حبيبنا نواف
بالنسبة لما ذكرت راح أوضح لك ولا تشيل هم.
الجبل اللي هو (البونشاك) فيه المنطقة اللي اسمها تشاباناس، هي المنطقة العليا من الجبل واللي يوجد فيها (حديقة الزهور - وشلالات تشيوداس) وغير كذا بعد يوجد فيها فلل (كوليبا والياسمين واللوتس وغيرها) وهذه المنطقة هي الأنظف والأهدأ والأجمل بالجبل.
والمنطقة الثانية اللي هي توجد اسفل الجبل تقريبا واللي يوجد فيها (حديقة الحيوانات تامان سفاري - وشلال ثاني بعد بس ماني ذاكر اسمه بصراحة وبالإضافة إلى منطقة أنطلاق البراشوت) كما يوجد بها مجمعات الفلل مثل (جاياكرتا - القولف - لورا - بريتا - ايفر جرين .... إلخ ويا كثرهم).
اما بوقور فموقعها قبل الجبل وهي مدينة صغيرة تقريبا وفيها الأسواق الشعبية والمحلات طبعا لا تسكن فيها لأنه الجبل أفضل لك والجو الطف وأبرد.
أتمنى ان أكون شرحتلك شالفرق بين المناطق الثلاث بالمختصر المفيد.
وتحياتي لك ،،،،
وتروح وترجع بالسلامة.
أخوك Awal_7abib

1. لكن النقطة المهمة هي حول جوك الخاص ؟؟؟

والله يا نواف ما عندي ذيك المعلومات بس أبرد عليك علشان ما يقولوا يوم صار مشرف كبر راسه .
أخوي العزيز مرة رحنا للجبل مجموعة واختلفنا في السكن ؟؟
لسبب بسيط الأمان موجود في كل مكان بإذن الله تعالى بس فتح عيونك شوي ولا يستغفلك أحد وما راح تحصل إلا كل خير .

لكن النقطة المهمة هي حول جوك الخاص ؟؟؟

يعني أول الجبل والمجمعات الصغيرة والفلل الخاصة إذا صحيت الصبح وجلست تفطر دباب داخل ودباب طالع أنواع البضائع ملابس جلديات تحف مساج أدوات تجميل صرف عملة يعني أنواع الباعة بعض الشباب يمبسط على ها الجلسة وياخذ ويعطي مع إنه مهب شاري بس يستانس معهم يعني _ أرجو إن المعلومة تكون وصلت _علماً بأن أكثر الباعة من العنصر النسائي .
لذلك ما تقدر ترتاح بسواليفك وبجلسك لأنه كل شوي داخل عليك واحد .
لكن في المجمعات الفخمة قمة الهدوء يمكن تجلس يوم ما مر عليك أحد فعلا هدوء ربما يميت الكثيرين ويبعث الحياة في الكثيرين .
لكن لو احتجت أي شيء الله يعينك على المشوار لازم يكون معك سواق على طول أو تطلع من المجمع ودور على دباب وهذي فيها شي من المغثة .
هذا الجبل باختصار وأنا شخصياً أفضل الهدوء وجلسة مع الربع والأصدقاء لذلك أفضل شبناس مع إرتفاع السعر كل مازاد الأمن كل مارتفع السعر .
أكرر لمن يرغب الراحة ويملك إجازة أطول من 20 يتجه إلى تريتس

يا سلام المشرفين يردون علي مره وحده شكلي خطير ;) وانا ما ادري .
اول حبيب يعطيك العافيه طيب بس بالنسبه للمنطقه الاولى والمنطقه الثانيه هل فيه مجمع (سكن فلل)تنصح فيه من واقع تجربتك الشخصيه .
عصويد تسلم حبيب ألبي على ايضاحك وياليت توضح لي افضل مجمع من واقع تجربتك .
كمان فيه نقطه بالنسبه للحجز في الفلل وغيرها احجز من مكان معين في جاكرتا او اطلع الجبل ومن هناك اظبط كل شيء على الطبيعه.
ويعطيكم العافيه يا مشرفينا .

نواف أول ما تفتح بوابة السفر إلى إندونيسيا راح تحصل استبيان فيه معلومات عن الفلل وذكرت أنا الأفضل من وجهة نظري وبحكم تجربتي البسيطة .
وفطاحلة الجبل والمخضرمين سجلوا وجهت نظرهم بإمكانك ترجع للإستبيان وتستفيد منه .

اخوي عصويد (saya ganting) صحيح الشباب ما قصرو وذكرو اشياء كثيرة بس ما فيها تفصيل .
يعني ان عصويد يقول ان المجمع الفلاني افضل واول حبيب يقول ان المجمع العلاني افضل ، طبعا كل واحد وحسب وجهة نظره ومزاجه زي ما ذكرت ، بس ما احد يذكر السبب ليش هذا السكن افضل من غيره فيه ناس تحب الهدوء لذلك تذكر مجمع معين وفيه ناس تحب الزحمه والي رايح والي جاي ويذكرون مجمع ثاني .
خذ مثلا عندك بعض الأخوان مدحو ( فلل جاياكرتا ) والبعض الأخر يسبها سب الويل بس الي سب والي مدح ما بين ليش هذا المجمع جيد او غير جيد ، هذا يساعدني انا على الاختيار مبدئيا على الاقل .
وتحملونا شوي كثرنا عليكم .
واسف للإطالة ،،،،،،،،

يا بعدهم أبشر أعطيك أياها على بلاطة جياكرتا للي يحب القلهي يحب الداخل والطالع واللوتس لثقل والوررة الي مايبون أحد يمر عليهم والأفضل على الإطلاق مجمع حديقة الزهور راقي جداً وهو للطبقة الثانية الوررة والي يبحثون عن الهدوء أما الفلل الي بجانب كنتاكي واذكر منها فلل كيكي وطقتها للي يحبون القلهي ودباب داخل ودباب طالع .
أنت صنف نفسك من أي الصنفين الرومانتيكي أو ؟؟؟؟؟
وعلى ذلك تلقى مبتغاك ولا تنسى المادة عنصر أساسي في اختيار السكن يعني فيه فلل ب800000 وفيه 3000 لليوم الواحد .

حبيبي saya ganting
أولاً بدي أعرف ليش غيرت الأسم مع أن الأولي والله كان حلو وايد وايد
ثانياً شمعنى هذا الأسم والذي أعتقد بأنه كلمه أو أسم أندونيسي
ثالثاُ يبه بلاطتك صكت براسي وهذا الدمان تسيل كأنها نهر جاري بس ما يخالف قالوا في الأمثال ضرب الحبيب مثل أكل الزبيب
رابعاً ما هوا أسم مجمع حديقة الزهور بالأندونيسي وأتوقع بأنه مناسب لسكن العوائل أو أنا غلطان وتقريباً كم سعر اليوم فيه وهل هو مأمون وهل هناك مجمعات مقاربه أو مماثله له من الممكن الواحد يسكن فيها في حالة كان هذا المجمع متعبي وهل جميع الخدمات قريبه منه مثل البقالات والمطاعم وغيرها و .. و .. و .. شكل البنزين خلص أو في كربون في الشكمان .. بشيك وبرد لك يابعد ألبي

albinsaad
يأخي أنت شعلة كل ماأفتح صفحة ألقالك مشاركة .
ما شاء الله عليك أنت من عشاق السفر الله لايضرك .
شكلك حساوي

ها ها ها
أخوي السنعوسي وشفيهم الحساويه
تراهم أجدع ناس على قولت المصريين