1. رحلتنا كانت من مطار الدمام يوم السبت 1 نوفمبر الساعة 01:55 الظهر


2. وهذي صورة ثانيه


3. بعدها نزلنا و تمشينا في الفندق و الحديقة.. شي حلو و رهيب

السلام عليكم...
مثل ما وعدتكم.... والله شاهد علي انكم تستاهلون لأنكم ما قصرتوا وهذا أبسط شي أقدمه لكم و لهالمنتدى الرائع..
طبعا الصور اللي في التقرير كلها من تصويري واللي ما قدرت أصوره بحط صورة و بقوللكم مصدرها (أمانه في النشر)
رحلتنا أنا و زوجي و بنتي للقاهرة كانت من 1 إلى 8 نوفمبر... طبعا كل شي تقرر بسرعة لأن جوازاتنا كانت مسحوبة بسبب ذهابنا لتايلند في 2005 و بعد ما طلع الجواز بأسبوع سافرنا
أول شي حجزنا على الخطوط السعودية ذهاب و عودة من مطار الدمام ب1500 للشخص
وبعدين حجزنا 7 ليالي في فندق ماريوت القاهرة اللي في الزمالك عن طريق أرامكو في غرفة اكزكتف مطلة على النيل شاملة دخول الإكزكتف لاونج من 6 الصباح الى 12 الليل ويقدمون فيها الفطور و سناكات طول اليوم و عشا من 5:30 الى 7:30 طبعا السعر كان 750 ريال لليلة
وكنا مشتريكن من بداية السنه في شركة اسمها عميلي مندوبينها يتصلون و يسوقون لها دفعنا 1000 ريال و عطونا كوبونات كثيرة بس أكثرها في مصر وكانت شاملة:
ليله في القاهرة بسعر 120$ (طبعا سعر الماريوت أكثر من 120$) فدفعوا لنا 120$ كاش
عشاء لشخصين في نايل كروز (عرضهم يشمل سفينه مكسيم اللي تبع الماريوت وبتكلم عنها في تقريري)
مخلص في المطار و خصم 50% على المشوار من المطار للفندق
سيارة بسائق لمدة يوم (12 ساعة أو 100 كم)
عند استئجار سيارة بسائق أو بدون لمدة 4 أيام تحصل على اليوم الخامس مجانا (سعر اليوم 250 جنيه)
يعني إذا كنت ناوي تروح القاهرة هالعرض حلو و يصلح للي أول مرة يروحون
التقرير

رحلتنا كانت من مطار الدمام يوم السبت 1 نوفمبر الساعة 01:55 الظهر

وكانت مدة الرحلة 2:40 بس الطيارة كانت صغيرة و مليانة و الوضع ما كان مريح
وصلنا القاهرة الساعة 5 العصر تقريبا المطار الجديد و الحقيقة انصدمنا من هالمطار كان زحمة و الكاونترات قليله و صادف وصولنا مع طيارة جاية من كراتشي و رحلتين من دول أوروبية.. مع انه كان معانا واحد يخلص لنا الإجراءات بس أخذنا وقت طويل.. ولما خلصنا ركبنا السيارة و توجهنا للفندق والطريق كان زحمة لأن الرئيس كان بيطلع عشان المؤتمر..
هذي صورة اول ما طلعنا من المطار
وصلنا الفندق و الصراحة شكله راقي وحلو وهذي صور من المدخل والجو بارد و منعش

وهذي صورة ثانيه

وصلنا الفندق وكان زحمة فيه جروبات ايطالية و جنسيات ثانية و الرسبشن مليان.. انتظرنا الى أن نادونا و عطيناهم أوراق الحجز.. طالعتنا الموظفة وقالت اسفة ما عندي سرير كنج.. كل الموجود كوين بس من حسن حظكم ان في غرفة فيها سريرين كوين بعطيكم إياها.. قلنالها حجزنا مؤكد فيه الكنج.... قالت أصلا الكوين حقنا كبير.. شوفوا الغرفة و حكموا...
صعدنا الغرفة و شفناها..والصراحة كانت زحمة بسبب السريرين اللي لا كبار ولاشي... ولا في مكان للشنط...
زوجي خذ الموضوع ببساطة و راح ياخذ شاور .. أنا ما عجبني الوضع و نزلت أكلم المانجر :112:.. وشفت واحد من المسؤولين و كلمته و راح شيك لي معاها و حصلت غرفة بسرير كنج (كانت قايلة ان الفندق ما فيه كنج أصلا)
واحنا صاعدين اكتشفنا ان طوابق اللأكزكتف من 12- 20 و هي كانت حاطتنا في 11 ولما غيرتها حطتنا في 17 (ما يجون إلا بالعين الحمرا)… بس للأسف الغرفة ما كانت تطل على النيل مباشرة.. كانت تطل على ملاعب…مشينا الوضع و فتحنا الشنط…. :112:
هذي صور من غرفتنا
الساعة 10 قررنا نطلع نتعشى بس قلنا خل نستكشف الفندق قبل… وصعدنا اللاونج اللي في الطابق 18 و الصراحة الماكن راقي و مرتب و الجلسة فيه حلوة..
هذي صورة لصالة الطعام وفي صالة ثانية لرجال الأعمال و الإنترنت... بس التصوير ممنوع فحطيت هالصورة من موقع ماريوت

بعدها نزلنا و تمشينا في الفندق و الحديقة.. شي حلو و رهيب

بعدين قررنا نتعشى في أبو شقرة اللي في شارع جامعة الدول العربية و طلعنا ناخذ سيارة.. إلا استقبلنا واحد مصري و عرض علينا التوصيل و بدا يشرح ويتكلم عن الأماكن السياحية في القاهرة و طلع مدرس متقاعد وعرض علينا انه يطلعنا كل يوم ب 350 جنيه..
رحنا أبو شقرة و تعشينا فيه… الصراحة أكله خيال بس غالي شوي…طبعا السواق هو نفسه اللي رجعنا الفندق وحسب علينا الساعة و نص ب60 جنيه وعطانا رقمه عشان نطلع معاه اليوم اللي بعده....
رجعنا الفندق وكلمنا مندوبة شركة عميلي عشان اليوم المجاني و قالت بتجيكم سيارة الصباح و تطلعون مع السواق..
هذا جزء صغير من تقريري و الباقي بكرة إن شاءالله