السلام عليكم ورحمة الله .. يا جماعة احنا عائلة 4 اشخاص كبار، تم حجز الطيران الدولي من تاريخ 3 اغسطس الوصول الى نيويورك وتاريخ 27 اغسطس المغادرة من شيكاغو.
تم الحجز اول 4 ليالي من 3 الى 7 اغسطس في نيويورك
ومن تاريخ 7 الى 18 اغسطس فلوريدا بس مب عارفين كيف نقسمهم
ومن تاريخ 18 الى 24 اغسطس مدينة لانسينغ في ميشيغان لاننا بنزور ناس هناك.
تم الحجز من تاريخ 24 الى 27 اغسطس في شيكاغو
المطلوب يا جماعة الخير:
ال 11 ليلة من 7 الى 18 اغسطس مب عارفين كيف نقسمهم في فلوريدا ؟
مبدئياً اسبوع في اورلاندو لكن ال 4 ليالي الباقيين مب عارفين كيف نستغلهم
كان ودي نروح فيهم كروز بس قالوا انه بحر وصيف وانتوا تعرفون كيف لبسهم في البحر يعني ماتنفع لنا كعائلة وبنتضايق ؟ شرايكم انتوا ؟
وبالنسبة لميامي ما ادري اتوقع نفس الشي بحر واحنا عائلة مش شباب !
وهل فيها شي يسوى ؟
وهل فيه في ميامي او فلوريدا بشكل عام فلل او بانقلوز بمسبح خاص يعني تقريبا نفس نظام المالديف ولا ؟
او اي شي ثاني يناسبنا كعائله!
وفي واحد اقترح علي ماكانك آيلاند او upper peninsula قريبة من لانسينق بس قريت عنها ماشفت فيها شي يسوى ؟
اتمنى تقترحون علي كل الاقتراحات اللي فبالكم لانه ما بقى شي وزحمة الصيف الاسعار تعلى غير اني داخل على فترة امتحانات.
يعطيكم العافية مقدما

ال 11 ليله فى فلوريدا اولا الله يعينكم على الحر والرطوبه والمطر بهذه الفتره بفلوريدا
نصيحه روحوا ميامي 3 ليالى و اورلاندو 8 ليالى
ميامي تصلح للكبار وهى ارقى بكثير من اورلاندو وفيها خوش مولات واسواق وقهاوى ومطاعم ...الخ
اورلاندو عبارة عن مدن ملاهى
شوف تقاريرى تحت بالتوقيع عن المدينتين

aziz20012001
طيب يا اخوي شرايك في الكروز هل فعلا انه الانشطة اكثرها سباحة في سباحة والكل لابس مايوهات ؟؟
والجزر اللي يودونا لها تناسبنا كعائلة ولا ؟
وميامي اللي اشوفه يميزها البحر لانه بنكون شبعانين اسواق ومطاعم وقهاوي طول السفرة في نيويورك وشيكاغو !
فيه منتجعات فيها فلل بمسبح خاص ؟

او مثلا فيه رحلات بالغواصة على سبيل المثال او مثلا ناجر قارب ناخذ جولة في البحر ونحدق بنفس الوقت يعني شي يرضينا كلنا مانبي مكان كله سباحة في سباحة والوالدة تقعد تطالع بس