اخوي عاشق المندي
جيت في وقتك....ياليتك تعطينا معلومات عن رومانيا من طقطق للسلام
عليكم ...لأن اخوك أول مرة يروح لذيك المنطقة ...ومايعرف عن رومانيا الا
أن فيها بيتش يمدحونه
ولد عمك عاشق المظبي

ابشر طال عمرك انا لعيونك0000 سلمك الله اول شي تسويه تروح لمكتب الخطوط الرومانية (تاروم) بالرياض او جدة او الخبر والاا تروح لوكيل سفريات لهم من الوكالات المعروفة سواء الطيار او المؤيد وغيرهم كثير بس انصحك تاخذها من مكتبهم ارخصلك االي بشارع الستين بالرياض قدام مطعم النافورة وتحجز ان بغيت تروح مع قروب والا تروح ادرعم هناك بس انصحك تروح تغامر ازيلك من القروبات علشانهم نصابين وبكاشين000 سعر التذكرة تقريبا من 1800 الى 2000 ريال وفيه رحلتين بالأسبوع من الرياض بالصيف بس على خطوط تاروم الرومانية وبعد ماتحجز تروح للسفارة الرومانية با الرياض بالعليا عند أسواق العويس تخليها يسارك وانت رايح شمال وتخش يمين تلاقيها داخل الحارة قريبة من المسجد الوحيد هناك وتشوف علم رومانيا يرفرف فوق ذيك الفله الصغيرة 00 السفارة تفتح الصبح بس والبوابة مسكرة دق الجرس ويفتحولك وقلهم ابي فيزا سياحية قيمة الفيزاء اذكرها 150 ريال ان ماتغيرت الحين يبي يقولون لك تعال بكرا وخل الجواز بس رص عليهم قل انا مستعجل ويبي يعطونك اياه000 وانتبه ترى فيه موظفين وموظفات يبي يعرظون خدماتهم عليك لا دروا انك اول مره تروح انصحك طنشهم يبي يقولون لك تبي مترجمين عرب يستقبلونك انتبه لااتوهقبهم تراهم نصابين كلها سمسرة 000 انتها الجزء الاول الذي في السعودية نكمل في الجزء الثاني انشاالله مابعد الفيزاء 0000 وشكرا وتقبل تحياتي!!!!!!

بعد ماتفيز عاد انت تعرف الباقي000 بالنسبة للطيارة حليوة حقتهم تبي تقلع الساعة 2 صباحا وانشالله الساعه 6 وانت في قلب بوخارست العاصمة يسمونها باريس الشرق000 ملاحظه هامة وانت في الطيارة يبي يذبحك الظماء ولا بغيت ماء لاتقول آي وونت ووتر قل اوونت بلاتر لأن ماهم غير مانا هم يشربون ابو غاز 000 لاتصير مثل اخوك عاش المندي جلست ثلاثة ايام ماغير اشرب من ماهم ابو غاز لين شفت وحدة لبنانية في مطعم وخشيت بعينها قلت ابي موية زي الناس ابي اشرب وضحكت وهي اللي علمتني هالكلمة بس كلمة حق بعد ماتشرب ماهم تحس انك ماتعطش مادري ليش000 المهم بعد ماتاصل الفجر هناك انصحك تريح بهوتيل اسمه فلورا 4 نجوم قيمت الغرفة سريرين 120 دولار صح انه غالي بس يستاهل والله بس لو تشوف فخامته وا لأمن تنبهر000 وفيه شقق حلوة وفخمة ناسي اسمها والله بس معروفة نصيحتي لكم لاتجلسون بالعاصمة لأنها غالية ومافيها شي يعني ذاك حدة انصحكم تاخذون للكم تكسي ب50 او 60 دولار وتروحون لمدينة اسمها كونستانتا على البحر الأسود تبعد عن بوخارست تقريبا 4 ساعات بالسيارة وفيه القطار حلو مرة والله التذكرة تقريبا ب10 الى 20 ريال 000 المدينة تتأ لف من عدة مناطق فية منطقة اسمها مامايا والثانية اسمها نبتون وفيه ثالثة ناسي اسمها والله بس كلها حول بعض انصحكم تروحون لمامايا علشانه منتجعات وفنادقها رخيصة ونظيفة وامنها زين 000000 نكمل الجزء الثالث في وقت لاحق وتقبل تحياتي!!!!!!!!!!!!

يعطيك ألف عافية وفي انتظار المزيد
بس الأمن وشلونه بذيك الديرة بشكل عام لأن أخوك خواف وياروح مابعدك روح;)
ممكن تفصل لي طريقة القروبات معهم وأشوفك مامدحتها وش السبب
وعلى سالفة سفارتهم واحد وصفها لي نفس توصيفك وقال أن السفير
هو بنفسه اللي يختم ،،،يعني ماعندك أحد
أقول ياراعي المندي في هناك مطاعم عربية والا لا وكيف عريبيا هناك
واجد ولا شوي وهل منهم مشاكل أم لا
نسيت أقول لك ،،، مرة في بريدة أدور غدا أقول عندكم دجاج مظبي يقولون وش المظبي ما نعرف الا المندي وبس

طبعا نكمل حديثنا بالنسبة للعملة عملتهم اسمها لي يعني تقريبا 1 ريال يساوي 5000 لي بعملتهم 000 طبعا البلد مو ذيك الغالية بس عندهم الملابس تقريبا زينا أما الاكل فهو رخيص بالنسبة للمطاعم عندهم ماكدونالد اسعاره زينة وحليلة اما المطاعم العربية فهي غالية لحدما واكثرها لبنانية؟؟ اما الكبسة الله يعينك مانتب لاقيها بس يبي يقولون للك نظبطلك الكبسة بس صراحة مايعرف للخبز الى خبازة000 أما المشويات فهي دلع صراحة المطاعم العربية مو ذيك الكثيرة وسمعت ان فيه مطاعم تركية بس صراحة ماشفتها بالنسبة للمطاعم العربية تلاقيها في مامايا مطعم لبناني اسمه ويست مطعم حلو راعيه اسمه ابوطارق اشتغل بالسعودية في جدة قبل00 المطعم حليو بس اسعارة لك عليها شوي بس يستاهل علشانك بمقطعة المطعم جنب فندق اسمه بيرلا000 بالنسبة للقروبات مانصحك فيها كلها نصب واحتيال تدفع فلوسك هنا ولا تنبسط اول شي يسكنونك بكوخ والا بغرفة سريرين مهيب اللي انت تبي وبعدين تسكن برا الديرة في اماكن بعيدة عن البلد ولابغيت شي ماتقدر تروح للديرة لازم تنتظر باصهم علشان يوديك يمشيك ومايجيك الا مره وحده باليوم لا وبعد وجباتهم مهيب اللي انت تبي يعطونك زبدة وخبزة ويقولون هاذي وجبة والله عالم!! اقسم بالله اني رحت انا وصديقي كنا بايعينها وكان معنا سعوديين بالطيارة رايحين قروب ويوم العودة حصلناهم بالمطار وقمنا نسولف وانهبلوا من سواليفنا والاماكن اللي رحناها اثرهم الضعيفين ماشافوا شي مهكوك عليهم !!

بالنسبة للأ من لاتخاف على كيفك لأن البلد تعتمد على السياحة بشكل كبير ولافيها مافيا مثل الدول اللي حولها(بلغاريا وهنغاريا واوكرانيا )البلد توها طالعة من نظام شيوعي ومنفتحة وطبيعة الشعب طيب مرة خصوصا القرويين وفيهم طبايع من العرب لايعرفون الكذب بس لاتنرفزهم 000 الخوف من العرب اللي هناك خصوصا؟؟؟ بس فيه العراقيين نشامى والله وتقدر تثق فيهم وفيه طلاب هناك سعوديين بس شويين وفيه اماراتيين ويمانيين وسودانيين000 وانتبه من الغجر تراهم كثيرين هناك وحاول انك ماتحتك فيهم تراهم لاشافوك غريب يحاولون يعرضون خدماتهم عليك ويبي يرسلون عيالهم يشحذونك اي شي حتى الموية الغجر واضحة اشكالهم ملابسهم وسخة بس انتبه تتعامل معهم لأنهم زي العصابات ترا اذا داخلتهم يبي يشتلونك وانت تشوف وراح يعرضون خدمات مغرية !!! انتبه 0000 بالنسبة لعريبيا بصراحة ماشفتهم الى بالمطار لأني مبعد عنهم 400 كيلو بس اللي يروحون هناك بصراحة فاهمين السفر ماهوب زي جحلط سوريا والبحرين 000 فية جالية يهودية كبيرة هناك يشتغلون بالتجارة تلقاهم بالمحلات انتبهوا تهرجون عربي داخل المحل بعظهم يفهموننا تكلموا لهجة عامية بحته خصوصا اذا كنتوا قصمان والا سديراوية والا اي لهجة سريعة بينكم لاتوهقون مثلي انا ورفيقي ؟؟؟ حاولو انكم ماتكشخون ذيك الكشخة لأن الشعب داج مرة وتلفتون الأنظار000 يبي يسألونكم الرومانين انتم يهود والعياذ بالله لأن أشكالنا زي اليهود بس معذوريين عشان الشعر والعيون00-0 وللحوار بقية ياراعي المظبي؟؟؟؟؟؟؟؟؟؟ِ

يعطيك العافية ياعاشق المندي .. وعساك على القوة

حياك الله أخوي عاشق المندي
بما انه عندك معلومات عن رومانيا فياريت تنزل موضوع مرتب وفيه كل شي من ناحية افضل الفنادق والمناطق والأماكن السياحية و...و... إلخ. لكي يستفيد منها لجميع.
تحياتي لك
Awal_7abib

مشكور اخوي
والله ودي اسافر لها بعد اسبوع يا ليت تزودنا باسماء اهم الامكان السياحية هناك ؟
وايش تعرف يا الغالي عن المناطق الجبلية على تنصح بها ولا لأ؟
ولك جزيل الشكر ادري انك تعبت وانت تكتب ولعلمك طبعت كل كلامك وباخذه معي