1. السلام عليكم ورحمة الله وبركاته


2. 1- الاسثمار في العلامات التجارية


3. خلينا ندخل في المهم واللي تبغوه اغلبكم /// اللي هو البضايع الجاهزة

السلام عليكم ورحمة الله وبركاته

أخواني بعد مالاحظت اهتمام عدد من الأعضاء بالتجارة في الهند حبيت أفتح هدا الموضوع عشان نتناقش فيه عن التجارة في الهند حسب نظرتي ومعلوماتي المتواضعة لأني انا جيت الهند عشان الغرض دا يعني أبغى اعرف ايش الفرص التجارية بجميع انواعها بالاضافة اني بشتري بضاعة نسائية
خليني أعطيكم نبذة عامة عن النشاطات اللي ممكن من وجهة نظري انو تكون مناسبة للتجارة والاستثمار في الهند ،، وخليني أقولها في نقاط .
1- الإستثمار العقاري :-
طبعا أكتر مدينة الاستثمار العقاري دحين بيشهد فيه نهضة قوية وسريعة هي (( بنقلور )) السوق العقاري عندهم أزدهر وقفز قفزة 10 مرات في خلال 5 سنوات ولسة قدامه كمان يعني اللي بيلحق الفرصة قدامه ..
حتى الاستثمار العقاري البسيط مو لازم بالملايين
نفسي أديكم أمثلة ممكن تستفيد منها تجاريا بس المنتدي سياحي وصعبة نتكلم فيه عن تجارة بحتة
2- الإستثمار التجاري ((بجميع أنواعه ))..
وهدا فرصه حدث ولا حرج سواء كنت رجل اعمال تحب المشاريع الضخمة ولا كنت تاجر جملة ولا حتى عندك محل صغير صدقني تلاقي غرضك في الهند وخليني أقسم الفرص برضو بشكل عام وادي نبذة

1- الاسثمار في العلامات التجارية

طبعا مفهومة اللي هو تاخد وكاله معروفة يعني زي ماكدونالد مثلا /// هنا في الهند في ماركات هندية عالمية لو احد عرف عنها والله يشوف الخير في كل القطاعات سواء (( وكالات الأغذية ، ولا الايسكريم ، ولا الملابس ، ولا المجوهرات )) عندهم فرص استثمارية كثيرة
واللي لاحظته انو فرصهم الاستثمارية في مجال العلامات التجارية أسعارها والله معقولة وأرخص من أسعار الوكالات الاجنبية وكمان أرخص من لو تبغى تاخد اسم تجاري سعودي زي الطازج مثلا أو محلات الفراولة )).
2- الاستثمار في سوق الأسهم الهندية
أنا نفسي لو واحد فيكم يعرف واحد محترف في التحليل الفني والأسهم السعودية تقنعوه يطلع لمدة اسبوع على السوق الهندي فرق شاسع لأنه سوق في بداية نموه وسوق عالمي

خلينا ندخل في المهم واللي تبغوه اغلبكم /// اللي هو البضايع الجاهزة

طبعا مليان المنتجات اللي ممكن تربحك أضعاف في السعودية بس ياربت اللي في باله منتج معين يسألني وانا اجيبله معلومات عنه
لكن بشكل عام /// الملابس الجاهزة أحسن وأرخص مكان ممكن كمان تلاقي فيه الماركات بسعر مخفض اللي هو فوائض مصانع factory outlet بس شي جودة مو شي تعبان يعني تشتري بضاعة نظيفة واسعارها ببلاش بس عاد يبغالها فهلوة وشطارة لأنو لما يشوفو العربي يرفعو الأسعار هدي كله في منطقة اسمها Olas بعيدة عن بومباي 3 ساعات بالسيارة اكرر المنطقة دي بس للملابس بشكل عام سواء أطفال او سهرة او رجالي والماركات المخفضة...
غير كدا أي نوع من أنواع البضايع الثانية بالنسبة لأصحاب المحلات سواء اكسسوارات أحذية هدا في شارع مشهور اسمه شارع عبدالرحمن في بومباي وبرضو اكرر لاحد يروح الا معاه واحد منهم وفيهم ويعرف يشتريلك بدون مايرفعو عليك الأسعار.
وطبعا المدن التانية تلاقي مثلا كل مدينة متخصصة في شي وخليني أختصرها لكم على هدا النحو -
1- بومباي ((لتجارة الجملة في جميع الأصناف ))
2- دلهي (( بلد تجارة الهوامير )) يعني 10 كونتينر وانت طالع وأغلب تجارها مسلمين
3- جوجرات (( مدينة رجال الأعمال )) أقوى رجال اعمال الهند من هدي المدينة وفيها مصانع متنوعة وأسعارها رخيصة والحلو فيهم انه المصنع يوافق يتعامل مع الكميات الصغيرة .
4- assam في حيدر آباد هدي من الاماكن العالمية لزراعة الشاي ومن افضل انواع الشاي في الهند ،، يعني تنفع للي بيستورد شاي
5- ميسور / مشهورة بخشب الصندل الطبيعي
6- بنقلور / طبعا قلنا أفضل مكان للنشاط العقاري (( مدينة تكنلوجية تعليمية )) يعني طلب العقار متزايد بشكل مهول
.................................................. ................
هدا اللي في بالي حاليا ،،، وهدي ياجماعة معلومات هنا جمعتها ووجهة نظر يعني مو شرط اني رحت كل الاماكن اللي بقولها ،،،،، وأي خدمة أو استفسار أنا تحت أمركم