رأي شخصي اخوي الكريم
انا سبق سكنت في فندق في كومو ورأيي أن كومو لا تستحق الاقامة
ممكن تزورها ساعتين زمن
والرأي لك ,,,

أبو ريان
أشكرك أخوي.......
بس فندق كومو هل اسمه كذا (فندق كومو)؟؟ والا له اسم ثاني؟؟؟؟
بعدين ليش ما تنصح بالسكن بها ودي أعرف ؟؟؟؟
أختك | الأرض مسرحي......

الأرض مسرحي
هلا أختي
والله اسم الفندق ما يحضرني لكن ممكن ابحث واطلعه لك
كومو عادية جدا مجرد بحيرة ما فيها شي يستاهل الاقامة , واذكر اني تورطت في السيارة اللي معي لايوجد موافق مجانية فيها .
انا ما ادري وش مخطط سفرتك وعلى وين متجهه , ولكن ما أقارنها نهائيا ببحيرة زيلامسي بالنمسا او بلوقانو في سويسرا , او بحيرتي ثن وبيرن في انترلاكن
اذا لكم شغل هناك فما يمنع الاقامة , لكن اذا الغرض سياحة فأنا أنصح تستغل كل مكان جميل, اما المكان العادي فيكفيه زياره وتمشي لمكان أجمل منه
علميني مخطط سفرتك ممكن اقترح مكان افضل ,,,

أبو ريان
أشكرك أخوي.......
مخطط السفرة حقتنا
ايطاليا سبق زرتها بس الحين حابة مكان جوه مثل جو باريس ضباب وبرد خفيف ومنظر البحيرة
ومافيه لا زحمة ولا تنقلات متعبة ولا غلاء كبير ....
يكون هادئ وحالم وسهل والارض مافيها نزلات وطلعات حسب ما سمعت عن لوقانو مثلا.....
أبغى شي يشبه جو برمانا بلبنان بدون وعورة بالطرق يعني آصله بسرعة واجلس فيه والتمشي بدون مواصلات,,,,
يعني جو يصلح أقعد أكتب فيه شعر مثلا
جد ما أمزح والله.....
وأشكر أهتمامك أخوي......

وسفرتنا كلها أسبوعين تقريبا.....
تعبانين من العمل ونبغى ترييحة مع شوية حرية بدون أطفالنا طبعا هذا المطلوب....
وشكرا اخوي ابو ريان....
و شكرا لكم جميعا....

الأرض مسرحي
اللي فهمت منك انك تبين مكان يتميز بالطبيعة الخلابة واتوقع بما أنك بنت أكيد لك اهتمامات بالتسوق
وخلافه
هل رحتي انترلاكن في سويسرا ؟؟ انا اشوف انها مناسبة لو تبي تكتبين معلقة
بشرط استئجار سيارة والتمشي فيها وممكن تروحين لها من ميلان لو حبيتي
انترلاكن مدينة صغيرة واقعة ما بين بحيرتين ثن وبيرنز وكل المنطقة شلالات وجبال جليدية وشي يرد الروح
يعني تروحين من الوطن الى ميلان وتجلسين في ميلان يومين وبالطريق تزورين كومو وتروحين لوقانو ومن ثم انترلاكن وبعدها هايدي لاند ويكون الرجوع من ميونخ مثلا ولو حبيتي ملاهي ممكن تزورين رست في ألمانيا (يوروب بارك)
حددي اهتماماتك من ناحية الطبيعة والتسوق والملاهي والمدن الصاخبة والمدن الي سبق زرتيها واحنا نساعدك ان شاء الله
وانصحك تزورين مواضيع عن انترلاكن مثلا ولك في مواضيعي في توقيعي كمثال والا المنتدى مليان
اما ايطاليا مع احترامي ما تتميز بالطبيعة وما يمنع انه فيه اماكن حلوة ورائعه في ايطاليا وزرتها شخصيا مثل فينيسيا ورتشوني وريميني وغيرها ,,

أبو ريان
أشكرك أخوي أبو ريان كفيت ووفيت وسوف اطلع على مواضيعك.....
وبعدها نقرر....
من اهم اهتماماتي المسرح بالهواء الطلق بالساحات مثل اللي شفت ب روما
بساحة بياتزا نافونا .....
اغلب المدن الايطالية زرتها ...روما وفينيسيا وميلان واوستيا وفلورنسا ....فلورنسا شفتها واحنا بالقطار ما دخلناها...
بس حابة اعرف هل توجد شقق فندقية على البحيرة مباشرة ب لوقانو؟؟؟؟؟
اللي يعرف رجاء يجاوبني ؟؟؟؟
ومشكورين اخواني....

أنا بالنسبة لي أعتقد أن كومو مدينة زيارة وليست مدينة سكن
حلوه تزورها 5 ساعات بس ما تسكن فيها
وهي تبعد تقريبا ساعة من وسط ميلان
والنشاطات الي فيها تخلص منها في ساعتين تقريبا
فيه جوله بالقارب على البحيرة
تاخذ منك 35 دقيقه ب20 يورو تقريبا للشخص الواحد
فيه التلفريك يطلعك فوق الجبل
وفيه مطعم أول ماتنزل من التلفريك رائع جدا جدا جدا ويستحق التجربة وخاصة ستيكات لحم البقر
وفيها الطيارة المائية الي تاخذك بجولة من من ربع ساعة الى ساعة كاملة وتشيل شخصين فقط
الساعة ب300 يورو
ولازم حجز مسبق
وبشوف لك الرقم أجيبه لك لو تبغين
وهذا الي أقدر افيدك فيه
تحياتي لك

llvlloto
أشكرك أخوي ما قصرت ....
وياليت ترسل لي الرقم وكم حقة باليوم لو تكرمت ؟؟؟