اخوي وش تبي بس جنة الله في الارض هالريف يبيك حقيبة صغيرة تعبيها قارورة ماء + تفاحة + شيبس وتروح لاقرب محطة قطار عندك ( قطار مهوب اندر قراوند وتاخذ خريطة بريطانيا وتنقي اي اسم لاي مدينة مهيب معروفة وتقص لها رتيرن تكت وتنزل في محطة هالمدينة بتلقى بروشورات عن الاماكن الي فيها اسأل عن ارقام الباصات الي تودي لهالأماكن ومتى اخر باص يرجع للمحطة حتى ماتتورط طبعا لازم تقوم الصباح بدري يعني 8 ونص كويس وتفرج عالمناظر وادعلي
ان شاء الله تكون رحلتك حلوة

كنت افكر ااجر سيارة واسوى رحلة ويا العايلة امر فيها على مدن فى الريف الانجليزى، طول عمرى اسمع ان الريف هناك من اجمل الريف فى العالم وللأسف الناس كلها اما تروح لندن او مدن اخرى كبيرة وليس الريف، المهم ابى واحد سوا رحلة مثل هاذى يفيدنى من وين انطلق واى بلاد ازورها .. وتفاصيل اخرى مع الشكر

الاخ العزيز أعشق السفر
انا قمت العام الماضي في الصيف بتاجير سيارة من لندن واخذت عائلتي واتجهنا الى رحلة برية ريفيه لمدة اسبوعين، خذ لك سيارة واطلع من لندن شمال جهة سكوتلندا وراح تشوف العجب في الطريق ، مناضر وطبيعه تجنن، كانت رحلتي بالسيارة من لندن الى ليدز، وجلسنا في ليدز يومين، ثم غادرنا الى نيوكاسل جهت الشرق ثم من نيوكاسل الى ادنبره وجلسنا في ادنبره 3 ايام ثم من ادنبره الى ابردين اقصى شمال شرق سكوتلندا ثم نزلنا من ابردين باتجاه الغرب الى منطقة البحيرات و السحر والجمال منطقة Loch ness و Loch lomond ، والله شفنا مناضر اقرب للخيال حتى البحيرات كنا نشرب منها لان الماء صافي وعذب، ثم نزلنا الي مدينة ويليم فورت ثم الى قلاسقو ثم الى blackpool ومنطقة ال الحيرة "جنة الله في ارضه" منطقة Lake district ثم عدنا الى لندن،
كانت الرحله جدا ممتعه، كل ما عليك ان تاخذ خريطة جديدة لبريطانيا وسكوتلندا وستلاحض ان الخرائط مطابقة تماماً للشوارع وما فيه امل انك تضيع، وجميع الخطوط البريه ممتازة ومتوفر فيها محطات راقيه وموتيلات نضيفه، واهم من كذا كله لا تسرع بالسياره عشان تستمتع بالمناضر وتنزل تصور عند كل منضر حلو
انصحك تطلع بسيارتك مع العايله بصراحه.
تحياتي

الطيب قولد كوست، جزاك الله خير بس عندى كذا استفسار، من وين اجرت السيارة وبكم؟ وماذا عن الفنادق فى الأماكن اللى زرتها يعنى كنت حاجز فيها من اول ولا كل مارحت بلد تدور على موتيل ؟وهل سهلة هذه الطريقة خاصة مع وجود اطفال معاى وسفر بالسيارة لساعات طويلة؟ وهل فى نصائح اخرى تفيدنى ولك كل الشكر

اخوى قولد كوست ما يخالف ازعجتك بأسئلتى بس كم يوم قعدت فى نيوكاسل وجلاسجو وابرديين ، وهل ممرت او قعدت فى طريقك فى اى من هذه المدن : اكسفورد،كامبردج،بيرمينجهام، نوتينجهام، شيفيلد،يورك؟ وتستاهل تقعد فى اى منها ولا لأ؟ وبالنسبة للبلاد اللى قعدت فيها هل كانت الفترة كافية ام فيه بلاد تستاهل اطول، واخيرا شكثر فى تصورك تكلف رحلة مثل هذى؟ مع الاقامة والسيارة والبنزين وغيره، مع الشكر مقدما

1. وثاني شي انت ما ازعجتني ابدا ابدا، حنا حاضرين للطيبين

عزيزي أعشق السفر
أول شي أعتذر منك على التأخير في الرد لاني توني انتبه للرد

وثاني شي انت ما ازعجتني ابدا ابدا، حنا حاضرين للطيبين

أنا استاجرت السيارة من محل هيرتز الي في شارع الاجوارد في لندن وكان اجارها بحوالي 40 باوند يوميا بس المشكله اني كنت اعبيها بنزين فل ب 40 باوند والسياره كانت فورد فوكس موديل 2004 جديده على الزيرو
وبالنسبه للفنادق انا ما كنت حاجز فيها من اول ، كل ما دخلنا مدينة وعجبتنا دورنا على احسن مكان نسكن فيه ، وصدقني راح تحصل كثير اماكن تسكن فيها ورخيص بعد، يعني تخيل اننا سكنا في فندق كراون بلازا خمس نجوم، في مدينة ليدز شمال لندن بسعر 55 باوند لليله مع موقف السيارة ، راح تتفاجأ انك كل ما ابتعدت عن لندن شمالا راح ترخص اسعار الفنادق بشكل ملحوظ.
انا اعتبر هذي الطريقة احلي طريقه لانك ما ترتبط فيها بفندق معين تقعد تدور عليه الين تدوخ، كل ما تعبتدور لك فندق حلو واسكن فيه والحمدلله ما واجهنا اي مشكله بهالطريقة بالعكس كانت شي جديد وممتع، بالنسبة لنيو كاسل ما بتنا فيها ، بس ريحنا في أحد المحطات على الطريق السريع المطل عليها لاننا كنا متحمسين نوصل اسكوتلندا باسرع وقت، وكل المدن الي ذكرتها لي اتذكر اني شفتها في الطريق ولكن للاسف ما نمنا فيها، المدن الي نمنا فيها كانت ليدز وهي منطقة جميله وفيها ريف حلو ومناضر وحدائق بكر روعه انصحك بفندق كراون بلازا طبعا، ونمنا في ادنبره 3 ليالي وكان في فندق الماريوت بصراحه كان غالي شوي الفندق (حول 120 باوند) بس ان ذيك الليله كانت برد وما كان فينا حيل نطول واحنا ندور وبعدها عجبنا موقع الفندق والمناضر الي حوله وقررنا نجلس فيه وبعدها اتجهنا للشمال المشكله ان واحد تونسي يشتغل في الفندق نصحني اروح لمنطقة انفيرسنيس وقال لي ان فيها ثلوج الان، !! بصراحه استغربت من الثلوج في الصيف ولكنه أكد لي الله يسامحه ومغطنا الي النفيرسنيس ولا لقينا شي، يوم سألت في محطه من محطاتها عن الثلوج قالوا لي صاحي انت !! ثلوج في الصيف واكتشفت ان خوينا التونسي طلع مقلب ، عموما نمنا ذيك الليله في الهوليدي ان واتذكر كان سعره مقبول (حول 70 باوند) وريحنا في انفيرسنيس واستعدنا نشاطنا وشدينا بعدها الى ابردين، بصراحه شاطيء جميل جدا وعجبني كثير سكنا فيها ليلتين ونزلنا بعدها باتجاه الغرب ناوين نروح للبحيرات Loch nessطبعا المناضر هنا كانت جنان بس المشكله ما تلاقي فنادق كبيره هناك كلها موتيلات في بيوت خشبيه وبصراحه خفنا نسكن فيها لان شكل المكان في الليل موحش، ونزلنا الي قلاسقوا وجلسنا فيها 4ايام وكان الفندق سعره (100 باوند) وكان اسمه ,,,هم ، نسيت والله اسمه بس انه كان فندق كبير على طرف قلاسقو والي عجبنا فيه انه كان الفندق فيه غرف فيها جلسات نضام عربي وفيه قنوات عربيه وكان الفندق مشبوك بمستشفى لامراض القلب سمعت انه من اكبر مستشفيات امراض القلب في اوروبا وخاصة لجراحة انابيب البلاستيك داخل القلب، عموما قلاسقو رايقه لانك تقدر توصل لكل شي حل منها ، يعني زرنا اول يوم منطقة ستيرلينق الي فيها القلعه حقة ويليم والاس "اذا تتذكر فيلم القلب الشجاع الي مثله ميل جبسون" وتشوف مجسم لويليم والاس وهو مقطع عموما المنطقه جميله جدا خاصة اذا القيت عليها نضرة من فوق الجبل الي فيه القلعه، لازم تصعد الجبل الله يعينك كان الجبل متعب بس المناضر الي شفناها فوق نستنا كل شي، وايضا رحنا لبحيرة Loch lomond ومناطق حولها قمة في المناضر الخلابه والروعه بس للاسف اني نسيت بعض اسماء المناطق، عموما بعد قلاسقو نزلنا الي مدينة بلاك بول ونمنا فيها يومين في الهلتون وكانت تطل على المحيط وفيها مدينة ملاهي ممتازة وفيها سيرك ممتاز السيرك مكانه تحت برج بلاك بول بالضبط، وزرنا ايضا منطقة بحيرة lake district هذه كان من اروع الاماكن الي زرناها ولقينا عرب واجد هناك لانهم يجون مع رحلات سياحيه بباصات من لندن ، بعدها نزلنا الى لندن ومرينا بالطريق على سفاري بارك "حديقة الحيوانات" دخلنا بسيارتنا داخل المنتجع وتشوف الحيوانات المفترسة امامك لكن لازم تقفل الشباك حق السيارة ولا تتعرض للخطر، بعدها نزلنا لندن نمنا فيها يوم وعلى هيثرو اليوم الثاني للرياض ,,
ارجو ان اكون افدتك من دون اسهاب ممل
بالتوفيق لك ولعائلتك وعذرا على تاخير الرد

ماشاالله الاخوان ماقصروا رحله موفقه .. الريف الانجليزي لوحة فن مرسومه تبارك الرحمن شي خيالي

أهلين ....قولد كوست ...ألف شكر على المعلومات الحلوة بس حبيت أسأل كيف أستاجرت السيارة وكيف يحسبونها وهل هي غالية أو سعرها معقول ....بعدين كيف عرفت تسوق على اليمين ولا فيه سيارات غير وشوارع غير .؟؟؟؟؟؟؟؟؟؟؟؟؟؟؟؟؟؟؟ أكيد بتضحك علي أسئلتي ؟؟؟؟؟؟ لكن أيش أسوي لأني رايحه السنه هذي أن شاء الله وقاعدة أدور معلومات .....تحياتي