اهلا وسهلا فيك باب البحرين
بالسيارة من مسقط ساعة ونصف الى الجبل الاخضر
بامكانك تاخذ تاكسي من دوار برج الصحوة في مسقط قرب المطار ارخص شي الى الجبل ولما توصل الجبل ضروري تستأجر سيارة دفع رباعي لانه الصالون ممنوع لصعود الجبل ... على الجبل يوجد فندق الجبل الاخضر تقريبا الليلة ب 30 ريال ....
واذا حبيت تستأجر سيارة من مسقط بعد افضل .... وانت طالع من الجبل الاخضر زين بعد تمر على كهف الهوتة في ولاية الحمراء القريبة ..
وبما انك في شهر عسل انصحك جدا بالاقامة في فندق الواحة بمنتجع شانغريلا بر الجصة في مسقط
توجد مواضيع في نفس المنتدى عن الجبل الاخضر و منتجع بر الجصة

الشكر موصول لك عزيزي الدوحاني
بالنسبة الى تأجير السيارة ,, كم الدفع الرباعي هناك عند الجبل الاخضر ,, وهل يختلف في مسقط ؟؟
راح تكون زيارة الجبل الاخضر في تاريخ 3/8/2008 هل التوقيت مناسب لزيارة الجبل ..؟؟
وكهف الهوتة هل يستحق الزيارة ؟؟
و نشوفك على خير ,, ونترقب اجابتك

أخوي باب البحرين ليش ما تروح صلاله ؟؟
بصراحه افضلك تروح صلاله وتقضي فيها احلى ايام شهر العسل خاصه ان الوقت اللي بتروح فيه يعتبر عز الخريف في صلاله .... وصدقني ما راح تندم.
أما بالنسبه للجبل الأخضر انا زرته قبل عامين تقريبا وكانت زيارتي في شهر 8 بعد بصراحه مليت بعد يوم واحد مع اننا كنا شلة شباب وعددنا 12 فرد ... صح ان في الجبل فندق جيد نوعا ما بس تكفيه زيارة يوم واحد مش اكثر.
والله يوفقك ان شاء الله وبالبركه وعقبال مليون سنه زواج ان شاء الله.

انا اوافق بوسيف رايه
انا سرت السمه اللي طافت واللي قبلها للجبل الاخضر
يوم واحد يكفي تدور على الجبل
قبل سنتين يوم رحت اذكر ان اجرنا باثفندر اليديده من مسقط ولكن ناسي اسم المحل
كان الريال طيب ومتفاهم وايد
انا اقول روح صلاله وصدقني ما بتندم

انا اتفق مع الاخوان
تقدر تروح لصلالة بالباصات التذكرة ب 8 ريالات فقط ذهاب والاياب بنفس السعر
وهناك في صلالة استاجر سيارة صغيرة
مواقف الباصات المركزية في روي عند الحي التجاري والاخر عند دوار برج الصحوة قريب من المطار
او استاجر من مسقط واطلع طوالي الى صلالة بس ترى الدرب طويل 990 كم يعني بين عشر الى 12 ساعة مع التوقف في المحطات
بات ليلة او ليلتين في منتجع بر الجصة وتوكل على صلالة
واذا بغيت اي مساعدة في مسقط انا موجود في اي وقت

اخواني جزاكم الله الف خير
بس بغيت اصحح لكم معلومة ,, انا اكيد راح اروح صلالة ,, بلا شك يعني وراح اقعد فيها تقريبا سبع ليالي ,, بس في بداية سفر شهر العسل راح يكون في مسقط لمدة اربعة ايام ,, ويوم من الايام الاربعة راح اخصصه الى الجبل الاخضر
وبغيت استفسر عن الجبل الاخضر بالنسبة الى استأجار السيارة ؟؟؟ لازم عبر البطاقة الفيزا كارد ,, ما يصير كاش (نقدا
وكم تقريبا استأجار الفور ويل في مسقط وهل هناك فرق في نزوى ؟؟؟
و لينا استفسارات يا دوحاني فتجهز لها يا الحبيب ,,,, اشكر لكم مشاركتكم الغالية
نشوفكم
باب البحرين

مبروك مقدما اخوي
ومثل ماقالوا الجبل الاخضر يكفيه يوم واحد وعقب وجه لصلاله
وبالتوفيق

انصحك تزوروه ليوم واحد صراحة ماينفع لشهر العسل
وهذا رايي لانه قد زرته ومايحتاج اكثر من يوم