بارون
02-07-2022 - 06:34 am
ابو شلاخ الاندونيسي
حلقات تبين المشاكل اليوميه اللي يتعرض لها المسافر لاندونيسيا ... بشكل بوهونقي 100% (يعني تأليف ).
من بعد ذلك نستطيع التعليق على كل حلقه ... وهل واجه احد تلك المشكله او لا .
وراح نسوي زي طاش ما طش .. اللي عندي فكره لأحد المشاكل يرسلها لنا ونحن نقوم بالفرز ونعلن عن اول 30 حلقه تعجينا .
الكشخه في بلاد الاندومي
تبداء حلقات اخونا ابو شلاخ من الجبل بونشاك ...
طبعا طالع للجبل مع احد السواقين اللي خذاه من عند موقف الكداديين عند مطعم اميره .السواق ما صدق على الله انه يوصل للجبل ... فتح الباب وينزله برفسه على جنبه الايمن ما طاح الا وهو في نص البقاله ... (امتحن السايق يلعب في المسجل ويدخن ويطفي داخل السياره هذا غير انواع النصب والسوالف اللي ما تنبلع )
ويديور السايق وبثنين في وجهه وانواع التصفير من الشباب اللي حاظرين ...( الشناط الشناط ,, قالها ابو شلاخ) وهو يلقط له غرشة بيبسي ابو نص من البقاله ... وعلى الجامه الخلفيه ...
حوء< === هذا البريك ,, نزل الماس ويكافىء ابو شلاخ بكم كف على طراق على تشويت ...الخ ,, وبعد تصفية الحقوق وبكاء اخونا ابو شلاخ .. دفع قيمة الجامه ,, وخذا شناطه ,,,, ( اخونا ابو شلاخ كان حاط اعتماده على الشباب اللي حاظرين _ العرب منهم _ ... لكن طلعوا رياجيل كفوا ,,, وش لهم بالمشاكل والفزعات ... اصلا من يشوف وجه ابو شلاخ الزامي ما يعيد النظره ابدا .
المهم ان اخونا قام يسحب شناطه (الله واكبر يا الشناط ... شنطة او بالاحرى كيسة مرسوم عليها كاس العالم ومعفس ثيابه فيها _ اخواننا القدماء يعرفون هالكيسه مضبوط ) ويطلع على شقق القولف كعابي (يلعن ابو جد المشوار _ وكله طلوع ) ,,, مالكم في الطويله ... بعد ما قام المكاسر والهواش ... انا زبون,, انا على طول يجي ,, انتا ما في معلوم انا ,,, قالها ابو شلاخ غاضبا وهو ما عنده ما عند جدتي ( < === الا وش عندها جدتك يا بارون )
طبعا الماسات قالو له خذ بقشتك واطلع قبل تصير علوم ,,, هنا رضخ خوينا للامر الواقع وسكن عندهم .
بعد نومه هنيه وجميله (امحق نومه على جوع ) وبعد بزوغ الشمس ( بزوغ جايه صح ولا غلط )
انطلق ابو شلاخ وكالعاده كعابي للبقاله السعوديه (يبي يشتري بيض وخبز ) واول ما اقبل على التقاطع !!!
اتركم مع ابو شلاخ ليكمل الحدث لكم
ابو شلاخ : يا ولد هذا اعرفه ,,الوجه مش غريب علي ,,, اشوف هاه يا ولد غير بدل ,,, هذي كنها فرة اخونا سمسم ج .< === معليش يا شباب باخذ المقرفون شوي عشان اوصف لكم وش صار ....
ويلتفت على اليسار يبي يقطع الشارع
حوء ديد ديد طاط طاط قربع طاخ دوم ... ( اندعم البطل ابو شلاخ ) ,, لكن بصراحه موقفه من الدعمه كان شجاع ,,, وقف بسرعه بعد الدعمه وتلفت يمين ويسار ونفض الغبار من البدله وقال : شرايكم بالحركه تبوني اعيدها . طبعا الموقف هذا صار كله واخونا سمسم ج ما التفت يشوف وش السالفه ,,يعجبك سمسم ج ماله في المشاكل ولا يحب يتدخل في امور الناس .
المهم نكمل السالفه على لسان ابو شلاخ وصديقه سمسم ج
ابو شلاخ : سمسم يا سمسم ج ,,,
سمسم ج : هلا هلا والله ببو شلخ
ابو شلخ : سلامات يا بو جي وراك جالس هنا .< === ما يعرف يتحفى الرياجيل على طول وش عندك
سمسم ج : قبل لا اقولك وش عندي ... انت وش لون عرفت انه انا ..!!!! ؟؟؟؟؟؟؟؟؟؟؟؟؟؟؟؟؟؟؟؟
ابو شلخ : الله يقطلع سوالف ابليسك ... يا خي هذا انت ما تغيرت كنك بالحاره ... ثوب نوم مخطط نص كم وشماغ والطاقيه على الحواجب على طول وداق بنت البكار ( شريمبو _ وللاشخاص اللي ما يعرفون معنى الكلمتين : هي نسفه للشماغ سريعه جدا وما يطبقها صح الا العرابجه ) وحافي .
بس اللي متغير فيك ان الغرشه اللي معك مرندا فراوله ,,, ولا العاده غرشه كوكا .
ابد كنك جالس بزاوية الحاره
بس قلي انت وش عندك ,,,تراك ما قلتلي وش عندك على الجلسه هنا .
سمسم ج : يا خي انا رحت ابي احلق شعري عند الحلاق اللي داخل البقاله ,,, قالو لي افصخ الشماغ ,, وانا شماغ ما راح افصخه !!!!!! وجالس احتري الحلاق الثاني عشان يفتح .
ابو شلاخ : طيب الحلاق الثاني فاتح ليه ما تروح له ؟
سمسم ج : لا ما اقدر اروح الحين ... انا جالس احتري واحد من الشباب بيجي من جاكرتا ,,,ومواعده هنا .
ابو شلاخ : زين ما فيه مشكله كلم الرجال وقله انك في الحلاق ,,,
سمسم ج : بس انا ما معي تلفون
ابو شلاخ : طيب كيف واعدته يجيك هنا ؟
سمسم ج : هو قالي انه بيجي اندونيسيا في الصيف وانا جالس اتحراه لي كم من يوم .
ابو شلاخ : اقول انا غلطان اني سولفت معك اصلا ,,, وقتي ضاع خساره ( < == وقته من ذهب ),,, انا بروح البقاله اشتري بيض تبي شيء ...
سمسم ج : جيب لي معك شكشوكه ... !!!!
ابو شلاخ : يا بوي انا رايح البقاله ... مش البوفيه
نهاية الحلقه الاولى
القضايا اللتي نريد الاشاره لها ,, او التعليق عليها بأرائكم :
قضية عدم احترام اهل البلد
قضية الفزعه
المشاكل الحاصله لا خوننا اللي يقطعون الشارع وهم يناظرون لليسار
لبس الزي السعودي هناك
نترككم على امل اللقاء بكم في الحلقه القادمه واللتي نتناول فيها قضايا اخرى ,,, مع وصول صديق سمسم ج للجبل