1. السلام عليكم ورحمه الله وبركاته


2. اليوم الاول:الخميس


3. اليوم الثاني: الجمعة


4. اليوم الثالث: السبت


5. اليوم الرابع: الاحد


6. اليوم الخامس:الاثنين


7. بعد هذا ديورت خشة أدهام يم السعودية تقرر يسيرون


8. يم الديار اللي بها عز الاسلام لو انها غبرا لها حب مكنون

السلام عليكم ورحمه الله وبركاته

وأسعد الله مساكم بكل خير , هذا تقرير مختصر لرحلة جت عالطائر والحمد لله عدت بسلام فالاسبوع الفاصل بين الفصليين الدراسيين (13---21)/1/1427ه كانت فرصة مناسبة لتغيير الجو خصوصا ان الفصل الدراسي الثاني طويل جدا 4 شهور متواصله عسى الله يعين عليه .
اتصل علي ابو سعود عصر الاربعاء وقال يابو عايض لازم نغير جو في هالاسبوع ومن هالكلام واجازة ماتفوت و(أسهم البلاد) ماتقصر لها عوايد وقررنا تكون الوجهه لارض الكنانه ام الدنيا واتصلنا كالعادة على ابو ماجد بيض الله وجهه وقال أحزمو الحقائب بكرة الخميس بعد المغرب (أوكية) الله يديمها من واسطة .

اليوم الاول:الخميس

مشينا للمطار مع آذان المغرب متأخرين شوي لكن مسرعين أهم شي الرحلة لاتفوت حتى لو نأخذ قسيمة كل شي يهون لعيون أم الدنيا وقصينا التذاكر والبوردنق ودخلنا صالة الرحلات الخارجية بوابة 25 حتى أكتمل عدد المسافرين وركبنا الطائرة والفرحة تغمرني انا وبو سعودنه ومن سوء الحظ ماصرنا جنب بعض صار بينا الممر بس مهوب مشكلة لاجل عين تكرم مدينة والحمد لله صار جنبي واحد افضل من رفيقي من غير قصور فيه (رائد طيار سعودي عنده دورة في مصر)ودردشة انا وياه لين قطعنا المسافة بدون ملل بس صادفتنا مطبات هوائية فوق تبوك الله لايوريكم بغيت اموت من الخوف وصلنا مطار القاهرة الدولي(الجديد) قرابة الساعه 10.30 مساءً وفي بالي انه بيكون افضل من المطارالقديم ولكن للأسف والله يالقديم انه احسن منه بكثير .استقبلنا طير شلوى السواق(محمود) وعلى فندق دريمرز في ش/ جامعه الدول العربية وأخذنا (جناح صغير: غرفةوصالة وشرفة وحمام) ب 130جنيه :x1: يابلاش بس الصراحة تقال النظافة مش ولابد لكن موقعه خيالي تحت الفندق كل اللي يطري على بالك(مطاعم*مقاهي*تموينات*انترنت*صرافة*) دخلنا الغرفة مانشوف من التعب والارهاق وطلبنا حبة دجاج من مندي (السمار وحضرموت) الاصلي وتعشينا ورقدنا ماعاد نشوف من التعب .

اليوم الثاني: الجمعة

صحيت الساعه العاشرة صباحاً بعد مقلب سواه فيني رفيق الدرب ابو سعود وأخذت ترويشه تحبها قلوبكم وأفطرت من فطور الفندق (مجاني تبع الغرفة) جبن مثلثات وصامولي فقط لاغير بس ماقصروا كثر خيرهم هذا اللي قدروا عليه ,بينما اكتشفت ان صاحبي قايم بدري ونزل تحت وأخذ جولة في شارع جامعه الدول وأشتر عصير طازج من العصارات ولف الشارع لف بحكم انه اول مرة يروح مصر تسبحنا أستعداداً لصلاة الجمعه ولكن للأسف فاتت علينا عسى الله يغفر ويرحم وجمعنا الظهر مع العصر تأخير بعدها رنا لمكتبة ثقافية كبيررة نسيت اسمها بالقرب من المتحف عشان ابو سعود مسوي فيها مثقف ويبي كتب معينة ورجعنا على العشاء تقريبا للفندق وعينك ماتشوف الا الصياح والهجولة فاللوبي أثر العمال حقين المطعم والرسبيشن والفندق مجتمعين عالتلفزيون يشوفون مباراة مصر والكونغو وفازت مصر غيرنا ملابسنا وطلعنا على مقهى زي الكوفي شوب قدام العمدة نتعشى ونتفرج على فرحة الشعب المصري بالفوز وكانت صراحة لحظات وتعليقات خطيرة من أبو سعود حتى اذكر انه قال (الله يرحم شارع الفروسية لافاز الهلال) يوم جات الساعه 11 بالظبط الا ميتين من التعب لان نومنا البارحمش ولا بد ونرجع عالفندق واسحبها نومة .

اليوم الثالث: السبت

أصبحنا السبت الساعه 11 ظهرا تقريبا بس ماشالله تبارك الله كلنا حيوية ونشاط ونفطر فطور الفندق ونصلي الظهر و بحكم ان سواقنا (محمود) صابته أنفلونزا حادة أخذنا تاكسي ثاني والحمد لله حضنا زين فالتكاسي نطيح فالاجاويد اللي هرجهم قليل وقلنا يالله عالاهرامات الظاهر ب 20 جنيه وصلنا الاهرامات ودخلنا مع شارع اسمه (العبيد) الله لايوريك والله ياجماعه الخير أنواع الريحه اللي تشق الخشم ريحة الخيول والحناطير والجواميس بغيت انتحر :112: وصلنا لمدخل الاهرامات ويجونك الشريطية يمشون مليون ايه ياباشا عاوز خيل ولاحنطور (عاد انا ماعرف وشهو الحنطور اول مرة اسمع به ) قلت ابو سعود وشو الحنطور قال :مدري لكن الله العالم يابو عايض انه دباب جديد او سيارة واكتشفت ان الحنطور هو : حمار أعزكم الله يجر عربة بس انصحكم تراه افضل من الخيول بمليون مرة لانه العربة مريحة وتجي جلد ويمشي الحنطور بركاده , اما اللي يركبون الخيل يتعبون كثير . قلنا هاه يابو احمد بكم الحنطور قال لفة عالاهرامات كلها ب 400 جنيه ومنا ومنه لين خذيناه ب 80 جنيه ولفينا الاهرامات واستمتعنا صراحة وشفت ابو الهول وشفنا مقابرهم واثناء الرحلة نسيت اقولكم ان ابو سعود انسان قروي ومافيه امل انه يتخلى عن عاداته وقيمه النبيلة لانه رفض وبشدة جميع محاولاتي اليائسة بتنزيل الشماغ والثوب ولبس البدلة
خلصنا من الاهرامات الساعه 2.30 تقريبا بعد مامرينا على محلات زهرة اللوتس اللي يبعيون العطورات ب90 جنيه وهي راس مالها كالونيا من كل شي بريالين , طلعنا نمشي على رجلينا مع شارع العبيد نبي تاكسي وصادفنا محلات قديمة شعبية ونحصل هاك الولد اللي يبيع خبز صاج ويدهنا لك بجبن ومربى وأخذ لي وحده , واصلنا المشي بحثا عن تاكسي لين مرينا من عند بيت صاحبه واقف قدامه ويوم شاف شماغ وثوب ابوسعود وهو اللي ينطلق علينا يمشي مليون ماندري وش يبي . سلام عليكم ياخوانا قلنا وعليكم السلام قال : الاخوة عرب قلت انا لاانجليز وش ظنك يعني قال لاقصدي يعني عرب خليجين قلنا ايه قال وسعوديين كمان ياهلا وسهلا تكفون انا طالبكم طلبه ان تتفضلون عندي تشربوا الشاي بصراحة الرجال احرجنا بكرمة وصعبه نرده قلطنا معه وسواليف حلوة وشاي وعصير طلع الرجال مدرس فالكويت واخذنا عنوانه واعدنا نجيه بعد فالصيفية وطلعنا من عنده واخذنا تاكسي سواقه (شايب عربجي ) كان يشتغل فالسعودية سواق وايت في القويعية والرويضة ويعرف حركات السعوديين زين حتى تصدقون لقينا معه شريط لفنان شعبي اسمه (عبدالرحمن ذعار) ههه ورجعنا للفندق الساعه تقريبا 5 العصر , دخلنا وبدلنا ملابسنا وتغدينا وقالي ابو سعود فيه صديق له مصري كان مدرس معه فالسعودية قبل 8 سنوات وموصيه امانه اذا جاء مصر يدق عليه المهم بحثنا عن عنوانه وتلفوناته وحصلناه في (أمبابه-القناطر الخيرية-المناشي-كوبري الجلاتمة-سوبر ماركت المقدم) نزلنا تحت الفندق وكل تاكسي يوم نعطيه العنوان يقول لا ذي بعيدة وسيارتي ماتروح ومنا ومنا لين حصلنا سواق وقال بوديكم بس ب 50 جنيه قلنا تم يالله ونمشي من الفندق قبل المغرب بنص ساعه تقريبا ونمشي ونمشي ونمشي ونمشي ونتعدى امبابة ونمشي ونمشي ونطلع من القاهرة باتجاه الشمال الدلتا ويخيم الليل ويجينا طريق الله لايوريكم سيد واحد مكسر معفط بدون انورا كله مطبات كبر الحمير:112: وصلنا القناطر ونتعداها ونمشي ونوصل المناشي لين كوبري الجلاتمه وقفنا وسألنا عن سوبر ماركت المقدم انا قلت في خاطري هالحين الرجال يوم قال سوبر ماركت اكيد انه مثل العثيم او بلشرف او على الاقل ميد ويوم نجي يالربع ونشوف هاك الفتحة 2×3 بدون لوحة نص البضاعه برا المحل وفيها 3 شباب قلنا ووين سوبر ماركت المقدم قال اهلا وسهلا وصلتوا انتو اصحاب ابو عمر اللي جايين من السعودية استريحوا وابو عمر جاي فالطريق , والله ويجيبون لنا شاي وعصير وموية ومتكلفين الله يجزاهم خير ونتفرج عالكوبري والعالم اللي فيه تحلف بالله كانك فالبطحاء هذا وهم برا القاهرة مثل ماتقول كوبري(جو والغطغط) ههه ماشالله تبارك الله المهم جانا المعزب ابو عمر وهو يتحضن ابوسعود وعينك ماتشوف الا الدموع دموع التماسيح ههه بس صراحة موقف مؤثر لهم 8 سنوات وزملاء قمن قلب وبينهم مواقف ماتنسى ويسلم علي ابو عمر ويبوسني ويبوسني ويبوسني والله يالربع انه بغى يقطع خدودي ياهلاومسهلا وهالتراحيب الي تشرح الخاطر ونورتو مصر وياخذنا الرجال على سيارته الخاصة لان الرجال ولد نعمه ماشالله تبارك الله عندهم بقالة ومصنع تعبئة البان وموجه تربوي يعني حالته المادية ممتازة وفوق بعد ويلف بنا الرجال الديرة لف ماخلا ولا شارع ولامزرعة الا ودخلنا فيها والحواري لين اذن العشاء ورحنا بيته وقهوة وشاي وعلوم غانمة وعصيرات وسالف ذكريات بينه وبين ابو سعود لين جات الساعه 11انا بصراحة تعبان من الخط وخايف بعد الرجال يحلف علينا بالنوم عنده لاني صاحة شفت عنده فالحارة شيخ الغفر اللي يشل بندقية وشنب وثوب صعيدي واهمس في اذن ابو سعود قلت انتبه توافق للنوم ولقيت ابو سعود علمه في مخباة مايحتاج , المهم قال الرجال اسمعوا ذبيحتكم بكرة انشالله غداء والليلة بنعشيكم احسن مطاعم اسماك فالمناشي وبكرة الصبح نفرجيكم عالفلاحين ومزراع البرتقال قلنا يابوعمر الذبيحة والله ان ناكلها لكن فالصيفية حنا هالمرة جايين نسلم عليك ونتعشى نطمئن ومن هالكلام (والله يالربع ان دموعه في عيونه يوم رفضنا نمسي عنده ) لكن على وعد للصيفية انشالله وطلعنا من بيت الرجال ودار فينا على بيت عمه واخوانه ويودينا لهاك المطعم ونتعشى سمك (بلطي وكنعد وفيليه) والله ثم والله ياجماعه الخير اني ماذقت مثله في حياتي طازج يصيدونه من النيل وعلى طول عالمقلاة , شكرنا لمعزبنا وقلنا ماقصرت يابو عمر ووعدنا انشالله فالصيفية جهز لنا (جاموس هرفي) ولا(حنطور عارضي) وقلنا نزلنا عند الكوبري مع التكاسي , وهو اللي يضحك قال صدق انكم ماتستحون والله مايوديكم للفندق الا انا قلنا يابو عمر مشوار عليك حول 30 كلم كلها مطبات قال لا معصي .
ويجيك ساري لين نزلنا فالفندق حول الساعه 2 والظهر عندي متكسر من المطبات .ونغط في سبات عميق .

اليوم الرابع: الاحد

اصبحنا يوم الاحد متكسرين من عناء يوم أمس ومشاوريه وافطرنا الظهر وقعدنا شوي على التلفزيون ونشوف اخبار العبارة اللي غرقت وحنا نقول لو فرضا ماعندنا واحد زي ابوماجد يظبط حجوزاتنا وش بنسوي يمكن نروح عالعبارة . الله يرحمهم ويسكنهم الجنة , المهم يوم جاء قبل العصر بشوي ونروح لمدينة الانتاج الاعلامي في 6 أكتوبر وصراحة طريق 6 اكتوبر حلو وجديد و4 أسياد يعني لاباس ويمر على مناظر طبيعيه حلوة ومزارع ويمر بك على مدينة الشيخ زايد لين تجي 6 اكتوبر مدينة متطورة واغلبها شقق جديدة وجامعة بس ياخي عيبها مهيب حول النيل يعني كأنك برا مصر كلها وهذا عيب 6 أكتوبر, دخلنا المدينة بتذاكر 40 جنيه للشخص وحضرنا عروض دلافين وسينما الاطفال ومدن تصوير الافلام القديمة ولعبنا فالملاهي لين شعبنا ومن حسن حضنا صادفنا (رحلة مدرسية لطلاب وطالبات جامعه) وتعال شف ابوسعود انواع التميلاح والترزز ههه لين آذان المغرب ونطلع راجعين للفندق وصادفنا زحمه فالرجعه طفشتنا صراحه . دخلنا الفند ريحنا شوي وصلينا العشاء وتعشينا ورحنا لسينما في شارع الهرم تبدا الساعه 12 بالليل تقريبا نسيت اسمها وشفنا أفلام مهوب فلم لين الساعه تقريبا 3ورجعنا للفندق ورقدنا .

اليوم الخامس:الاثنين

صحينا آذان العصر ونحصل في جوال أبو سعود 40 مكالمة لم يرد عليها لابو عمر معزبنا راعي المناشي وندق عليه عسى ماشر يابو عمر وش فيه , قال أبد انا ملطع فاللوبي من الساعه 11 الضحى لين الحين احتريكم تصحون , ياحليله قلنا ليش ماتطق باب الغرفة دام الجوال عالصامت قال لا خفت ازعجكم ابيكم تشبعون نوم , ونقلط الرجال معنا ونتغدى سوا ونتقهوى مع بعض وسواليف فالشقة لين آذن العشاء وقال ابو عمر : والله يابعدكم ان جماعتي واخواني يهاوشوني يقولون ليش ماحلفت عالضيوف ينامون عندك عشان الصباح نكرمهم وقلنا ابد وعدنا الصيفية اللي في راسك سووه يابو عمر لك يومين نقضيها عندك فالمناشي وش تبي غير كذا , صلينا العشاء وقلت لهم مشينا نبي نتعشى في قارب عالنيل او القرية الفرعونية ونروح للفرعونية ونحصلها بحجز مسبق بالتلفون ونميلها على مطاعم السرايا عالنيل مقابل هليتون رمسيس من الجهه الاخرى بس صراحة مطعم على كيف كيفك خمس طوابق وكل طابق متخصص في اكلات معينه مثل الطابق الاول (عربي) والثاني(شرقي) وهكذا , ونطلب (حمام محشي ومشويات ) على الكيف
تعشينا واخذنا من عندهم شاهي اول مرة اشوفه زين للبطن بعد الاكل وفيه فرقة في احدى زوايا المطعم تعزف لك اي اغنية تبيها. ونطلع بتاكسي للفندق قال ابو عمر انا اسنتاذن بمشي لان وراه دوام اليوم الثاني بغيناه يسهر معنا لكن ماش الرجال رفض , نزلت انا وابو سعود من الفندق على رجلينا نتمشى في شارع جامعه الدول الساعه حول 10 ليل وناخذ ساعه انترنت وساعه في كوفي شب وساعه نتفرج على موكب زواج
رحنا أخر الليل للسينما اللي رحنا لها البارح ورجعنا للفندق الساعه 4 ورقدنا .
اليوم السادس: الثلاثاء
يوم العودة على ماقال شاعرنا الكبير ياسر التويجري:

بعد هذا ديورت خشة أدهام يم السعودية تقرر يسيرون

يم الديار اللي بها عز الاسلام لو انها غبرا لها حب مكنون

طبعا مهوب كيفنا نرجع الثلاثاء لكن عان مافيه حجوزات الا كذا او بعد الجمعه , اصبحنا الظهر الساعه 2 ونتغدى عالسريع ونظبط أمورنا ونسلم الغرفة ويسوي فينا موظف فالاستقبال مقلب لكن على مين ياعمي على انا وبو سعود تبطي عظم والله , قال فيه يوم مادفعتوا أيجاره قلنا يابن الحلال ندفع كل يوم بيومه ومعنا سندات قال لا , اذا كنت صادق جيب السندات ونطلع للشقة ونيجب السند , وينطلق عليه ابو سعود بغى يفرك وجهه طلعنا وأخذنا تاكسي ب 40 جنيه للمطار وصادفتنا زحمة الجماهير اللي رايحين للمباراة النهائية (مصر*ساحل العاج) وشرينا علم وهجولنا شوي معهم عالطريق لين وصلنا المطار , وقعدنا ساعتين انتظار لين اقلعت الطيارة والساعه 9 بالظبط وحنا في مطار الملك خالد بالرياض.
وأنشالله أوعدكم وعد رجال أنزل لكم الصور بس ماعندي سكانر حالياً ...,آسف عالاطالة.
وسلامتكم .
اخوكم:
سلم الطائرة