صباح الخير للجميع
البارح رجعت من الخبر بعد ما استمتعت بقضاء ليلتين فيها وحده حلوه ووحده مره
أنا راح أكتب عن موقف صار لي بدون تشفير علشان الناس تعرف الحقيقه
مثل ما مدحنا ناس و مدحنا شقق وصلناها للسحاب من دورنا ايضا الأمانة والإنصاف ونعطي الحق لصاحبة
وننزع الثقه من غير أهلها اللي ما يستحقونها بصراحه.. وماني خايف من أحد
عانيت معاناه من الساعه 9 في الليل الخميس للساعه 3 الفجر
ما حصلت شقه لا في الخبر (العليا) ولا العقربية ولا الثقبة بهذله ما بعدها بهذله
زين حصلت عمي سابقني بكم يوم ودخلت معاه بعايلتي ونمت ليلة
حصلته مستاجر شقتين فاتحهم على بعض
الجمعه بالموت وضرب العصي حصلت شقه بس غرفتين ب 700 ريال أبان 2 وللأمانة تستاهل
ولو قال ب 1000 عطيته بعد الوهقه اللي صارت لي وبعد ما شفت العوايل يمين ويسار الشقق نايمين
مو في سياراتهم بس بعضهم حاط حجاب خيمه ونايم هو وعايلته
غير اللي نايمين على الكورنيش أدفع 700 ولا يصير فيني كذا الشقق فخمه فخمه 5 نجوم وما عليها كلام
خلف شقق ملفا.. والأفضل منها تعامل السوداني عمر أفضل من المصري التعبان
اللي في شقق سعود الحميد اللي بجنب روتانا
عطيتهم تلفوني وقلت اذا فضى شي كلموني جاني كوول مي وكلمت الا بنقالي لسانة طويل
قلت نعم قال فيه شقه 3 غرف الساعه 1 ونصف تعال بعد الصلاه جيته على طول ابي اعربنه
قبل الساعه وحده على طول طلعت من المسجد عليه
قالي الشقه راحت واشوف الناس تنزل اغراضها و تدخل ويخزوني بعد يشوفوني معصب
أنا :- يا إنسان يا محترم ليش سويت كذا
المصري المحترم:- مالوش دعوه تكلم معاي انا واللهي ما عرفش ااولك ايه بس انتا ما دفعتيش
أنا:- ما دفعت شنو يا حبيبي وبعدين انت وشدخلك مو انت المصري اللي كنت قبل الصلاة
المصري المحترم:-الفلوس حزرتك وبعدين انا المصري الوحيد اللي هنا
أنا :- وانت قلت لي وأنا قلت لا يا المحترم الحين غصبن عنك تطلعهم
المصري المحترم:- أطلع أيه الراقل دخل هو وعايلته ودفع لي مقدم 3000 ريال
أنا :- عدل عدل علشان كذا بعت ذمتك وكلمتك يالمحترم
و الله العظيم إحترام للناس اللي اجتمعوا و توهم راجعين من الصلاة وكل واحد سجادته بإيده
وتقدير لشيبات واحد منهم ولا كان فرشته فرش قسما بالله ما ينساه طول عمره
قلت ترى انا ماني طفل علشان تتمصخر علي تقولي تعال ولمن جيتك تقولي والله ما اعرفش اقولك أيه

• رجعت للسوداني قلت له الشقه اللي على أمل تفضى فضت قال ايه نعم والراجل دا اللي عندي عايزها

وقلت لا مواعد واحد اللي هو انا لو جات الساعه 1 ما جاء نشوف بعدين
قلت للسوداني طيب والحين وش بتسوي والرجال يسمع
قال انا سوداني عيب أرجع في كلمتي بس الشقه ب 700 قلت لو ب 1000 دفعتها لك ولا ادفع 650
للمصري المحترم جدا
أماكن تمت زيارتها

• سعد التخصصي
• الواجهه البحرية بالطول والعرض جوله العصر وجولة ليلية
• فؤاد سنتر و ملاهي الأطفال الداخلية
• الظهران مول وملاهي الأطفال سباركيز
• السويكت

كلمة حق وآسف على الإطاله
ألف شكر لمنتدانا الرائع لتقديمه لنا كل المعلومات الهائله عن كل المدن والدول السياحية
بشوف إذا حصلت صور راح أرفقها لكن مو أكيد
الموضوع مو تقرير كثر ما هو كشف لحقيقة الشقق وأصحابها
اللي يستاهل نقول يستاهل واللي ما يستاهل نفضحه .. علشان يكون عبره لغيرة وشوي في حقه بعد