تسلم اخوي مسافر على المعلومه ماقصرت

يعطيك العافيه , بس هالطريق الجديد كم كيلو تقريبا

1. تفاصيل الطريق :

judo
السلام عليكم ..الله يعافي الجميع ...
الطريق هذا مشيته امس بالليل من الرياض الى مدينة الخفجي 606 ستمائة وستة كيلو متر فقط لا غير .
تفاصيل الطريق .. وفيه مطبات صناعية يحبها قلبك لازم تعرف مواقعها قبل تمشي من بيتكم تحفظها صم وبعدين تخلي واحد يسمعلك ..لانك اذا ماحفظتها معنها تبي تنعفط تندة الموتر من نافوخك ..
ولا باقي الطريق يحبه قلبك امس ماشي فيه 200 كم بال 750 وكان وشيش العسيب مع صوت المحرك 12 سرندل يبدد صمت الليل..وقتها فيه سيارات تمشي ريوس مادري ليه. :36_7_14:
مواقع المطبات الصناعية المبهمة غير مصبوعة وبدون اي علامات تجيك ختله ..
1- محافظة رماح وانت طول الشارع العام (بين المطب والمطب مطب) من النوع الصغير النقازي. بودن اي لوحات او عيون عاكسه او صبغ.
2- تقاطع حرف تي بعد محافظة قرية العليا ب20 كم ..فيه بعير اصطناعي ..عفوا مطب اصطناعي منبطح .. بس الله حق قبله 3 امشط تحذيرية .. وان ماهديت دون 40 الله يعين التنده .. تشهد.

تفاصيل الطريق :

بعد الخروج من الرياض اسلك طريق الدمام يجيك بعد 90كم مفرق رماح (روضة خريم) ادخل معه يمين وراح تركب كبري يتجه بك دوران الى يسار طريق الدمام باتجاه الشمال.. بعدها مفرق روضة خريم استمر لا تلف لخريم الا كانك وقت ربيع وودك تزبطلك بريق قرقاص(قريص) من الروضة وبعد مفرق روضة خريم على طول تعبر جسر شعيب غيلانه ثم قرية غيلانه وفيها محطة بنزين وبقالة على طول سيده 25كم تقريبا رماح (دير بالك للمطبات بوسط رماح) استمر لا يمين ولا يسار بعدها قرية الرمحيه .. وهنا مربط الفرس اذا استمريت راح تفاجأ انه ينتهي الطريق الي يشق الرمحية ويوقف ببيوت (شكلها مصدومه لوحة المفرق) قبل نهاية الطريق ب 500 م فيه شارع صغير على يمينك (ماكنه طريق سفر) علامته اللمبات تميزه عن غيره . لف معه يمين ودوس لا يردك الا قرية الرفيعة ثم قرية العليا على بعد تقريبا 200 كم هذا الطريق يشق الصمان يعني كانك وقت ربيع تبي تشبع من المناظر الخلابه وبنهاية قرية العليا محطة بانزين عب منها لان اقرب محطات بالخفجي واستمر لا يمين ولا يسار..بعد اخر محطة بالعليا راح تمشي من 20 الى 22 كم راح يجيك تقاطع حرف تي يمين باللوحة الدمام ويسار حفر الباطن طبعا بالليل ماراح تلاحظ ان التقاطع مو حرف تي قدامك طريق لكن اول 100 م مائة متر ترابي (وهو الطريق الجديد) الى يوصلك بطريق الخفجي فستمر على طول لان هذا يختصرلك 50 كم .. وراح ينزلك هذا لخط الجديد على طريق الخفجي نهاية هذا الطريق فيه تحذير 3 امشاط مطبات صغيره وبعدها فيل منبطح ..حرف تي يسار الى الخفجي ويمين الدمام وهذا امتداد طريق ابو حدرية .. طبعا تسوي يوترن وتتجه شمال الى الخفجي . كله سيد واحد بس وسيع ولا زحمه ولا يحزنون ..ولا تريلات .. بس فيه واحد مخاويك طول الخط .. القمر لاصارت قمرا .. ويخاويكم الرحمان في حلكم وترحالكم.

يعطيك العافيه
طريق جيت معه في الربيع رائع جدا وخاصة بالنهار
يختصر حوالي 100 كلم من طريق جودة
لا انصح به للعوائل ليلا طريق شبه مقطوع
لازم تعبي بنزين من رماح او قرية حسب اتجاهك
نسال الله السلامه للجميع

ياولد خرعتنا من هالطريق:ranting2:
تسلم عالشرح الوافي :15: راح أجربه المره الجايه

لا مايخرع .. وفيه ناس يرون هدوء الطريق وقلة كثافة السيارات وعدم وجود تريلات فيه ميزه وراحه بال افضل من اسقط ولا تسقط وكبسله ويكبسلك وكل شوي رادار وبين الرادار والرادار نقطة تفتيش ..ولف عليك مانتبه !! ولا كبس العالي بوجهك !! الطريق سايد واحد بس وسيع واكتافه عريضه.. والحذر من الجمال في الوصلة التي تقطع عروق الدهنا مابين مفرق الحفنه و منتصف الطريق الى الحفنه نهاية النفود.
بالنسبة لي .. احب سفر السيارة .. والله اعلم يبي يكثر ترددي للكويت عقب ماطحت بهل خط .. وخلاصة القول ان الخط ونيس ولا ودك يقضي بالصيف فما بالك بالشتاء لا مشت الشغايا والشعبان وربعت الارض.