على رحلة رقم 712 على طيران الاتحاد المتجهه الى ابوظبي يوم 227 وصلت ابوظبي الساعه 12 بالليل وكانت رحلتي على طيران الاتحاد رقم 301 المتجهه الى لندن هيثرو يوم 237 نزلت المطار وكان عندي اوتيل على حساب شركة الطيران بس ماابي الرحله لانها تقلع من ابوظبي الساعه 1 الظهر انا ابي رحلة الصباح الساعه 7 اللي توصل هيثرو الساعه 12 بتوقيت لندن وحاولت فيهم ووافقوا واخذت البوردنق باس المهم درت في المطار ومن هينا ومن هينا لمين ركبت الطياره الطياره اير باص من نوع 300-340 وكانت فاضيه مافيها احد الرحله اقلعنا بالوقت المحدد وصلنا لندن بالوقت المحدد المهم نزلت اخر واحد من خرطوش الطياره لابس رسمي وانا خايف من اللي يبي يواجهني بالمطار عقب الاحداث المهم والا فيه عسكريين وواحد شكله مباحث عندي لابس في اذانه خروص يوم طلعت قال لي لو سمحت شوي على جنب ابغاك وقفت وفتش اوراقي كان معي اوراق جامعات وكذا شافها وشاف الجواز وقال لي اوكي تفضل المهم مشيت ووصلت الجوازات عبيت اللاندق كارد وختمت الجواز ورحت تيرمنل 1 ادور رحله لاني ابروح مانشستر ابمر الجامعه رحت واخذت خطوط Bmi اتجاه واحد من هيثرو الى مانشستر ب 38 باوند شيكت العفش ودخلت الصاله وركبت الطياره ورحت مانشستر طبعا طياره صغيره وصلت مانشستر استقبلني خويي ورحت بيته وطلعت تعشيت في شارع كله عرب في مانشستر من بكرا كان يوم الاحد طبعا مارحت شي طلعت تمشيت في مانشستر ودرت فيها ستايل اوربي عادي مافيها زود مدينه عاديه مع انها ثاني او ثالث اكبر مدينه في Uk بس مااشوف فيها زود يوم الاثنين مريت جامعة مانشستر ودرت فيها كلها كلها كلها كلها كلها كلها قسم قسم جامعه مترامية الاطراف كبيره كبيره مره مره مره المهم خلصت اموري ومريت جامعة سالفورد ومريت ليفربول ويوم الثلاثاء طلعت رحله درت فيها ولز كلها على شواطئها وقراها رحله استغرقت حوالي من 8 الصباح الى 11 في الليل رحله حلوه مره مره مره وولز فيها شلالات خياليه تصلح للعوايل بقوه ورجعت الى مانشستر ومن يوم الاربعاء استقليت قطار من محطة البيكاديلي في مانشستر الى محطة يوستن في لندن استغرقت الرحله 2,30 اخذت التذكره غاليه مره مره لاني حجزت في نفس اليوم ب 54 باوند طبعا قلة الخبره لها دور بس مايهم اهم شي الوناسه ....................................
انتهت الحلقه باقي لكم حلقة لندن كامله والى ذلك الحين اشكركم على حسن الانصات
وتحيات صغيركم خلودي لكم من الالف الى الياء

انطلقت من مانشستر الساعه 13,30 وصلت الى لندن الساعه 4,07 وصلت محطة يوستن خرجت من القطار انا وعفشي دخلت صالة المحطه ونزلت للدور الارضي واخذت تاكسي وقلت له روح فندق سلفرج وصلت للفندق قال لي 8 باوند نزلت للفندق عطيته رقم الحجز اللي حجزته بالنت قال لي عطني جوازك وكمل الاجرآت وعطاني مفتاح الغرفه رقيت الغرفه وحطيت عفشي ونزلت لشارع اكسفورد المحبب لدي وسويت عليه مسح كامل بعدها رحت للهايد بارك ودرت فيها كلها بعدين رحت ايدجوير رود وتقهويت في ستار بكس وبعدها تعشيت في صب واي ورحت الفندق ونمت.....
وللحديث بقيه ان شاء الله
تحياتي لكم
صغيركم خلودي

الحمدلله على السلامه
حبيت اسالك اخوي خلودي
فندق السلفردج بكم حجزته من النت ؟

اهلين اخوي نواف
الله يسلم عمرك من كل شر يارب
اخذته طال عمرك ب 77 باوند مع الفطور غرفه دبل كانت غرفتي رقم 620 في الفندق في الدور السادس
واي استفسار انا جاهز باي وقت وتامرون على عمري ...
تقبلوا تحيات صغيركم خلودي

هلا اخوي خلوودي والحمدلله على السلامة ,,
بس مهب كن سعر الفندق غالي ؟؟ كيف مستواه ؟ والخدمة فيه ؟ وحجم الغرفة
بالنسبة للهايد بارك كم رسوم دخولها ؟