كل تذكره لها تاريخ معين والله العالم
اقترح عليك التعامل مع شركات الطيران المرنه
منها الإمارات مثلا
عادة اي تعديل على تاريخ التذكره تقديم او تأخير ياخذون ضريبه معقوله
وابعدي عن البرتش والشركات الناشفه الي ماحد يقدر ياخذ معهم لاحق ولابطل
مثلا انا دائما اشري تذاكر من الإمارات
واسافر رغم اني ماعرف متى ارجع بالضبط
واحط تاريخ متوقع
ولا اذكر اني سافرت ورجعت في نفس التاريخ الي ابغاه
بل اقدم أو أأخير
ادفع ضريبه على خط سير واحد ( رجعه مثلا ) تكلفني 75 دولار
اي 282 ريال
ارسل مبلغ الضريبه للمكتب الي شريت التذاكر منه بواسطه احد الأصدقاء او السايق
ويقوم المكتب بالتعديل وارسال التذاكر الإلكترونيه على الإيميل
لذا اهم شي تختارين شركه تكون مرنه وضرايبها معقوله وانتبهي زين للنقطه ذي
لأني اكلت خابور في مطار البحرين على الخطوط البريطانيه ماخلوني اسافر بالمطار وراحت علي التذكره كامله
الذهاب والإياب ( اقولهم الذهاب ماعليه بس الرجعه تنلغى ليه ؟ )
ونا وياهم في مشاكل من شهر 5 الماضي وكأني اكلم حجر

عزيزي لم أتعامل مع غير البريطانية والحمد لله تعاملي معاهم زي الحلاوة
مدة التذكرة سنة. حقيقة لا أعرف إذا واجهت مشاكل!!

Hell
اخي Hell
بما انك استغربت من كلامي فأنا استأذن الأخت لكتابه قصتي ولتحكم انت بنفسك دون تحيز للخطوط المفضله لديك
في البدايه كل نظام له استثناءات ، والنظام وضعه الإنسان ، وبما ان الأنسان هو من وضع النظام فإن الإنسان يستطيع ان يحدث تغيير في هذا النظام ، وخاصه اذا تحدثنا من منظور انساني
طبعا سبق ان سافرت مع الخطوط البريطانه عده مرات وتعجبني نظافت طائراتهم وترتيبه الكراسي في البنزس كلاس ولا يروق لي تعاملهم فهل جلفين نوعا ما
والدي أسأل الله ان يشفيه يتعالج في الولايات المتحده الأمريكيه مما يجعلنا على تردد بين حين وآخر ، في يوم من الأيام وكان الكلام هذا الساعه 5 عصرا ، تعب الوالد فجأه وكان وضعه خطيير نوعا ما
انطلقت الى احد المكاتب السياحيه والذي اتعامل معه بصفه مستمره وطلبت منه ايجاد اقرب حجز ، ولم يكن لدي خيار غير الخطوط البريطانيه ولا يوجد امكانيه على كراسي درجه رجال الأعمال واضطررت الى حجز المقاعد في الدرجه السياحيه لي وللوالد ، وكانت التذاكر شبه مرنه ( اي في حال الإلغاء او التعديل يحق ذلك مقابل ضريبه على كل خط سير لهذه الرحله ) وفعلا وصلنا مطار البحرين في الوقت المحدد وقامو بإعطائي كروت صعود الطائرة .
بعد ذلك طلب استرجاع الكروت فأعطيته ثم قالي لايمكنك السفر لأن جوازك باقي عليه 5 شهور 14 يوم ، اندصدمت حينها وفعلا لم يخطر في بالي اطلاقا ان اقوم بتشييك جوازي ، ولكن في نفس الوقت لم يكن لدي متسع من الوقت فما بين شراء التذاكر وقت الرحله سوى 6 ساعات ، حاولت فيه بشتى الطرق ولكنه كان عابس الوجه سيء التعامل متعذرا انه لم اتمكن من الدخول في مطار هيوستن بالولايات المتحده ، لم اكذب خبر واتصلت على International Office في مطار هيوستن واخبارهم بالأمر ، قالولي تعال على اقرب رحله واهم شي يكون في التأشيره لو يوم واحد ومن السهل تمديد الجواز عن طريق القنصليه عند وصولك اما بخصوص الجواز ( ارقد وآمن ولاتشيل هم )
رجعت للموظف وكان تابع للخطوط البريطانيه وللأسف انه كان يحمل الجنسيه البحرينيه ( يكرمون اهل البحرين عنه وعن تعامله المردود على نفسه ) ورفض ، وقلتله انا ابغى خدمه انسانيه وارجوك تساعدني ورفض بشتى الطرق وقالي رح جدد جوازك وتعال بكره ؟؟؟؟؟؟؟
جانا موظف مسؤول في المطار وقالي لا تحاول معهم شوفلك اي حجز على أي خطوط تريدها وبأطلعك اما الخطوط البريطانيه لا ترجي من وراهم خير ؟؟؟؟؟؟
تعوذنا من ابليس وطلب مني الوالد الرجوع للسعوديه وبالفعل رجعنا ، وتواجدت في الجوازات في تمام الساعه ال8 وشرحتلهم الوضع وجددو جوازي في اقل من نص ساعه ( الله يقويهم ويزيد من همتهم )
اتصلت بالمكتب واطلبت منه تعديل التذكره وقلتله اول مايخصل الجواز بأجيك آخذ التذاكر وادفعلك الضريبه . وبعد نصف ساعه اتصل بي المكتب واخبرني ان التذكره تم الغاءها من قبل الخطوط البريطانيه وقال لي لقد اصدرت بطاقات صعود للطائرة ولم تلتزم بالرحله فبالتالي تم الغاء التذكره بالكامل
قلتله طيب مو ذنبي قالي المكتب راجعهم ونا راح اكلمهم لك
قلتله الله يعيين سولي تذاكر جديده ذهاب وضف اليها تذكره العوده
وقالي ( ماينفعش الرحله اتلغلت بالكامل )
اضطريت ان احجز على خطوط اخرى وكانت على الإماراتيه
ومن شهر 5 الماضي وأنا مازلت في شكاوي وايميلات والمشكله انني مازلت في هيوستن ولا يمكنني المتابعه بشكل مستمر لأني مشغول مع والدي
انا غلطان في اني لم انتبه لجوازي ولكن ظرفي اجبرني على ذلك
ولكن ابي اعرف المرونه الي دفعت عليها فرق وينهي ؟
وتذكرتين تروح علي بقيمه 12 ألف مو شوي وبغير وجه حق
وجلافه وتعامل سيء في منتهى اللا انسانيه
اكرر اعتذاري للأخت كاتبه الموضوع
واريد منك الحكم اخي Hill وكان بودي لو استطعت كتابه موضوعي هذا برساله خاصه وارسلتها لك ولكن للأسف الرسائل معطله في هذا المنتدى
لكم التحيه

hell
مشكور عالرد ماقصرت اخوي .. بس افضل اخطوط تكون عربيه .. تسلم مره ثانيه
ghamdi.ab
اولا سلامه الوالد مايشوف شر ان شالله الله يخليه لكم بالصحه والعافيه
وصادق الخطوط الاماراتيه من افضل خطوط الطيران وتعاملهم جدا راقي
بس اللي حبيت استفسر عنه سياسه الخطوط السعوديه في هذا النوع من التذاكر
لانو اذا حجزت اللحين عالفرست كلاس بهذي التذكره(الغير قابله للاسترجاع) تفرق تقريبا 20 الف ريال عن اذا
اخذت التذاكر المرنه او القابله للاسترجاع ..
وحبيت اعرف هل اذا عملت حجز واشتريت التذكره اللحين ولا سمح الله صار اي ظرف يمنعني
من السفر .. اقدر اتصرف بالتذكره مثلا ابيعها او ااجل الحجز مع دفع غرامه ماليه ؟؟؟والا تروح علي خلاص ..؟!
ومشكور جدا
اعتذر على الازعاج

اختي انت لازم تاخذين التذكرة على الطيران السعودي ولا عادي تقدرين تغيرين ؟ اذا تقدرين تغيرين والحجز بيكون على درجة الاعمال او فا نصيحتي اخذيها على الاماراتية او الاتحاد او القطرية احسن لكم وان صارت لكم ضروف لاسمح الله بعد اخذ التذاكر تقدرون تسترجعون التذاكر مره ثانية

اخوي الغامدي .. الله يشفي والدك وجميع مرضى المسلمين إن شاءلله
والله يعوضك عن قيمة التذاكر الخير الكثير إن شاءلله ،،