أخي السكبني أنا توني جاي أمس من أندونيسيا ، كنت هناك ومعايا العائلة وحقيقة كنت اعتقد ان اندونيسيا ما تنفع الا للشباب حسب ما فهمت من بعض الاخوان ، ومن خلال سفري لدول عديدة أستطيع ان أقول ان اندونيسيا مناسبة 100 % للعوائل بس بشرط التوجه لأماكن محددة هناك من فنادق وغيره ، وحقيقة برنامجي كان ضيق 12 يوم فقط ( جاكرتا ، الجبل ، باندونق ) عشان كذا ما أقدر أفيدك الا بهذة الاماكن اما اذا كنت بتروح اماكن ثانية يمكن يفيدك الاخوان
وانا يا اخي الكريم مستعد اساعدك بالشى الي تامر فيه بس قولي كم ميزانيتك للسفر وايش الشيء الي يهمك وخلافه عشان اقدر افيدك تمام ، وصدقني لو اني ماني تعبان الان كنت اعطيتك تفاصيل كاملة بالاخطاء اللي وقعت فيها عشان تستفيد منها ان شاء الله
باذن الله راح يكون لي تعقيب على موضوعك غدا ان شاء الله
اتمنى لك رحلة عائلية سعيدة
اخوك العميل السري

هذا برنامج حلو لمشرفنا الحلو سايا قانتينق وهو مناسب للعوائل
https://artravelers.com

السلام عليكم ورحمة اله وبركاته ،،،
العميل السري : الله يطمنّك ويفرحك ياشيخ زي ماطمنتني وفرّحتني .
أخوي ترنا متفقين في أشياء كثير أنا ونته وشكلي راح ألصق فيك لين ماتطلّع وتقولي حتى رقم المقعد بالطيارة اللي قعدت فيه ( شايف كيف أنا مزعج ودقيق )
أخوي رحلتي عائلية مثلك ، المدة برظة مثلك ، حتى خط السير المقترح من الكثير واللي أنا شبة راسم بالمية عليه مثلك ( جاكرتا-الجبل-باندونق ) اش تبغى أحلى من كذا يعني مالك عذر .
أعطيني كل شي تكفى زي ماذكرت فوق الفنادق المطاعم الاسواق الاماكن المقترحة وتسّعر كل شي . أما الميزانية فأنا أبغاك تحددها لي وتخمنها فاحنا اثنين فقط انا وزوجتي وطفل صغير مايحسب عمره حول السنة ونص فعلى المدة المذكورة وخط السير المقترح وكل شي قول كم يكفي وخلي بالك تراني أبغى أدلع نفسي ، يعني مكان الاقامة والمطاعم لا تنسانا بالحلو فيها .
هيا ترى لا تفرك فيني وتجي ترد على الموضوع بعد ما أرجع من سفري ، مستنيك ولا تطول عليه .
القنيط : مشكور أخوي على الرابط وسبق أن قرأته ونا تراني حاطة بالمفضلة وأعتبره مرجع رئيسي لي بالرحلة ولكن أحتاج أكثر أرأء وخبرات معليش أخوك طماّع شوي .

1. أخي السكبني

أخي السكبني

بالنسبة لي أنا طلعت على عرض من وكالة الشتيوي بجدة وكانت تكلفته 2650 ريال للشخص البالغ في غرفة مزدوجة ، أما الطفل 2000 ( الدمام _جاكرتا _ الدمام ) ( أقامة 7 ليالي ، ثمانية أيام ) وأشتمل العرض على عدة فنادق أخترت أنا فندق شيراتون ميديا منها ،وللأسف ما أستشرت الأخوان الا بعد ما أخترته ونصحني أحدهم بعدم السكن فيه لأن أثاثه قديم أما غير كذا كله تمام ،ما علينا من هذا كله أنا جلست فيه يومين فقط زرت خلالها أنشول ودنيا فانتاسيا وعلى فكرة البرنامج اللي أدرجة الأخ القنيط ممتاز لكن أتوقع أنه راح يكون متعب في الجزء اللي يخص جاكرتا .ومن وجهة نظري لا تضيع وقت كبير فيها فالسكن في الجبل افضل بكثير خاصة اذا كنت تهوى الطبيعة ، بالنسبة لي سكنت في فيلا خاصة في الجبل لأنه معايا عديلي وكان معانا خمسة أطفال ، اما انت معك زوجتك وطفلك فأفضل لك فندق جياكرتا او أحد المجمعات هناك ( والفندق أفضل لك ) بس أحرص على انك تطلع الجبل في غير وقت الاجازة هناك (السبت والأحد ) ولوكنت مكانك أحجز في فندق جياكرتا قبل ما أطلع الجبل عشان ما اتوهق ، وحقيقة انا اول ما جيت الجبل فكرت أمدد اجازتي لكن ظروف عملي ما ساعدتني ، لانه جو الجبل متعة لحاله (وتحتاج يوم كامل لتامان سفاري ، ويوم للشلالات ، ويوم لحديقة الزهور و مزارع الشاي ، وصدقني باذن الله راح تنبسط انت وعائلتك هناك- احرص انت والمدام على الاحذية الرياضية عشان راح تمشوا كثير هناك خلال التنزه في هذة الاماكن ، واذا احتجت اي شي وانت في الجبل خذ عندك ( سليمان 0818107324 هذا لو بغيت شي من البقالات هناك او من المطاعم الموجودة هناك وتقدر تروح معاه وتشتري بنفسك ( على دباب طبعا ) ويمكن يساعدك في اشياء كثيرة وهو شاب طيب يترزق الله من خلال خدمته للسياح هناك
حسين0817736389 وهذا سواق معاه جيب عشان التنزه يكلفك اليوم من 250000 الى 300000 رجل عملي يدور فضل الله من أحسن الناس اللي قابلتهم هناك واذا كان مرتبط مع ناس ثانين سليمان يجبلك غيره)
كذا راحت ستة أيام يبغالك تنزل جاكرتا وترتاح فيها يوم ( أنأ سكنت في فندق داسيت منقادوا اربعة نجوم لكن أفضل من الشيراتون أبو خمسة نجوم وأرخص ب 546000 الليلة انت وعائلتك طبعا ، قريب من الأسواق منقادوا ووي تي سي منقادوا وبصراحة أنصحك فية )
اليوم الثامن خلك مجهز نفسك من بدري الصبح عشان تروح باندون بالقطار وااقطع تذكرتك عل الاكسكيوتف كلاس وبقطار argoe code ترى القطارات عندهم مهي بسوى ، سعر التذكرة 75000 للشخص الواحد واذا جيت بوقت حرج يبيعونها برا قرب المحطة ب85000 ( سوق سوداء ) والرحلات تبدأ من الساعة 6.5 صباحا على ما اذكر وبعدها كل ساعتين رحلة ولو تطلع على رحلة 10.5 أفضل عشان ما يضيع عليك يومك، مدة الرحلة ثلاث ساعات الا ربع بس ممتعة جدا من الطبيعة اللي تشوفها حولك
وسامحني ياخوي عشان والله تعبت لاني مثل السلحفاة في الكتابة وبكرة اكملك الباقي ان شاء الله

1. الأخ السكبني زين اني رجعت اكمل الموضوع قبل ما تقراه

الأخ السكبني زين اني رجعت اكمل الموضوع قبل ما تقراه

طبعا قبل ما تطلع باندون من الافضل انك تكون مرتب حجز في فندق هناك والفنادق المذكورة في البرنامج على ما اعتقد جيدة ( لم أرها الا من الخارج ) بالنسبة لي سكنت في فيلا في مجمع اسمه ( Puri Setiabudhi ) تتكون من صالة ومطبخ صغير في الاسفل وغرفة نوم مع الحمام في الاعلى وبصراحة جدا ممتازة ( الليلة بسعر 350000 روبية من غير الافطار ، طبعا انا اخترت كذا عشان الفطور اندونيسي ، وكنت اخذ اغراضي من السوبرماركت وطبعا قهوتي معايا ما خذها من هنا ما اقدر استغنى عنها وانا اخوك ) وعلى فكرة فيلا زي هذي ما تسكن فيها في السعودية بأقل من 700 ريال حسب وجهة نظري وهناك بحسبة بسيطة تطلع عليك ب147 ريال وانت احكم بنفسك
طبعا اذا طلعت من جاكرتا الساعة 10.5 راح توصل بإذن الله الساعة 1 تقريبا وعلى ما توصل المكان اللي قررت تسكن فية وتريح شوية تكون الساعة وصلت من 3 الى 4 ، وبالطبع ما يمديك تطلع الجبل وتشوف المياة الكبريتية ومزارع الشاي ، لذا اشوف انك تطلع سوق (bandung Trader Center) وهو سوق جميل وراقي( يغلق الساعة 9 مساء) والاسعار معقولة بس لازم تكاسر وهناك تقدر تتعشى في كنتاكي ولا تروح سوق البلازا وتتعشى في بيتزا هيت بعد كذا تروح ترجع مكان سكنك عشان من الصبح بدري تطلع للجبل هناك وطبعا تكون مرتب لك سواق خاص يطلعك لهناك وخذ عندك ( حسيب 081320338039 هذا ما تسمع منه الا سم وابشر كان يشتغل سواق لاحد الاسر في القصيم ويكلفك في اليوم من 250000 الى 300000)
عموما موضوع السواقين لا تشيل همه بامكانك تطلب من الفندق او المكان اللي تقيم فيه سواق حسب المدة اللي تحتاجها ويجيك لين عندك بس انت رتب امورك مضبوط بمعنى اطلب منهم ذلك بوقت كافي _ من الليلة اللي قبلها اطلب من الفندق السواق وقلهم ابغا اروح المياه الحارة والمنتزه هناك وقلهم ابغاه الساعة 8 عند باب الفندق _ مرة انا اخذت سواق هناك بالطريقة اللي ذكرتها لك عن طريق الفيلا اللي كنت ساكن فيها من الاستعلامات الساعة ب 40000 روح واتمشى على كيفك وبعد ما ترجع حاسبه وهذا الافضل بالنسبة لك وانا اخوك لانه اهم شي راحتك .
لما تطلع هناك الطريق جدا جميل لحد ما توصل المياه الكبريتية راح تشوف ابخرة الدخان تتصاعد من الارض في اسفل الاوديه ( سبحان الله ) وبعدها روح لمنتزه ومجمع مشهور هناك والله نسيت اسمه لكن هو الاشهر هناك .
وبعدها عاد تنزل للمدينة باندون
اليوم الثالث تزور متحف افريقيا اسيا هناك وتتمشى في شارع الجينز ولا تنسى تزور سوق باساربارو ارخص من السوق السابق بس هذا يقفل الساعة 5 لا يفوتك ببلاش ( برضه لازم تكاسر )
اليوم اللي بعده تجهز نفسك عشان ترجع جاكرتا وهناك ما يبقالك الا تتسوق في اسواقها منقادوا القديم و وي تي سي منقادوا الجديد
وبامكانك تروح الجبل بونشاك بعد باندون زي ما هو مذكور في البرنامج اللي ادرجة الاخ القنيط
عموما هذا ما ذكرته عالسريع
أي سؤال تحت امرك
اتمنى لك رحلة عائلية سعيدة وبالتوفيق ان شاء الله

أخوي العميل السري ،،، السلام عليكم ورحمة الله وبركاته ،،،
يعلم الله أني حبيتك في الله ياشيخ بدون ماشوفك وألقاك وذلك لرحابة صدرك وطولة بالك علي ..
بصراحة ماخليتلي مجال أوقول شي برنامج ماعليك الا تطبعه وتخله بجيبك طول أيام السفرة وكل مايجي يوم أقول فيه العميل السري قال روح هنا ( الله يجزاك خير )
بس أبغى أسألك في شي ولا تتوقع انها نهاية الاسئلة ولكن هذا لأني في عجلة شوي .

• أولا هل ترى أن وجود سواق معي يوم كامل هو مناسب أو يكفيني أخذ أي واحد بالشارع للمشوار اللي ابغاه سواء في جاكرتا أو الجبل أو باندونق يعني هو بيحطني في المكان وهل الاماكن هذي تحتاج انك تكون برفقة سواق وسيارة مثل تامان والشلالات وحديقة الزهور يعني هو مو منتزة وتاخذه تنزة برجولك او لا
• معليش هذي النقطة قبل ذيك ذكرت مكتب شتيوي للرحلة هل السعر المذكور تراه مناسب وهو شامل فندق فقط او ترى اني اروح براسي واحدد الوجهات من هناك وهو اوفر لي .
• اما ذهابي لباندونق من خلال معلوماتي الضئيلة هي انها اقرب للجبل يعني مو افضل اطلع الجبل ومن هناك اروح باندونق او افضل ارجع جاكرتا .
• وهذا للآن بس وتراني في عجلة وللحديث بقية باذن الله ون طفشت مني قولي .

هلا أخوي السكبي

• أولا هل ترى أن وجود سواق معي يوم كامل هو مناسب أو يكفيني أخذ أي واحد بالشارع للمشوار اللي

ابغاه سواء في جاكرتا أو الجبل أو باندونق يعني هو بيحطني في المكان وهل الاماكن هذي تحتاج انك تكون برفقة سواق وسيارة مثل تامان والشلالات وحديقة الزهور يعني هو مو منتزة وتاخذه تنزة برجولك او لا
في جاكرتا خلي كل مشواريك تكاسي أوفر وأحسن ، بالنسبة للجبل أفضّل انه يكون معك سواق حتى تآخذ راحتك أكثر ، في باندونق اشوف حل العميل السري حلو جداً وهو تآخذ سيارة بالساعة.

• معليش هذي النقطة قبل ذيك ذكرت مكتب شتيوي للرحلة هل السعر المذكور تراه مناسب وهو شامل فندق فقط او ترى اني اروح براسي واحدد الوجهات من هناك وهو اوفر لي .

بالنسبة للفندق أنا افضل انك تآخذه من مطار جاكرتا راح يكون ارخص بكثير من مكاتب السعودية ( يوجد مكتبين واحد قبل تفتيش الجمارك واسمة ( إندو تيل ) والثاني بعد الجمارك والخروج من بوابة القدوم واسمه ( كاها ).

• اما ذهابي لباندونق من خلال معلوماتي الضئيلة هي انها اقرب للجبل يعني مو افضل اطلع الجبل ومن هناك اروح باندونق او افضل ارجع جاكرتا .

كلامك صحيح بس في حالة انك طلعت لباندونق بسيارة في هذه الحالة تكون خط السير
جبل - باندونق - جبل - جاكرتا بس لو طلعت قطار أفّضل خط سيرالعميل السري
تحياتي BB

الاخ السكبني
اولا ما طفشت منك
ثانيا أي سؤال تحت امرك ومعاك للصبح
نرجع للموضوع حقنا
1- في جاكرتا ما تحتاج سواق يومي ( يعني لما تبغى تروح السوق، او ملاهي دنيا فانتاسيا مثلا تطلب من الفندق يحضر لك تاكسي ويوديك لهناك ولما تبي ترجع طبعا تلقى تكاسي برا ترجع فيها)
2- في الجبل تحتاج سواق يومي او بالساعة للتنزه في كل الاماكن هناك وعشان توصل الفكرة تماما باشرح لك اللي يصير

• تكون مرتب من الليلة اللي قبلها مع السواق يجيك الصباح على الساعة 9 مثلا ياخذك ويوديك سفاري يجلس يلف بالسيارة وتشوف كل الحيوانات وأنت بالسيارة بعدين يتوقف عند منطقة ملاهي وعروض الفيلة او غيرة ( في هذه الملاهي أطلع التلفريك ‘ كما يوجد مطعم لو بغيت تتناول وجبه )طبعا تجولك في هذا المكان على قدميك ، كل هذا والسواق يستناك في السيارة _ مافي تكاسي كل معه سواقه _ بعد كذا تطلع معاه ويطلعك لعروض الكوبوي ( جديدة ) لاحظ هذا كله يبغاله وقت موقليل
• نفس الكلام ينطبق على الشلالات وحديقة الزهور ومزارع الشاي ( لما تزور الشلالات السيارة ما راح توصلك لين هناك في مسافة لازم تمشيها)
• نفس الكلام يصير في باندون لما تبغى تطلع الجبل هناك وتزور المياه الحارة او تزور المنتزه هناك

3- في باندون لما تبغى تتسوق ما تحتاج الا لتكسي وعلى المشوار ( مثل جاكرتا)
بالنسبة لموضوع العرض انا اخذته عشان ما يفرق عن سعر التذكرة
التذكرة من الدمام 2500 والعرض بالسكن 2650
والعرض من جدة ب 3000 تقريبا لو انت من سكان جدة
عموما لو ما طلعت على عرض مثيل أفعل مثل ما ذكر الاخ Big Boss احجز من مكاتب المطار أوفر لك حسب ما اعرف .
بالنسبة لخط السير
باندون صحيح اقرب للجبل من جاكرتا بس لاحظ

• المسافة من الجبل الى باندون اربعة ساعات بالسيارة حسب افادة احد السائقين لي هناك
• المسافة من جاكرتا الى باندون بالقطار ثلاثة ساعات الا ربع

واذا بغيت راي القطار اريح لك عشان معاك زوجتك وطفلك
ومرة ثانية اقول لك أي سؤال تحت امرك .....
والله يوفقك ولا تنساني من الدعاء

مشكورين يا اخوان ،،، وما قصرتوا ،،
مشكور اخوي العميل السري وللحديث بقية باذن الله