- السلام عليكم
- =============
- سيارات مجموعة بلو بيرد
السلام عليكم
تقريري يبدأ عن رحلتي التي بدأت من يوم الإربعاء الموافق 8 أغسطس إلى يوم الخميس 16 أغسطس.. أنا اكتب هذا الموضوع وانا في آخر يوم لي في اندونيسيا.. سأقوم بكتابة المقدمة حتى أحمسكم قليلاً مع الصور و سأعود لسرد تقريري حينما أصل بحول الله و قوته غداً ..
الرحلة كانت لشخص واحد : الرياض-جاكرتا-بالي
=============
صور مقتطفة من الرحلة لتشويقكم .. و سنأتي بالتفاصيل إن شاء الله لكل منها
=============
ركبت الطيارة.. جلست وانا ناوي أحط راسي, لكن جلس بجانبي واحد أكبر مني بكثير و قعد يسولف معي. في البداية كنت مستثقل دمه و احاول أبين له إني ابغى انام, لكن مع الرحلة إكتشفت إنه إنسان طيب والسوالف معه وش زينها.. في الأخير اكتشفنا سوية إنه يعرف أبوي. كنت متخوف من الرحلة لأني في طريقي للمطار جاني اتصال من أحد الأصدقاء و قال لي انه حصل زلزال في اندونيسيا.. في البداية ارتبكت و بعدها قلت له اللي يكتبه ربك بيصير.. طبعاً صديقي هذا حاولت أحصل له حجز عشان نتخاوى هناك لكن ما لقيت. في الطيارة كان معنا مضيف مثير للغرابة نوعاً ما .. اول ما ركب الطيارة كان جايب زوجته معه و جلّسها في الدرجة الأولى (مكان ناس) و أخوياه ما قصروا معه, و هذا الشي أزعجني لأنه كان واضح وضوح الشمس, بينما كانت شغالة اندونيسية واقفة ملطوعة تنتظر أحد يعطيها وجه عشان يعلمها وين تجلس و وين كرسيها فيه (تخيل انك توقف في الطيارة أكثر من 20 دقيقة؟ وش بيكون إحساسك؟) .. هالمضيف شال زوجته لما جا أهل الدرجة الأولى.. في وسط الطريق جا بيخدمنا بالأكل و قعد يسولف مع الشايب اللي بجنبي عن الزلزال اللي صار في اندونيسيا وانا كنت حاط النظارات اللي يحطونها على العيون لما يجون ينامون في الطيارة و رفعتها لما سمعته يقول كلام زي وجهه .. سمعته يقول (الحمدلله بلادنا بلاد الإسلام الله محميها من هالزلازل.. بس هم دينهم يمين و هم شمال) .. أغضبني كلامه كثير و كأنه ينسف دين 200 مليون نسمة!! لما راح لطريقه, التفت لي الشايب و قال لي بصوت عالي : "هذا على نياته" .. وانا والله ما كان ودي اقول اننا احنا سبب هالزلازل – استغفر الله
مضت الرحلة و وصلنا الى جاكرتا.. كان كل شي أخضر قبل الهبوط و يدعو للحماس. وصلنا للمطار و كنت أول واحد واقف على البوابة, و مشيت مهرول الى قسم الجوازات خوفاً من الزحام بس ما لقيت زحام أبد! كنت أول واحد يوقف عن رف الجوازات.. و طلبت مني الموظفة 10 دولارات و عطيتها 100 دولار (على بالي انها بترجع الباقي).. هي شافت ال 100 دولار و شهقت! زي اللي ما تصدق انه هالفلوس بين يديها.. عرفت اني سويت أول غلطة عند وصولي. حاولت اتدارك الموضوع و فتحت الشنطة و طلعت لها من العملة الاندونيسية ما يعادل 10 دولار(90 ألف روبية). خلصت اجراءات الجوازات في دقيقتين و نصف تقريباً .. انا قريت في المنتدى ان الواحد قد يضطر من الزحمة انه يدفع 25 دولار لأقرب موظف و يخليه يخلص أموره.. و قريت في مواضيع أخرى ان الأعضاء خلصوا إجراءاتهم في 10 دقائق من دون الحاجة لأي موظف.. و للتوضيح فقد سألت أحد أقاربي و قال لي إن الإجراءات تخلص في دقائق معدودة الا اذا كان حظك سيء و كانت فيه أكثر من رحلة جاية من سنغافورة او الصين قبل رحلتك.. ذيك الساعة جهّز 25 دولار و امسك اقرب موظف ولا تستحي..
انتهيت من اجراءات المطار.. و بقى لي الحجز من كاها .. وقفت عند كشك كاها و كان الموظف اللي فيها مهزوز الثقة لما اتكلم معه.. ما كان يعطيني انطباع إيجابي عن كاها.. طلبت منه إنه يحجز لي ليلتين في (أستون ريزونا) .. اتصل عليهم و قال لي انه ما فيه غرفة وحدة بس فيه غرفتين.. قلت له عطني ابو غرفتين بس بسعر غرفة وحدة.. و هذا اللي صار. طلعت الليلتين ب 675 ريال. اخذت الفوتشر و وصلت للمرحلة الصعبة (مرحلة التكاسي) .. قعدت أدور على بلو بيرد و كان فيه واحد يمشي وراي و ناشب في حلقي إلا يبيني أركب معه ب 150 ألف .. قلت له يمشي في حاله لانه فعلاً أزعجني و كنت شوي و أرمي الشنطة في وجهه و أطب في بطنه. طبعاً هذا ابو 150 ألف كان يقول لي ب 170 .. لقيت حضارم جالسين سألتهم وش تنصحوني من تاكسي, قال واحد منهم : "أنصحك بالسيارات الزرقاء".. لقيت سيارة بلو بيرد, قال لي انا ما امشي الا على العداد.. قلت له يالله وصلني.. (جلست ربع ساعة تقريباً وانا ادور على سيارة بلوبيرد زي الناس).. كان الجو رطب و حار و كريه.. هذا غير زحمة الشوارع!! و كان السواق يقول لي ان جاكرتا ماخذة المركز الثالث في أكثر المدن زحام في العالم.. ما كنت مرتاح للسواق, و كان حدسي في مكانه لانه كان يحاول يلهف كم ألف لما جيت أحاسبه (الله لا يوفقه). وصلت للأستون ريزونا.. وكان اللوبي مليان عوايل.. ونسبة الخليجين ما كانت قليل. عطيت الاستقبال الفوتشر و قالوا لي انتظر 30 دقيقة و تصير غرفتك جاهزة .. انتظرت و نادوني.. رحت لغفرتي و لقيتها ملائمة و كل شي تمام فيها ما عدا شي واحد.. التكييف في (أستون ريزونا) سيء للغاية و ما يبرّد بسرعة في هالجو الرطب!
صور من الغرفة
سيارات مجموعة بلو بيرد
طوّلت وانا في الغرفة .. و ما حبيت اني اطلع لأن الجو ما اعجبني و الزحمة كانت سيئة خصوصاً انهم كانوا مقبلين على اجازة الاسراء و المعراج في اليوم الثاني. إتصلت على (حافظ) –يشتغل صراف- .. و قلت له يجي عندي في الغرفة عشان يحول لي الفلوس, و يجيب معه شحن رصيد لشريحة (منتاري) ب 50 ألف. بعدها ب 10 دقايق حسيت بالجوع, طلّعت علبة تونة و قشطة و عسل جبتهم معي من السعودية .. بس نسيت اجيب خبز.. اتصلت على (حافظ) و قلت له يجيب لي معه خبز .. قال لي: "تبغى حبتين والا 5 حبات؟" .. فكرت شوي ثم قلت له 5 حبات. وصل لغرفتي و جاب لي الخبز بالفاتورة من مطعم ابو نواس , و كان الخبز صغير, الحمدلله اني قلت له جب 5 حبات. و الصرافة ما استغرقت اكثر من 10 دقايق.. سألته عن الأتريوم بلازا هل هم فاتحين الحين.. ناظر في ساعته و قال: "الساعة الحين 8 و 40 دقيقة.. راح يقفلون بعد ثلث ساعة" .. قلت في نفسي: من أصبح أفلح. شكرته و خليته يمشي و هذا رقمه للي يبي يتعامل معه (انا اللي موصيني عليه واحد من اقاربي يمدحه كثير) .. (حافظ 08129391230) ..اتوقع واحد يجيك لحد غرفتك و يصرف لك و في نفس الوقت يجيب لك الغرض اللي تبيه من طيب نفس و خاطر يكون ما قصّر ..
التكملة ان شاء الله لما أوصل بالسلامة
وبانتظار بقية التقرير
’,
معاند بحر