السلام عليكم
مش عارف الموضوع دا مكانه ولا مش مكانه، عموماً كنت عايز أطمن الإخوة اللى بيسألوا عن الحالة الأمنية فى القاهرة إن الدنيا أمان جداً الحمد لله بعيداً عن ميدان التحرير .
انا لسه داخل البيت حالاً، روحت الجيزة والمهندسين والدقى والأوبرا والتحرير ووسط البلد وجاردن سيتى ، وكان معايا أصدقائى من دول أوروبية مختلفة عايشين هنا ومعندهمش مشاكل مع الأمان، الوضع الأمنى مستقر جدا والناس عايشة طبيعي بعيداً عن ميدان التحرير اللى فيه الإعتصام و كوبرى قصر النيل طبعاً عشان دا المدخل الرئيسى لميدان التحرير دلوقتى ! غير كدا الدنيا كلها ماشية تمام خصوصاً المهندسين والحسين
طبعاً تعليمات الامان العادية مطلوبة زي اى مكان فى العالم، يفضل عدم حمل كاش كتير وإستخدام الكريدت كارد، السؤال ومعرفة المكان اللى متوجهله قبل ما تروح الأول، وياريت لو تعرفوا حد عايش هنا تسالوه بإستمرار وتعرفوا اكتر عن المكان اللى رايحينه، ومتشتروش حاجة بدون ما تفاصلوا فى تمنها ومتروحوش مناطق عشوائية!
دا بالنسبة للقاهرة، معنديش فكرة بالباقى لإنى مخرجتش من القاهرة بقالى شهرين ..
بس عموماً أتمنى لكم أجازة سعيدة فى القاهرة وتحت أمركم فى أى إستفسار