السلام عليكم ورحمة الله وبركاته ..
اسعد الله اوقاتكم بكل خير ..
في البداية اقدم لكم قواميس ومعجمات كلها شكر وتقدير لكم لما تقومون به من نصائح وارشادات وتعليمات للمسافر العربي وبصراحه كفيتوا ووفيتوا ..
يالربع ياجماعة الخير انا لي قرن ابي اروح لبلاد العمة ولكن ماش ماعندي اخوياء يعزمون
وابشركم بعد مرور قرن لقيت لي 3 شباب ( متفلتين ) على الروحة وانا رابعهم ..
لكن المشكلة ان كلنا ما قد سافرنا لبلاد العمة ولا نعرف نتكلم لا انجليزي ولا اندونيسي ولا عربي بعد
ههه ( وشكل هالمشاكل بتجيب لنا انواع المواقف المضحكة )
فياجماعة الخير احنا بنمشي بمشيئة الله نهاية شهر 5 هجري
علماً بأن الرحلة 15 يوم بإذن الله تعالى ..
وانا شفت اغلب المواضيع في المنتدى
لكن ابي منكم خدمات بسيطة ولا عليكم امر ..
1. وش اسم السوق الي يقولون رح اشتر ملابس منه ( قالوا لي لا تشتري من هنا ملابس اشتر من هناك ارخص .. بتشتري بخمس مية ريال الفين شنطة ملابس )
2. سواق على الدين مواصفاته : مجرّب .. يتكلم عربي بطلاقة .. أمين .. فرفوش .. زكرتي .. سيارته مكيفة وجديدة .. يجلس معنا طول الرحلة .. وكم سعره اليومي ..
3. عنوان فلة في بونشاك وياليت فيها 4 غرف نوم .. وسعرها ما يتعدا 200 ريال اذا موجود يعني ..
وياليت فيه طباخة في الفلة ..
4. انا متفلت ابي اذبح خروف ونطبخه ( وين اشتري خروف منه ) من بونشاك طبعاً .
5. وين حقين المساج فيه خبركم راعي نخل .. انواع المصوع ههه
6. الملاهي اللي فيها حرب واسلحة .. عنوانها تكفون ..
7. اذا فيه ملاهي مائية علمونا بليز .. >>> يقدر الملاهي ذا البزر
8. شباب انا نفسي اصيد سمك ما ادري يمدينا نستأجر مركب ونروح نصيد ونشوي وكذا ..
9. اذا فيه مكان حلو انصحونا فيه ..
واوعدكم بتقرير مصور عليه الكلام ..
شاكرين ومقدرين كريم تعاونكم ..
اخوكم خراب السفينه ..