ياهلا ومرحبا فيج بالكويت والجو بشهر 6 حر بس رطوبه مافي والله اعلم
واستفساراتج الثانيه ان شاء يردون عليج الاعضاء

بالنسبة لسكن لازم تحددين المبلغ الى تقدرين تدفعينة
المجمعات :
الافنيوز
المهلب
الفنار
0المرينا
سوق شرق
افضل المجمعات متوفر بهم مطاعم وسينمات ومقاهي بدون شيشة
الاماكن الترفيهية:
حديق الشعب
حولي بارك
مدينة الترفيهية
ابراج الكويت
المركز العلمي
المتاحف
شارع الخليج

حياج الله لولو
المجمعات للماركات الصالحيه - الفنار- 360- الافنيوز
وبالنسبه للجو عندنا لطيف ههه ساعات غبار وساعات رطوبه وساعات حر مو مهم الجو المهم القعده الحلوه
المولات تفى بالغرض ما راح تحسون بالجو الا بالسياره
والافنيوز فيه كل ما طاب من المطاعم اى نوع من الاكل تفضلون هناك
الايرانى
الهندى
الصينى
اليابانى
اللبنانى
الايطالى
الفرنسى وغيره الكثير
والاسواق عندنا حسب ميزانيتج هناك الغالى والمتوسط والبسيط الشعبى
و بالنسبه للفسح والطلعات خلوها بايام غير الويك اند اذا ما تحبون الزحمه
والسينما عندنا ايام الاثنين التذاكر تكون مخفضه بدينار ونص للتذكره لكن احجزو مبجر
وفى بالمنطقه الجنوبيه
مول الكوت فيه سينما وتسوق واكثر من كوفى شوب
مول المنشر فيه فندق روتانا ومطاعم وكوفى شوب
واجيال مول فيه سينما واسواق ومطاعم
والسالميه فيها المارينا مول فيه سينما ومطاعم واسواق واكثر من كوفى شوب
والفنار وليلى جاليرى وسوق شرق فيه اكثر من سينما
وحياكم الله

مشكورين الله يعطيكم العافيه

عندك اسواق القرين محلات واسواق شعبية وسوبر ماركت لولو هايبر محلات متنوعة وكثيرة من بيع التمور الى حليب الخلفات ههه واسواق شعبية مثل سوق رامز ومحلات الكترونيات مثل الكترو زان ومطاعم عبارة عن جولة واخذ فكرة عن اسواق القرين

1. وبعده متحف بيت السدو على شارع الخليج العربي رقمهم 22432395.


2. اليوم الثاني :


3. اليوم الرابع :


4. الصبح اتريقون في الفندق اتسون ريوق بيتوتي


5. اليوم السادس :


6. اليوم السابع :

الاعزاء اعضاء بوابه الكويت السلام عليكم
بسافر الكويت اول مره انا وزوجي بدايه 6-2011 لمده اسبوع للتسوق لاني اسمع عن بضاعه الكويت حلوه
كيف الجو بدايه 6 _2011 حر ورطوبه لاتطاق ؟؟
قريت عن المولات والاسواق الشعبيه مشاالله كثيره عندكم استفساري
بالترتيب ايش المولات ( ماركات عالميه وعاديه ) والاسواق الشعبيه الحلوه الي اروح لها ؟؟
ابي المطاعم والمقاهي التوب ؟؟
يعني مثلا ابيكم ترتبون لي الجدول اماكن تكون قريبه من بعضها عشان الوقت السبت (مقهى + مطعم + مول او سوق شعبي + سينما = ) وهكذا
الاحد و الاثنين و ......................... بليز ساعدوني لاني والله من جد مو عارفه
وايش الاماكن السياحيه الي تستحق الزياره ......
وايش افضل منطقه للسكن ......
حياج الله اختي لولوو في ديرتج وزارتنا البركه .. ماقروا اخواني في الرد .. وانا بسويلج جدول وان شاء الله يعجبكم ..
اليوم الاول: يوم الوصول
اذا قلنا وصلتوا الصبح ورحتوا الفندق وريحتوا وصليتوا الظهر تطلعون وتروحون اتغدون في
الغدا : مطعم ميس الغانم ( لبناني ) ، منطقة شرق ، على شارع الخليج العربي على البحر ..
بعد الغدا تروحون يمه سوق شرق اتمشون واتسوقون فيه وتقعدون في الكافيهات اللي على المرسى وعقب تطلعون منه وتروحون ..
متحف بيت ديكسون ( بيت المقيم السياسي البريطاني في الكويت ) منطقة شرق مقابل وزارة الخارجيه وبجانب وزارة التخطيط ، يعني اذا طلعتوا من سوق شرق اخذوا يمين وراح تلقونه على ايدكم اليسار ..

وبعده متحف بيت السدو على شارع الخليج العربي رقمهم 22432395.

على المسيان اشوي يكون الجو احسن من النهار تروحون مجمع الاوقاف في دراريع وبعدها اتروحون سوق المباركيه واتسوقين فيه وكل شي فيه تبينه موجوود ( الذهب ، الملابس ، البشوت ، المسابييح ، العطور ، المكياج ، الخضار ، الفواكة والخ .... ) بعد ما اتخلصون تسوق وتمشي اتعشون في احد المطاعم الشعبيه اكلهم ترا وايد حلو عندكم ( دلق سهيل ، السيخ البحريني والخ ... من مطااعم ) ..

اليوم الثاني :

الصبح على ال 9 اتريقون في مطعم واايد حلو اسمة ريوق ، منطقة الشعب البحري ، قطعه 8 بجانب مطعم فيلا فيروز ،، اذا كنتوا ماشين على خط فحيحيل باتجاه مدينه الكويت راح تصير الشعب على ايدكم اليمين الفرعي الثاني تدخلون وتمشون اشوي سيده تشوفون فيلا فيروز يمينكم دشوا يمين وبتشوفون المطعم ..
بعد الريوق اتروحون باتجاه الكويت منطقه شرق شارع الشهدا ( عندج مجمع الرايه والعوضي ) ماركات وبعدين تروحون شارع فهد السالم منطقه جبله (القبله) فيها الصالحيه كله ماركات .. اتخلصون من السوق اتغدون في برج النصار وانتوا طالعين من الصالحيه تشوفون يم الشيراتون في دور 32 واايد القعده حلوه وراقيه مطعم ايطالي..
العصر تروحون متحف طارق رجب : عنوانهم الجابريه ، قطعه 12 ، شارع 5 ، اوقاتهم من 9-12 الظهر ومن 4-7 المسا تليفونهم 25317358 او 25339063.
بعد المتحف المغرب تروحون سوق السالميه الاحمر مكانه عند دوار الجوازات الدائري الخامس اتسوقون واتمشون فيه ..
العشاء على الساعه 10 مطعم الصنوبر (لبناني ) السالميه شارع البلاجات على البحر ..
اليوم الثالث :
الصبح اتريقون على 9:30 او 10 مطعم لونوتر في مول 360 منطقة جنوب السره على الدائري السادس ريوقهم وايد حلوو بوفيه وبعد الريوق اتمشون واتسوقون في المول وسمعت توهم فاتحين لادوريه كافيه عندهم خوش ماكروون
عقب ما اتخلصون سوق وتمشي اتغدون في مطعم B+F (امريكي ) اعتقد بس وايد لذيذ واتحجزون لكم فيلم ودشونه بعد الغدا ..
عقب الفيلم العصر على 4:30 او 5 تروحون سوق السالميه عند دوار الجوزات الدائري الخامس اتسوقون فيه كل شي واسعاره حلو وزينه ..
العشا بالسالميه شارع البلاجات مطعم الصنوبر ( لبناني)..

اليوم الرابع :

الصبح اتريقون في الفندق اتسون ريوق بيتوتي

نخي وباجيلا وخبز ايراني جبن وخيار وزيتون من هالسوالف ومبجر على شان وراكم الفروانيه تروحون مبجر لانها زحمه الاسواق ( الحمرا مول دراريه ونفانيف سهرات - والعربيد دراريع وكل شي بعد في الفروانيه واسواقهم ..
الظهر اتروحون الافنيوز واتمشون فيه واتغدون المطاعم وايده وبذكرلج جم واحد ( نابكت ايطالي - سواح لبناني - ليلي لبناني - لورنزو ايطالي- رايس شبه كويتي - جاردن ايراني - واسابي ياباني - ماكي ياباني نينو ايطالي والخ ... وادشون سينما واتعشون يعني اتكلون يومكم كله في الافنيوز على الدائري الخامس وجريب من الفراوانيه ..
اليوم الخامس :
الصبح الريوق على 9 في مطعم مركز سلطان بوفيه على البحر ، السالميه ، شارع الخليج العربي ..
بعد الريوق اتروحون السالميه شارع سالم المبارك المجمعات ( ليلى غاليري نفانيف سهرات- مجمع مريم - البستان- الفنار-سنتربوينت- زهره ) كلهم في شارع واحد وكافيهات على الشارع ..
وبعدها اتغدون في فريج صويلح كويتي .. وبعد الغدا اتكملون تمشي في المارينا مول وعقب تقعدون في الكافيهات اللي على المرسى الجهه الثانيه طبعا ارشح حبيب قلبي شوكلت بار تلقونه فوق ..
بعد القهوه في الكافيهات على المسيان تروحون المركز العلمي واتشون في الاكواريوم وبعدين العشا في مجمع اولمبيا مقابل المركز العلمي مطعم نارنج (سوري)..

اليوم السادس :

الريوق في حولي محمع المهلب في اي كافيه وبعدين اتسوقون فيه اتخلصون عندكم المجمعات في حولي اتسوقون في اسواقها اذا تبون شي عملي او للحفلات مجمع المهلب (شارع بيروت ) مجمع النقره الجنوبي والشمالي (شارع بيروت ) مجمع العثمان (شارع بن خلدون ) ومجمعات شعبيه واايده بيروت - الايوب - السندس - سنتربوينت ..
الظهر بما انكم في حولي في شارع بيروت يم مجمع بيروت تلقون اعلان اصفر فوق مطعم مغل محل هندي ..
العصر تروحون ابراج الكويت امم واذا انتوا تحبون تلعبون عندكم لعبه حرب الاصباغ تحت الابراج اللعبه وايد حلوه تدشون مع اي قروب تقدرون ..
http://www.paintball-kuwait.com/?gclid=CO_89OuruKgCFUQOfAodZ3WZBA
العشا مطعم سلايدر ستيشن (امريكي) مقابل قصر السيف ، منطقة شرق من بعد دوار مسيد الدوله الكبير يكون على ايدكم اليسار وسوق شرق يمينكم اتكملون سيده تكون مطاعم على ايدكم اليسار ومن ضمنهم سلايدر وايد حلوو ..

اليوم السابع :

الصبح اتريقون في مول 360 كاكاو كافيه يم لورينزو واتسوقون لي حزه الظهر ،،
بعدين تروحون منطقه فحيحيل مجمع الكوت والمنشر واتمشون فيهم وبازار واسواق فحيحيل واتغدون في مجمع الكوت مطعم ياميجانا (لبناني) يطل على البحر وعقب الغدا ادشون سينما في مجمع الكوت ،، عقب السينما على المسيان تقعدون في وحده من الكافيهات اللي يطلون على النافووره المكاان واايد حلو ..
واتمشون في اسواق فحيحيل الشعبيه وبعدها اتعشون في مكان اسمه spoons المكان حلوو باتجاه ابراج غاليه وعاليه اذا خليتوا مجمع كويت ماجيك يمينكم كملوا سيده تلقون مكتوب spoons اتعشون في فرايديز او فيش ماركت واتحلون في شوكلت بار ..
وبجذي خلص اسبوعكم في ديرتكم وان شاء قدرت افيدكم ..
واذا بغيتي اي شي ان شاء الله مانقصر معاكم ..

برنامج رائع بس يا ليت تشيلي منها بيت ديكسون ومتحف طارق رجب وبيت السدو هذي وجهة نظري كون الاخت وزوجها جايين من بلد خليجي مو اوربي ليهتموا بهالاشياء والله من وراء القصد

كابرون 1
عادي نشيلهم ليش لا
وانخلي مكانه طلعه بحريه
تأجير يخت لمده ساعتين او ساعه
http://www.nuzhatours.com/

الاخوان ماقصروا وبخاصه الاخت كويتيه بيض الله وجهكم معلومات كافيه ووافيه