- السلام ،
السلام ،
اليوم عندي إستفسار شوي غريب ، بصراحة أنا سلكت الخط من عمان للبحرين ومعاي بعض الشباب ، لاحظوا سلكت الطريق لبلادي للبحرين فقط الرجعة لأنه كنت ذاهب لعمان بالطائرة ،المهم ما أطول عليكم طبعا خرجنا من عمان عن طريق منفذ حتا ودخلنا الإمارات وواصلنا على أبوظبي والمفرق ثم للغويفات - البطحاء ، دخلنا السعودية وهني واصلنا الطريق تقريباً 125 كم لمنفذ سلوى وتركناه وأخذنا يسار تقريباً 125 كم ثانية لحد ماوصلنا لدوار كان سيدا مكتوب ( وسط الهفوف ) واليسار ( الدمام والرياض ، يعني لو أخذناه بنروح خط حرض - خرج؟) ، إحنه سلكنا وسط الهفوف وبعدها وصلنا لشارع يتفرع وفيه سهم بلا إشارة وأخذنا يمين( مثل هالشارع مافيه أي توضيح ولا إسم المنطقة اللي بنتجه لها ) وبعدها تبعنا إشارات الدمام وطبعاً دخلنا داخل أسواق الإحساء والإشارات ولحد ماخلصنا من شارع الإحساء أخذنا يمين الكوبري وعلى طول للجسر !
بعد الكتابة الطويلة المفصلة ، أنا سلكت الخط راجع للبحرين ومعاي شباب وكانوا يخبروني الطريق خطوة خطوة ، السؤال اللي يطرح نفسه هنا ، إذا بغيت أتجه من البحرين للإمارات خلنا نقول مثلاً وبغيت أسلك بالضبط مثل الخط يعني أبغي أسلك طريق الإحساء وأدخل داخل الأسواق ونمر على الإشارات الداخلية ومن ثم لمنفذ البطحاء ، شنو أسلك في البداية بعد ما أعبر جسر الملك فهد هل أدخل على اليمين للدمام أو أواصل سيدا كأنه خط الكويت ؟ أبغي تفصيل دقيق وممل لهذا الطريق من الجسر لمنفذ البطحاء وأتمنى يكون واضح !
وشكراً جزيلاً لكم ، وإعذروني على الإطالة
في أمان الله
معليش علماً أني مافهمت عليك .. لكن بشرح لك على قد مافهمت منك ..
بعد ماتطلع من جسر الملك فهد من البحرين إطلع سيدا لاتروح يمين للدمام بجيك لوحة فوق الكبري الأحساء أنزل معها النافذ على اليمين إذا نزلت تحت خلاص إمسك خط الأحساء ولما تدخل الأحساء بتجيك اللوحات لطريق سلوى .
وبالسلامة ..