نشر في الكويت

الله يجزاكم بالجنه ممكن تجاوبون علي بس سؤالين

الوفيه

12-07-2022 - 12:06 am

السلام عليكم ورحمة الله وبركاته
كيف حالكم والعشر عليكم مباركه وكل عام وانتم بخير
بس عندي استفسار ياليت تجاوبوني؟؟
السؤال الأول:: كم تبعد الرياض عن الكويت ؟؟ يعني بالساعه ؟؟
السؤال الثاني :: انا يمكن اجلس فيها 5 أيام وتكفي 5000 ريال سعودي مع السكن فقط ؟؟
الرجا الرد على سؤالي الله يعافيكم
انا في انتظاركم

التعليقات (9)

مـالي خـلق

12-07-2022 - 02:25 am

هلا فيك يالغاليه...والله شوفي من الرياض للكويت بالسياره 5 ساعات تقريبا تقل أو تزيد شوي
وبالطياره 45 دقيقه فقط....
و5000 ريال أشوفها تكفي بس من غير سوقه وهدايا ..يعني احسبيها تأجرون شقه باليوم 20 -25 دينار ... والباقي بجيبك لمطاعم والسنيمات ...وأنتي وشطارتك

المرام

12-07-2022 - 03:26 am

هلا فيج اختي
نفس ما قال اخوي مالي خلق
سمعت انه تقريبا خمس ساعات بالسياره
و المصاريف ان شاء الله تكفيكم
و حياكم الله

ابورزان_2

12-07-2022 - 04:27 am

اختي المسافه كما ذكرو الاخوان 5 ساعات كافيه ثانيا بالنسبه للمصاريف حسب العدد اللي بيرافقك بالرحله انا كنت هناك الاسبوع الماضي من الاحد للاربعاء انا وزوجتي وبنتي وولدي اربعة اشخاص وكانت التكلفه من وقت خروجي من الرياض لحد مارجعت الفين وخمسمائة ريال اهم شي السكن يكون رخيص في حدود العشرين او خمسه وعشرين دينار على الاكثر ورحله سعيده وموفقين0

Dhari

12-07-2022 - 05:28 am

و عليكم السلام و رحمة الله...ماقصروا الأخوان...
و هذا الطريق تقريباً من الرياض إلى الكويت.
الرياض - رماح - طريق شويه - الرفيعه - قرية العليا - بعد 60 كيلو تقريباً طريق سعيره الجديد - طريق القاعده - الخفجي - الكويت
خط الرياض الدمام السريع - جوده - حنيذ - مليجه - النعيرية - الخفجي - الكويتو بالنسبة للميزانية ...
تختلف حسب استهلاك و مشتريات كل شخص...
اجدها مناسبة في حال كان الفندق رخيص...
مثل فندق ايبس في شارع سالم المبارك بالسالمية.
أو حجز غرفة واحده في سارة بلازا.تقبلوا تحياتي.

جبل الرياض

12-07-2022 - 06:29 am

شوفي ياطويلة العمر الطريق ياخذ اقل شيء خمس ساعات
والخمس آلاف ريال .. والله مادري على حسب صرفيتكم .. بس حطو في بالكم لو مثلا بتسكنون في شقة محترمة ( يعني مب فندق خمس نجوم ) يعني اتوقع الشقة بتاخذ منكم 400 ألى 500 ريال في الليلة .. والباقي على حسب وضعكم ومصاريفكم
بالمناسبة .. اشوف لو تروحون للشرقية أو للبحرين .. أقرب ونفس الخساير ويمكن افضل
من وجهة نظر خاصة لا شيء يدعو لشد الرحال إلى الكويت

منوووووي

12-07-2022 - 07:30 am

جبل الرياض .. ليش ماكو شي يدعو لشد الرحال الى الكويت حدي مستغربه من هالكلمه؟؟

جبل الرياض

12-07-2022 - 08:31 am

منوي
أختي الكريمة منووي .. ليش الاستغراب ؟ يمكن فهمتيني غلط !!
يعني انا .. مثلا لو معي اخوي قاعد بصالة بيتنا وقال ابروح للسوبر ماركت اللي تعبد عن بيتنا 10 كيلو
طبيعي ابقوله ياخوي وش حادك تروح للي تبعد 10 كيلو وتترك اللي تبعد 1 كيلو عن بيتنا ؟؟
مافيه شيء يدعوك انك تروح للبعيدة والقريبة ما تقل عنها ..
لو اقول لخوي هالكلام ... بتستغربين ؟! جاوبي على السؤال وبتعرفين مقصدي
انا اخاف انك فاهمه غلط .. وانتبهي يالغالية .. لا تفهمين اني اسيء للكويت .. مستحيل اسيء لديرتي الثانية
ولو مثلا ( اقول مثلا ) كانت الكويت ناقصه في كل خدماتها يكفيني اهلها بس
بس انا اتكلم عن المسافة .. و وجهة نظر خاصة فيني .. ليش اشد الرحال لمسافة 5 ساعات
وانا من الرياض عندي البحرين أو المنطقة الشرقية اقرب وبس تاخذ مني أقل من 3 ساعات ؟
والبحرين والشرقية كلها نفس الكويت .. يعني الاسواق نفسها .. الترفيه نفسه .. حتى الجو مايفرق ..
اقصد اللي بيبحث عنه السائح العادي سيجده في الاقرب ..
على العموم هي وجهة نظر في المسافة ..
مع أحترامي وتقديري للجميع

منوووووي

12-07-2022 - 09:32 am

اخوي جبل الرياض .. انا فاهمه من الاول بس من وجهه نظري انا اتوقع الكويت تتفوق على الشرقيه والبحرين بأشياء اكثر وترى الطريج مو كل شي بالعكس انا من الناس اللي احب السفر بالسياره عن الطياره..
وصدقني عندنا اماكن بالكويت اهلها احيانا مايدرون عنها وجميله..
عالعموم اشكرك انك رديت واشكرك عالاسلوب واشكر عالطرح ..
ومشكورين

bu-fatoma

12-07-2022 - 10:33 am

5 ساعات للرياض!!
مادري بس جنه اكثر؟
خبري المسافة 7 ساعات
إلا اذا الواحد طار بالسيارة
الله يكافينا ويكافيكم شر الطريق

الكويت المسافرون العرب

الله يجزاكم بالجنه ممكن تجاوبون علي بس سؤالين