هلا أخوي وجيه ..
أجل جازم خلاص ؟؟
أنا والله بأرفع نص الرايه ... والنص الثاني باقي عليه شوي ...
بديت في اجراءات الفيزا ... لكن لسا ما ارسلتها للرياض ...
المدة راح تكون إن شاء الله حوالي 20 يوم .
التذكرة على التركية تقريبا 2900 ريال .
أما الميزانية فوالله ما حسبت حسابها لسا ...
انا وحدي طبعا .. قالوا لي شباب ... خذ معك ألف يورو كاش ... وإذا ما كفاك ... اسحب من هناك ...
هذا مالدي حاليا ..
لك كل الود .

هلا بالغالي اخوي مسافر متزن ,,,,,,,,,, بالنسبه لي اعتبر تأكيدك لرحلتك لرومانيا هي دعم لفكرتي كلها خاصة ان البلد بصراحه رغم حلاوته الا انه يضل غامض في نظر الكثير من الاخوان وذلك لقلة المواضيع المكتوبه عنه ,,,,,,,, على العموم تمت الاضافه وانا بأنتظارك .............. مغليكم

والله انا من زمان ونفسي ازور رومانيا مرة ثالثة لان اخر مرة زرت فيها رومانيا هي في شهر 3 - 2001
يعني تقريبا ست سنوات ما شفت رومانيا واتمنى اني ازورها وخصوصا براشوف اللي سحرتني بجمالها
وخلتني مجنون واحلم برومانيا ليل نهار
بس بأذن الله عزمت اني ازورها هذا الصيف
وطبعا راح اطير من الكويت باتجاه دبي ومنها على الخطوط الرومانية بأتجاه بخارست
وبالنسبة للمصروف طبعا كل واحد ومصروفه يختلف عن الثاني
وراح اقيم ما بين 10 ايام الى اسبوعين بعد ما نقوم بأجراءات الفيزا انا وصديقي في اول شهر ستة الجاي
والله كريم

حتى نصحتني وحده من اهلي اروحها والصراحه انصدمت انها رخيصه وهي في اروبا وقررت اروحلها في شهر العسل
متى ناوي تسافر ؟؟؟
24-7 الي ماعرف ما حددت المده اسبوعين اول اقل
عن طريق اي خطوط .؟؟؟
شكلي بروح عالتركيه او الاماراتيه تكون دايركت بدون ترانزيت
كم سعر التذكره ؟؟؟؟
بعدني ما حجزت
وش سويت في امور الفيزا ؟؟؟؟
بعدني ان شاء الله اول شهر 6
كم ميزانيتك وكم شخص رايح معك ؟؟؟؟؟
انا وزوجي شخصين
كم المده ؟؟؟؟
اسبوعين او اقل
اين مواقع السكن التي تنوي السكن فيها ؟؟؟؟؟؟
بعدني ماعرف شي
ماذا عن جدول الرحله واي المناطق التي تنوي زيارتها؟؟؟؟؟؟
بعدني ما اعرف معلومات كافيه
شكرا اخوي عالموضوع والصراحه اتمنى اصحاب الخبره يفيدونا

السلام عليكم ,,
شدني الموضوع وحبيت اشارك فيه ,,
الاحظ قله المواضيع المتعلقه برومانيا وانا ناويه السفر لها بالصيف هذا ان شاء الله ,,
وينقصني بعض الامر المتعلقه فيها واواجه صعوبات بخصوص هذي الدوله وراح اقولها لكم ,,
اولا : انا ناويه السفر ان شا الله بشهر جولاي , مده السفر 25 يوم , مع العائله 5 افراد ,,
ثانيا : الحجز عن طريق الخطوط التركيه , والفيزه والسكن لسى مابديت وراح اتعامل مع الطيار ,,
الميزانيه تختلف ولا اقدر احددها ,,
بالنسبه للاماكن تكلمت مع المكتب وحددلي اماكن وجاري البحث عن الاخر ,,
اهم الاسئله اللي ابي الاجابه عنها وارجو التفاعل وهي ,,
السؤال الاهم * هل هي مدينه صالحه لسياحه وخصوصا (( العائله و الاطفال )) وهل يوجد مناظر مخله؟؟

• الطقس برومانيا بارد ام معتدل (( ورانيا تجهيز السفر ))؟؟
• بحكم ان الاغلبيه بنات بسالكم عن التسوق فيها كيف ؟؟ ولوجد طفلين ياحرام نبي نفرحم هل يوجد اماكن تناسب لهم ؟؟

وبشكل عام هي مدينه سحرتني وعجبتني بس الله يستر عساها تعجب اهلي وانا خايفه لاني ماحصلت معلومات عنها ,,
كل الشكر للاعضاء والقراء ,,
خالص الود ,,

ناوي بس بدون معلومات وابحث عنها اذا موجودة
مع الشكر للجميع

السلام عليكم q8kiwi يحييكم من الكويت بخصوص رومانيا آنا سافرت لها سنة 1998 وانشالله إذا الله كتب راح اسافر لها في هذا الصيف شهر 8 . طبعا رومانيا حاليا أنظمت للأتحاد الأوروبي ويمكن القوانين تغيرت عن سنة 98 بس أقدر أفيدكم بالجو العام لرومانيا :
العاصمة( بوخارست) مافيها شي يستاهل أغلب المصايف في مناطق خارج العاصمة وأشهرها منطقة (براشوف) وهذي منطقة تحيط فيها الجبال وفي موسم الشتاء الناس تسوي سكي (التزحلق علي الجليد) وبالصيف للراحة والاسترخاء كون أنها منطقة خضرة وبين غابات خصوصا منطقة صغيرة تبعد عن سنتر براشوف بالسيارة تقريبا نص ساعة صعودا للأعلي أسمها (بويانا براشوف) فيها فنادق ومنتجعات وتلفريك وبعض المطاعم والديسكووات يعني للي يفضل الهدوء والخضرة والاشجار والابتعاد عن الزحمة والازعاج عليه ببويانا براشوف
نرجع حق منطقة ثانية أسمها( نيبتون) وهذي منطقة ساحلية علي البحر تبعد عن براشوف بالقطار تقريبا من 6 إلي 7 ساعات هذي منطقة مصيف للرومانيين والأوربيين بشكل عام وفي منطقة قريبه لها اسمها (مامايا ) بس بالضبط ما أعرف جم تبعد عنها . للتنويه حق المصطحبين معاهم عائلاتهم المناطق هذي ماتنفعهم وخصوصا إلي معاهم أطفال . لانة البشر هناك علي الشواطئ نص عراة وبعض الأحيان عراة الأ ربع بس أنها تمتاز بالزحمة والسهر خصوصا بالصيف والمطاعم والمقاهي والبسطات علي جانب الطريق في وسط المنطقة . منطقة مامايا آنا مازرتها بس أتضحلي من التصفح والبحث عن طريق الانترنت أنها أكبر من نيبتون وأطلعت علي صور عديدة لها وتكثر فيها الفنادق والمقاهي مباشرة علي شاطئ البحر وفيها مدينة مائية وأحواض سباحة وطرطشة وفرفشة وضروري يكون معاك مايو للسباحة ونظارة شمسية وكريم حماية من اشعة الشمس لأنة بالنهار وايد التشمس زين هناك بس طبعا ماتوصل الحرارة مثل حرارة شمس الخليج
وعلي فكرة من ناحية الأكل رومانيا كلها تفتقر من المطاعم العربيه او الذبح الأسلامي ومن ناحيتي آنا شخصيا ماكنت ارتاح حق أكل المطاعم العادية أو الغير معروفة وكنا دائما نتجه للمكدونالدز او البيتزا او السندويتشات الخفيفة . ومن ناحية المعاملة طبعا 80 بالمئة لا يجيدون الانجليزية بس ماكنا نحتاج انه نسولف معاهم بس طبعا الكل تقريبا يفهم الارقام بالانقليزي حق التكسي او المطعم او التسوق اما الفنادق ماكان في مشكلة . حصلت لنا بعض المشاكل فى أول الرحلة بس عموما ماتستاهل الذكر الأن كون أحنا سواح أغلب الرومانيين يحاولون أستغلالنا وهالشي موجود في كل الدول السياحية تقريبا . ومن ناحية التسوق ما أقدر أعطي معلومات من هالناحية بالوقت الحالي لانة أحتمال حاليا فتحت مولات او اسواق ماكانت موجودة سنة 98 بس سمعت من بعض الاصدقاء القادمين من رومانيا مؤخرا إنه البضائع لا تستحق الشراء وكل شي موجود في دول الخليج هيه هيه تقريبا نفس البضائع الا البضائع الصناعة اليدوية او التحف لمن يهتم بهذا الامر . وأنشالله أكون عطيت معلومات تفيدكم يا أحبابي
ومن يرغب بمعلومات آنا لم أذكرها أو صور من البوم رحلتي إلي رومانيا علي الرحب والسعة
ويقدر يتواصل معاي علي الإيميل :
[email protected]
الرجاء عدم الإظافة بالمسنجر التواصل عن طريق الايميل فقط

بسم الله الرحمن الرحيم
أبي أسأل كم أجار الشقة أو الفلة في الشهر وهل هي آمنة