نشر في امريكا US

المهنه عسكري وأبى فيزه

mr-salem

13-12-2022 - 12:36 am

السلام عليكم
أخ وليد ، أمباكت ، أهل الخبره والأخوان عامه
في الأجازه الجايه بعد 6 شهور ودي اسافر لأمريكا وارتب الأمور والخطه من الان ، اخلص الاجراءات بدري وبعدين ارتب
الباقي على رواقه
أنا عسكري في الحرس الوطني قطاع الأفواج وأدرس منتظم في جامعة الأمام محمد بن سعود قسم اللغات والترجمه تخصص أنجليزي
وأتمنى أسافر لأمريكا لممارسة اللغه وسياحيه وزيارة الأهل أخواني وخواتي والأقارب هناك .
بقدم على فيزه ، سوى كانت دراسية أو سياحيه ..
حاب أسأل عن وضع العسكري في السفاره والتقديم على الفيزه
السؤال هنا لازم تعريف الراتب وكشف الحساب .. التعريف سهل جدا ً بس كشف الحساب مافيه شيء
كشف الحساب الى حد الأن مامعي ميزانية ولا بطاقة ماستر كارد ..
هل ممكن أخذ كشف حساب أبوي أو ضمان مالي من عمي مع ارفاق التعريف بالراتب ..
وكم المبلغ المطلوب اللى لازم يكون في الحساب لرحلة فترتها من شهرين الى 3 شهور .
شكرا ً

رحلتي الى امريكا رحلتي الى الولايات المتحد

التعليقات (9)

Impact

13-12-2022 - 02:49 am

اول شي ياغالي طبعاً اكيد انت عارف عن موضوع انك تاخذ اجازة علشان التصريح ,,
بعدها كشف الحساب اذا من شخص ثاني لازم ترفق تعريف راتبه وخطاب منه انه متكفل بمصاريفك لحين العودة وكلها باللغة الانقليزية!!
انا اشوف انه وضعك بيكون غريب عليهم شوي موظف وتخلي احد يصرف عليك !!
ونوع الفيزا الي بتقدمها سياحية بس ما تدرس فيها الا اذا تبغا 3 ساعات في اليوم لمدة 5 ايام في الاسبوع يعني كور خفيف بس !!
اتمنى لك التوفيق

mr-salem

13-12-2022 - 03:50 am

impact
هلا بك يا الغالي ..
ممكن توضح عن النقطه الأولى اللى ذكرت .. الأجازه شهر واحد ، وأكيد باخذها قبل موعد السفر بيوم واحد ..
عاد مدري اذا فيه أجراء ثاني مثل ماتفضلت عن التصريح أتمنى تتكلم عنها أكثر وبوضوح .
ومن ناحية النقطه الثانيه اللى ذكرت فعلا ً ، بس أخاف يردون الطلب ويقولون مرفوض علشان ماعندك في حسابك
فلوس تكفى .. للعلم بأن الفلوس بتتوفر قبل السفر بأسبوع .. بس أبى الخطوه هذي تعدي واخذ الفيزه
ولا الامور زينه عندنا بيت هناك في امريكا ..
وبالنسبه للفيزه مثل ماذكرت سياحيه .. وفيه معهد هناك أسمه المعهد السياحي .. لفترة 3 ساعات باليوم
ويفيد اللى مثلي يبي يطور اللغه ومهاراته الخاصه .
الف الف الف شكر أخوي وأقدر لك جهودك وردك لي هنا .
أخوك / أبو مسك ..

lucky 1

13-12-2022 - 04:51 am

الاخ سالم تحية طيبة
انا وانت بنفس القطاع وانا منتسب بجامعة الملك عبد العزيز كلية الاداب قسم اللغة الانجليزية وادابها اخر سنه ان شاء الله
وانا ناوي اقدم على التأشيرة بحول الله من بدري لعلنا نقدر نتعاون مع بعض .
اخوي امباكت
ياليت تاخذنا خطوه بخطوه تكفى وتصحح لي
انا عندي اكثر من حساب وفيها مبالغ
وعندي ماستر كارد ، ( فيها مبلغ مابعد سدد بس انا منتظم بالسداد ، يأثر ولا لا )
الحين المطلوب ......
الي فهمته كشف حساب موضح فيه الراتب وتاريخ الالتحاق بالخدمة موجه للسادة سفارة الولايات المتحدة الامريكية
ويكون مترجم من مكان معتمد لدى السفاره ، لان العمل يعطينا اياه بالعربي .
انا قريت شهادة ميلاد وايصال تذاكر وصورة جواز الام والاب ؟؟؟ ولا هذي خاصة بالاطفال ؟؟
شاكر لك تجاوبك اخوي امباكت
واخوي سالم استميحك عذراً لكتابة الاستفسار في موضوعك
لكن مابغيت افتح موضوع جديد بما اننا في نفس القطاع

Impact

13-12-2022 - 05:52 am

هلا ياغاليين
بالانسة لموضوع الاجازة هذي خاصة بالعساكر انكم تاخذوا اجازة وتصريح بالسفر خارج السعودية !!
اما من ناحية الكشف اذا ما عندك مبلغ يكفي للرحلة يمكن راح يرفضوك ويمكن اصلاً اذا شافوا تعريف الرات بومبلغ الراتب فيه تمام ما يطلبوا منك كشف الحساب !!
الماستر كارد وسدادها مالها اي علاقة بالسفارة !!
الكشف ممكن تاخذ من البنك بالانقليزي اما تعريف الراتب توديه اي مكان معرف فيه من الغرفة التجارية لان السفارة تقبل ختم الغرفة التجارية !!
لا تلخبطوا شهادة الميلاد والتذاكر هذه للاطفال الي بيرسلون اهلهم جوازاتهم بالبريد لهم فقط !!
اتمنى لكم التوفيق

mr-salem

13-12-2022 - 06:53 am

الاخ سالم تحية طيبة
انا وانت بنفس القطاع وانا منتسب بجامعة الملك عبد العزيز كلية الاداب قسم اللغة الانجليزية وادابها اخر سنه ان شاء الله
وانا ناوي اقدم على التأشيرة بحول الله من بدري لعلنا نقدر نتعاون مع بعض .
يا مرحبا فيك .. حياك الله يا بعدي ، أنا بصراحه أرتحت لوجودك معي هنا .. لأنك معي بنفس الخطوه
وممكن نرتب أنا وانت موضوعنا هنا ، حبيت أسألك أنت في اي منطقه وش أسم فوجكم ؟
الله يوفقك أن شاء الله وتكون معيد في نفس الجامعه وييسر لك أمورك وتحظر الدراسات العليا بأذن الله ..
في خاطري كلام كثير لضيق الوقت أنا طالع الأن الجامعه وأدعولي بالتوفيق . الف شكر للجميع
وبالنسبه للعم أمبكت شكرا ً لك ولي عوده في الحديث معك على رواقه

lucky 1

13-12-2022 - 07:54 am

الله لا يهينك اخوي امباكت على التجاوب السريع
موضوع الاجازة اكيد مانقدر نسافر للخارج الا بوثيقة اجازة تخولك السفر للخارج هذا شي اكيد .
انا بصراحة عندي حساب ينزل عليه الراتب
وحساب ثاني هو الي عليه حركة ماليه اكثر ، بالاضافة للماستر كارد
وناوي اجيب 3 كشوفات كشف حساب لراتب و كشف حساب للحساب الثاني وكشف حساب الماستر كارد من باب الاحتياط ولا ماله داعي ؟ اقصد يكفي كشف الحساب الخاص بالراتب .

lucky 1

13-12-2022 - 08:55 am

mr-salem
الله يطول عمرك اخوي واكيد ان شاء الله راح نتساعد مع بعض
انا في رئاسة الحرس الوطني طالع عمرك منيب في الافواج قريب حولكم
والله يوفقنا وياك ان شاء الله ونحضر دراسات عليا جميع
لنا جلسة على رواق على قولتك

Impact

13-12-2022 - 09:56 am

الكشف للبطاقة الائتمانية ماله اي داعي
والافضل انك تجيب كشوف حسابات اخرى اذا كان عندك والاهم الي ينزل عليه الراتب او عليه حركات كثيرة مثل تسديدات فواتير وغيره !!
بالتوفيق

waleed8818

13-12-2022 - 10:57 am

بالاضافة لما افاد به اخوي امباكت ضروري وجهة السفر تكون مكتوبة في وثيقة السفر لأمريكا لكي يتم تقديمها لموظفي الجوازات ,
كشف الحساب لثلاثة اشهر وعندك وقت للمقابلة لترتيب الامور بحيث يكون بالحساب بتلك الفترة مبلغ لا بأس بة ,
وارفق كشف حساب لأكثر من حساب اذا عندك ,
وضروري يكون معك بطاقة ائتمانية بامريكا لايجار السيارة وللفنادق ولغيرها , السحب بالصراف ما يسحب مثل عندنا لحد 5 الاف ممكن بالسحبة الوحدة يسحب 400 دولار ,
تحياتي , , ,

امريكا US المسافرون العرب

المهنه عسكري وأبى فيزه